Elimizdegi jetekshi saıası qurylym - «Nur Otan» partıasy parlament májilisine saılaýǵa 127 kandıdattyń tizimin jarıalady. Partıalyq tizim yǵaı men syǵaıǵa toly. Jetekshi partıa tiziminen qazaq elindegi búgingi saıası qurylymnyń ahýaly men rýhanı-moraldyq jaǵdaıdyń aýanyn baıqaýǵa bolady. Osynaý yǵaı-syǵaıdyń ulty men eli úshin «sińirgen» eńbekterine sholý jasap, qoldan kelgenshe, qoıdyń on eki múshesindeı butarlap kóreıik.
«Nur Otan» partıasy tiziminiń serkesi - Memlekettik hatshy Gúlshara ÁBDİHALYQOVA. Bul kisi áleýmettik qorǵaý salasy ýáziriniń qatardaǵy orynbasary, ýázirdiń ózi, Prezıdent Ákimshiligindegi áıelder isi komısıasynyń jetekshisi boldy. Qaı qyzmetinde de qarapaıym halyqqa jeńildengen eshteńe kórgemiz joq. Saıası tulǵasy da jarqyrap kóringen emes. Kóptiń ishindegi kúńgirt beıne. Qańqý sóz «Ábdihalyqovanyń arbasyn kóńili jaqyn Berdibek Saparbaev súırep júr» deıdi...
Jańa depýtattyqqa baqandaı alty óńirdiń basshysy at qosypty: Alık AIDARBAEV, Danıal AHMETOV, Sergeı KÝLAGIN, Amandyq BATALOV, Berdibek SAPARBAEV, Baqtyqoja İZMUHAMBETOV.
Mańǵystaýdyń «myrzasy», mamandyǵy munaıshy Alık AIDARBAEV ekpindep baryp, etpetinen tústi. Batystyń aq shaǵyldarynyń asty qara maı bolǵanymen, ústi úskirik ústirt eken, ekiniń birine shaǵylatyn jumsaq jańǵaq bolmaı shyqty. Jergilikti jurttyń ǵasyrlar boıy qalyptasqan salt-sana, ádet-ǵurpy myzǵymaı qoıdy, Álekeń qupıanyń kiltin taba almady. Bálkim, kerisinshe, qara maıdy sora bermeı, áýlıeler mekenine jańa tehnologıalardy tartyp, aýylsharýashylyǵyn myqtap qolǵa alý kerek pe edi, qalaı bolǵanda da, alǵa basqan qadam keri kete berdi... Iaǵnı, núkte (knopka) basýǵa shamasy jeter...
Kóshten qalǵan taılaqtaı adasyp-ańyrap júrgen Danıal AHMETOVtiń qolyna shyǵystyń tizgini tıgende, Óskemendi qansha kúshense de qazaq qyla almaǵan Berdibek SAPARBAEVtan keıin jańa lep, tyń samal ese me dep dámettik. Dámemiz Dámegúl apamdikindeı boldy. Danıal kókemniń «atqan oǵy» aıdalaǵa kete berdi, dóp tımedi. Eshteńe ózgerte almady...
Al, ózin Aqmola óńiriniń baqýatty «bolysyndaı» sezinetin Sergeı KÝLAGIN balasyn astananyń ár aýdanyna ákim qylyp aýystyrýmen álek bolyp júr. Gý-gýge qulaq salsaq, oblystyń orasan jeri «bolystyń» quzyrynda kórinedi. Astanaǵa kim ákim bolyp kelse de, jerdiń tarlyǵynan óńir «bolysynan» bolysýyn ótinedi eken. Kýlagınniń esebi túgel, jaýaby qysqa: «dash na dash...», ıaǵnı, «men saǵan jer beremin, sen meniń balamdy ákim qylasyń» «Saýda - saqal sıpaǵansha»: Astana ákimi jer alady, Kýlagınniń balasy ákim bolyp barady...
