بۇگىن ق ر ينۆەستيسيالار جانە دامۋ مينيسترلىگىنىڭ مەديا-ورتالىعىندا اۆتوموبيل جولدارى كوميتەتىنىڭ «نۇرلى جول» ينفراقۇرىلىمدى دامىتۋ مەملەكەتتىك باعدارلاماسى بويىنشا جاساعان جۇمىس قورىتىندىسىنا ارنالعان بريفينگ ءوتتى.
بيىل مەملەكەتتىك باعدارلاما اياسىنداعى جوبالاردى جۇزەگە اسىرۋعا 356،2 ملرد. تەڭگە ءبولىندى. ونىڭ ىشىندە جالپى ۇزاقتىعى 1،2 مىڭ شاقىرىم بولاتىن ورتالىق-وڭتۇستىك، ورتالىق-شىعىس، بەينەۋ-اقتاۋ، اقتوبە-اتىراۋ، قاپشاعاي-تالدىقورعان، استانا-پەتروپاۆل جانە ورال-كامەنكا جوبالارىنىڭ قۇرىلىس جۇمىستارىن جالعاستىرۋعا ۇلتتىق قوردان 143،5 ملرد. تەڭگە ءبولىندى.
ق ر يدم اۆتوموبيل جولدارى كوميتەتىنىڭ ءتوراعاسى مەرەكە پىشەمبايەۆتىڭ ايتۋىنشا، 2017 جىلدىڭ ءبىرىنشى جارتىجىلدىعىندا اتالمىش جوبالاردىڭ قۇرىلىس-مونتاجداۋ جۇمىستارى جىلدىق جوسپار بويىنشا 32%-عا ورىندالدى.
ناقتى ايتقاندى، 3 مىڭ م3توپىراق توسەلدى، 22 شاقىرىمعا توسەنىش قاباتى سالىندى، جول تابانىنىڭ 90 شاقىرىم تومەنگى جانە 33 شاقىرىم جوعارعى قاباتى، 42 شاقىرىم تومەنگى جانە 75 شاقىرىم جوعارعى قاباتىنىڭ جابىنى، 45 شاقىرىم سەمەنتبەتوندى جابىن توسەلگەن.
جىل قورىتىندىسىندا اتالمىش جوبالار بويىنشا 602 شاقىرىمدى اياقتاۋ جوسپارلانۋدا. سونىڭ ىشىندە بەينەۋ-اقتاۋ جانە الماتى-تالدىقورعان اۆتوجولى تولىق اياقتالادى.
قازىرگى تاڭدا بيۋدجەتتىك قاراجات ەسەبىنەن 4 جاڭا جوبا - بەينەۋ-اقجىگىت، ششۋچينسك-زەرەندى، تاسكەسكەن-باقتى، ءۇشارال-دوستىق جوبالارىنىڭ قۇرىلىس جۇمىستارى باستالدى. وسكەمەن-زىريان-راحمان بۇلاعى جوباسى بويىنشا كونكۋرس قورىتىندىسى كۇتىلۋدە.
«حالىقارالىق قارجى ينستيتۋتتارىنىڭ (دقحب، ادب، ەدقب، يدب جانە قحر ەكسيمبانكى) زايمدارى ەسەبىنەن ۇزاقتىعى 2 184 شاقىرىم بولاتىن 10 جوبانى ىسكە اسىرۋ باستالادى. ولار: تالدىقورعان – وسكەمەن، كۇرتى –بۋرىلبايتال، مەركى – بۋرىلبايتال، ۇزىناعاش – وتار، قالباتاۋ – ماقات، اتىراۋ –استراحان جانە جەتىباي – جەتىوزەن. قازىرگى تاڭدا قاندىاعاش – ماقات اۆتوجولىنىڭ ۋچاسكەسى بويىنشا ادب زايمى تۋرالى كەلىسىمگە قول قويىلدى. قۇرىلىس جۇمىستارىن بيىل شىلدەدە باستاۋ جوسپارلانىپ وتىر. كۇرتى – بۋرىلبايتال، ۇزىناعاش – وتار، جەتىباي – جەتىوزەن جوبالارى بويىنشا زايمدار تۋرالى كەلىسىمگە قول قويۋ جوسپارلانۋدا. ولاردى راتيفيكاسيالاۋ اياقتالعاندا كەلىسىم-شارتتارعا قول قويىلادى»،-دەدى مەرەكە پىشەمبايەۆ.
يسلام دامۋ بانكى زايمدارى ەسەبىنەن قارجىلاندىرىلاتىن اقتوبە – قاندىاعاش، اتىراۋ– استراحان اۆتوجولدارىنىڭ ۋچاسكەلەرى بويىنشا كەلىسىمدەرگە قول قويۋ بيىلعى جىلدىڭ ءىى جارتىجىلدىعىنا جوسپارلانۋدا. قۇرىلىس جۇمىستارىن كەلىسىمدەرگە قول قويىلعاننان كەيىن باستاۋ جوسپارلانىپ وتىر.
جالپى العاندا، 4،4 مىڭ شاقىرىمدا قۇرىلىس جانە رەكونسترۋكسيا جۇمىستارىن جۇرگىزۋ جانە شامامەن 100 مىڭ ادامدى جۇمىلدىرۋ جوسپارلانىپ وتىر. جۇمىس بارىسىندا 95 پايىزدان استام قازاقستاندا وندىرىلگەن ماتەريال پايدالانىلادى.
