İshki ister mınıstriniń orynbasary Vladımır Bojko "Proton-M" zymyrany úshin Reseı ótemaqy tólemeıtinin aıtty. «Óıtkeni zymyran aýada jaryldy. Onyń quramyndaǵy geptıl tolyqtaı janyp ketken, sondyqtan eshqandaı zıanyn tıgizbedi», - dep sendirdi vıse-mınıstr. Kelisimge saı, Reseı tek Baıqońyr ǵarysh aılaǵynyń ınfraqurylymyna zıan kelse ǵana, ótemaqy tóleýge mindetti kórinedi. Al otandyq mamandar men sheneýnikter geptıldiń ǵarysh aılaǵynan tys aýmaqty ýlaǵanyn dáleldeı almaǵan, - dep habarlaıdy Astana telearnasy.
Vladımır Bojko, QR İshki ister mınıstriniń orynbasary:
Olar ózderi shyǵynǵa batty. Biz kosmodromnan tys aýmaqqa kelgen shyǵyndy anyqtaı almadyq. Sondyqtan tólemder týraly kelissózder naqty bir soma belgilenbegen kúıi aıaqtaldy.
Vladımır Bojkonyń sózine sensek, zymyran aýada jarylyp, geptıl órtenip ketip, ekologıaǵa bir túıir zalal kelmegen. Al senatorlar buǵan senbeıdi. Máselen, Murat Bahtıaruly qorshaǵan ortaǵa zıan tımeýi múmkin emes degen pikirde.
Murat Bahtıaruly, QR Parlamenti Senatynyń depýtaty:
Óte ókinishti Reseı tarapynyń osy shyǵyndy bermegeni. Ol 13 mlrd degen, 13 mıllıardtyń ústindegi qarjy - Reseı úshin kóp te qarjy emes. Biraq, ókinishke oraı, ekologıalyq zardap keldi. Estirińizde bar ma, byltyr kıikterdiń, aqbókenderdiń qyrylǵanyn keıbir mamandar, sarapshylar sodan kórip jatyr. Sondyqtan da, ókinishke oraı, bizdiń Qazaqstannyń jaǵynda osy shyǵyndardy esepteıtin mamandardyń joqtyǵy, arnaıy zerthanalardyń joqtyǵy da óziniń kedergisin keltirdi.
«Proton-M» zymyran tasyǵyshy 2013 jyly 2 shildede Baıqońyrdan kókke kóterile bere omaqasa qulaǵan edi. Sol tusta Aeroǵarysh komıtetiniń tóraǵasy, shyǵyn Qazaqstan men Reseı ortaq esep ádistemesin daıyndap shyǵarǵan kezde tólenedi, degen bolatyn.
Talǵat Musabaev, QR Investısıalar jáne damý mınıstrliginiń Aeroǵarysh komıteti eks-tóraǵasy (04.06.2015j):
Asylynda, bul suraq, shyǵyndy birige otyryp esepteýge múmkindik beretin ortaq qujat, ne nusqaýlyq shyqpaıynsha, sheshilmeıdi. Qazir olar sondaı qujatty reseıliktermen birge daıyndap jatyr. Sondyqtan ortaq nusqaýlyq qabyldanbaıynsha, bul másele rettelmeıdi.
Osylaısha, Qazaqstan Úkimetiniń ótemaqyǵa qatysty talaby da, otandyq komısıalardyń zertteýleri de zaıa ketken syńaıly. Al zymyranmen birge jarylǵan 200 tonna ýly geptıl men 400 tonna amıl qazaq topyraǵyna sińip ketti me, álde shynynda aýada janyp joıyldy ma - bul suraqtyń naqty jaýabyn tabý kúrdeli kúıinde qalyp tur.