Almaty oblysynyń basshysy Amandyq BATALOV ómirboıy №2 kezektegi adam bolyp keldi. Kenet, ol №1 tuǵyrǵa top ete túskende, basqa túgili, ózi senbedi. Senim bildirildi, jarlyqqa qol qoıyldy, amal neshik, tyrmysý kerek. Tyrmysyp ta, tyrysyp ta baqty. Jer jánnaty Jetisý jibı qoımady. Elbasynyń jerlesteriniń jetistirip eńsesin kótere almady. Memleket basshysy aǵalyq aqylyn aıtyp, tipti, jigerlendirý úshin asyra maqtap ta kórdi. Nátıje joq...
Aqtóbege at jetektep jetken Berdibek SAPARBAEV jańa ádis izdep áýre-sarsańǵa túspedi. Aınalasyna jýrnalısıka fakúltetiniń esigin ashpaǵan, tipti, ashsa da alǵan baǵasy «úshtikten» aspaǵan ortanqol, ortasha oılap, ortasha jazatyn qabileti kemshin gazetshilerdi jınap, ózin-ózi maqtatyp, ashyq pıarǵa bas saldy. Mysaly, aıdalada «avarıadan» aýyr halde jatqan polıseılerdiń shyrqyraǵan janyn Saparbaev «saqtap qaldy», jer túbindegi jat eldiń astanasyn «bilmegen» muǵalımaǵa Berdibek «sabaq úıretti», oryssha sóılegen qytaılyq ınvestordyń qazaqsha bilmegenine Saparbaev «qatty ókpelep qaldy»... t.s.s. Qysqasy, kindik qany tamǵan Qyzylordaǵa basy artyq bir qaýyn ekpegen, shóbi shúlgin Shymkenttiń shyraıyn uqsata almaǵan, toqsan tylsym tabıǵaty tamsandyrǵan Altaıdyń abyroıyn asyrýǵa shamasy kelmegen Berdibek Saparbaev qalqaıǵan tóbesinen jalpaıǵan taqyry basym Aqtóbede asyp-sasyp, aqyrǵa qulady... Basshyǵa qaı qylyǵymen jaǵatynan qudaı bilsin, áıteýir, Saparbaev barǵan jerden qap-qap maqtaý estigenimen, ilkimdi ilgerileý kóringen joq. Bul sózimizge danyshpan Abaıdyń azyp-tozǵan týǵan topyraǵynyń adam shoshyrlyq ahýaly kýá...
Qos mınıstr astarynan sý shyqqandaı nemese elge eńbegi ásire ótip ketkendeı depýtattyń tynysh ómirine umtylypty: biri - Qarjy ýáziri Baqyt SULTANOV, ekinshisi - mádenıetshil Arystanbek MUHAMEDIULY.
Á degende, Baqyt SULTANOVbilimdi jigitteı áser qaldyrdy. Biraq, biliktiligin Prezıdent Ákimshiliginiń dálizderinde joǵaltyp alǵan sekildi. Áıtpese, «ákeleri» kúshiginde talap tastady. Qazir qarjy men marjany shatastyryp aldy...
Eshkimniń kóńiline kelmesin, Arystanbek MUHAMEDIULYnyń HanTáńiri, eń bıik shyńy - rektorlyq laýazym edi. Kótere almas belbeýdi beline baılady. «Qabyrǵalary kórinip, ókpesi óshti». Qazaq handyǵynyń mereıtoıy - balabaqshadaǵy erteńgilikten alys ketpedi. Kópserıaly kórkemfılm kómilip qaldy. Basqasyna bas aýyrtyp qaıtemiz...
