Qandyaǵash qalasynda turatyn segiz áıel Sırıaǵa ketpekshi bop júrgen jerinen ustaldy. Olardyń arasynda 17-18 jastaǵy qyzdar da bolǵan, - dep habarlaıdy «Qamshy» portaly Kerek.info-ǵa silteme jasap.

Jaqynda Qandyaǵashta Sırıaǵa attanbaqshy bolǵan segiz qyz-kelinshek ustalǵan. Astyrtyn áreketteri áshkere bolǵan árbir ekinshi áıel birneshe márte turmysta bolǵan. Iaǵnı, olardy din jolyn ustanatyn kúıeýleri talaq etken,-dep habarlaǵan saıtqa senimdi aqparat kózi. 

“Kerek. info” tilshisine aqparat bergen azamat aty-jóniniń atalǵanyn qalamapty. Óıtkeni, ol ózi meshit qyzmetkeri kórinedi. Onyń taǵy bir áriptesi de bul aqparatty rastap otyr. Aıtýynsha, Sırıa aspaq bolǵan segiz adamnyń arasynda 17-18 jas aralyǵyndaǵy boıjetkender de bar. Kúshtik qurylymdar atalǵan segiz azamatshanyń úsheýin jaýapqa tartty,-deıdi meshit qyzmetkeri. 
Aýyldastarynyń Sırıa asyp ketpekshi bolǵany týraly áńgime qazir shaǵyn qalada jeldeı esip tur.

–Zeınetaqynyń jaıymen poshtaǵa barǵan edim. Kezekte turǵan adamdar segiz áıel soǵysqa ketpek bolǵan-dep shýlap jatty. Arasynda jap-jas qyzdar da bar kórinedi, - deıdi Qandyaǵashtyń J. esimdi turǵyny. 

Aqtóbede dinı ahýaldyń kúrdeli ekendigi eshkimge de qupıa emes. Sóıte tura resmı organdar jaýyrdy jaba toqýdan tanbaı otyr. Osy aptada din jolyn ustanatyn 20 jastaǵy jigittiń mektep oqýshysymen neke qıdyrtpaq bolǵany da áshkere boldy. 

Bul oqıǵa byltyr oblys ortalyǵynda bolǵan. Biraq kámeletke tolmaǵandar isi jónindegi mamandandyrylǵan aýdanaralyq soty jyldy qorytyndylaǵan jıynda ǵana belgili boldy. Sot tóraıymy Maıra Úristembaevanyń aıtýynsha,14 jastaǵy mektep oqýshysy áleýmettik jeli arqyly 20 jastaǵy jigitpen tanysady. Úıinen buryn-sońdy eshqaıda uzap shyqpaǵan, kafe, klýbtardyń tabaldyryǵyn attamaǵan oqýshy anasy joq kezde álgi jigitpen óz úıinde kezdesip otyrǵan. Ekeýi jynystyq qatynasqa da túsken. Tergeý mundaı jaǵdaıdyń jasóspirimniń úıinde bir emes, eki ret bolǵanyn anyqtady. 
Oqýshy qyz bolǵan jaǵdaıdy mekteptegi qurbysyna syr qylyp aıtady. Bir kúni meshitke baryp nekelerin qıdyrtpaq oılary baryn da bólisken.Oqýshy qyz estigen-bilgenin synyp jetekshisine jetkizedi. Muǵalim oqýshynyń ata-anasyna qońyraý shalǵan. 

Osylaısha muǵalim men ata-ana birlese júrip, meshitke nekelerin qıdyrtýǵa bara jatqan oqýshy qyz ben jas jigitti toqtatady. Kámeletke tolmaǵan jasóspirimdi jynystyq qatynasqa ıtermelegen 20 jastaǵy jigit sottyń úkimimen bas bostandyǵynan aıryldy. 

-Din máselesi bizdi de qatty oılandyryp otyr,-dedi jyldy qorytyndylaǵan kámeletke tolmaǵandar isi jónindegi mamandandyrylǵan aýdanaralyq sotynyń tóraıymy Maıra Úristembaeva.