Sosyn, bir shoǵyr basqarý qurylymdarynyń fýnksıonerleri jalaýlatyp shyqty. Qazaqtyń búgingi ekonomıkasynyń aýyr jaǵdaıy bulardyń qanshalyqty nashar basqarýshy ekendikterin dáleldep berse de, sheshingender sýdan taıynatyn emes. Ahmetjan ESİMOV - qazaqtyń aýylsharýashylyǵyn kúıretip, eń iri qalamyz Almatyny úıeletti. Elimizdiń eren eki óńirinde, qos oblysta ekonomıkalyq tuǵyrnama jasap, naqty jumys oryndaryn ashý arqyly halyqtyń ál-aýqatyna áser etýge qaýqarlary jetpegen Nurlan NYǴMATÝLIN men Asqar MYRZAHMETOV te jyly jer, jumsaq orynǵa umytylyp otyr. Al, eń álsiz mınıstr bolýdyń «sheberlik sabaqtarynyń» dáriskeri Myńbaı DARHANnan, «Báıterek» ulttyq basqarýshy holdıńinde joǵary jalaqy alýǵa ǵana jaraǵan Qýandyq BISHİMBAEVtan, áıel bosandyratyn genıkolog-dáriger Záýresh AMANJOLOVAdan, partıa apparatynyń «ıntrıgalarynyń mamany» Muhtar ERMANnan, jylý jınap, jan baqqan «Baýyrjan» qoǵamdyq qorynyń jetekshisi Juldyz OMARBEKOVAdan, orystildi telejúrgizýshiler Artýr PLATONOV men Maııa VERONSKAIadan nendeı nátıjeli jumys kútemiz?!. Bul aǵaıyndardyń ózgelerge qaraǵanda táýirleý atqaratyn ózderiniń kásipterimen aınalysa bergeni jón emes pe?!.
Endi ánshi-bıshiler men sportshylar Qaırat NURTAS, Janar DÝGALOVA, Nurlan ÁLİMJANOV, Gennadıı GOLOVKIN, Ilá ILIN, Serik SÁPIEV, Olga SHISHIGINA - Májilistiń onsyz da oısyraǵan bedelin oırandap, tabytqa tastady...
Májilistiń V-shaqyrylymyndaǵy eski depýtattar (uzyn-yrǵasy 30 shaqty adam) Zaǵıpa BALIEVA, Máýlen ÁSHİMBAEV, Qýanysh SULTANOV, Gúljan QARAǴUSOVA, Maıra AISINA, Sergeı DÁCHENO, Qabıbolla JAQYPOV, Baqytjan ERTAEV, Gúlnár IHSANOVA, Meıram PİSHEMBAEV, Serik SEIDÝMANOVtar buǵan deıin búldirgenderi az bolǵandaı, qaıta esik qaǵyp tur. «Bizdi taratyńyzshyİ» dep, kúni keshe qıylǵan ózderi edi ǵoı, uıatty urlatyp alý - aýyr eken...
Sonda úmitkerlerdiń túgeli úmitsiz ári laıyqsyz ba? Joq, árıne. Qazaqtyń qamyn aıtyp, ulttyń ulyqtyǵyn tanyǵan azamattar joq emes. Mysaly,Bekbolat TİLEÝHAN, Omarhan ÓKSİKBAEV, Nurtaı SABILÁNOV, Baqytbek SMAǴUL, Abaı TASBOLATOV, Muhtar TİNİKEEV...
Eldiń zań shyǵarýshy qabyrǵaly qurylymynyń - toı-Májiliske nemese shoý-Májiliske aınalyp bara jatqanyn baıqaǵan alystaǵy Ǵalym BOQASH baýyrymyz «Feısbýktegi» paraqshasynda: «...25 jyl boıy «áýeli - ekonomıka, sosyn - saıasat» dep kelgen «dýaly aýyzdyń» «ekonomıkasy» qaıda ketti? Birinshi orynǵa qoıǵandaǵy kúıi mynaý bolsa (EIU «Qazaqstan 2016 jyly 2.2 paıyzdyq resessıaǵa ketedi» dep boljady, 1998 jylǵy sıaqty quldyraý), onda ekinshi orynda turǵandaǵy jaıy ne bolar edi? 25 jyl boıy bir sáttik «spesproektilermen» kóz aldaǵan naýqanızm ıdeologıasynan bas tartyp, naqty ispen aınalysatyn mezgil baıaǵyda týǵanyn aıtatyn eti tiri bir múshe shyǵar ma eken?..» - dep jazypty...
Áı qaıdam, kúni keshe búginniń Buqaryndaı bolǵan Ábish KEKİLBAEVtan qyzǵanǵan depýtattyǵymyzdy - búgin kolejdiń túlegi Qaırat NURTASqa tyqpalaǵandardan tatymdy eshteńe shyǵa qoımas?!.
Qajymuqan ǴABDOLLA
