اۋقىمدى شاراعا قاتىسقان شەتەلدىك مەيماندار ەلباسىنىڭ «رۋحاني جاڭعىرۋ» باعدارلاماسىمەن تانىسىپ، زور قىزىعۋشىلىق تانىتتى، دەپ حابارلايدى 24.kz.
 بەس مەملەكەتتىڭ بەلسەندى جاستارى ءوزارا بايلانىستى ارتتىرۋ ماقساتىندا ءبىرقاتار جوبانى جۇزەگە اسىرۋعا ۋاعدالاستى. ولار كەلەشەكتە تۇركى اكادەمياسىمەن بىرلەسە اشىلاتىن لاگەردە قازاق ءتىلىن ۇيرەنبەكشى. كاسپيي ماڭى ەلدەرى جاستارىنىڭ اقتاۋدا باس قوسۋىنا نۇرسۇلتان نازاربايەۆتىڭ ازەربايجانعا جۇمىس ساپارىندا بەرگەن تاپسىرماسى نەگىز بولدى. وتكەن سەنبىدەن باستاۋ العان شارانىڭ بارلىق كەزەڭىندە ەلباسى ماقالاسى كەڭىنەن ناسيحاتتالدى.  

  «ادام ساناسىن جاڭعىرتۋعا ارنالعان «رۋحاني جاڭعىرۋ» باعدارلاماسىنىڭ باعىتى ۇنادى. وتكەنسىز كەلەشەك جوق. جاستار تاريحىن، ءداستۇرىن جاڭعىرتۋ ارقىلى بولاشاققا قادام باسادى. ەلىنىڭ تاۋ-تاسىن تانيدى. تۋعان جەرىنىڭ دامۋىنا كۇش سالادى. بۇل باعدارلاما ەلىنىڭ دامۋىنا اتسالىساتىن جاستارعا جول كورسەتەتىن باعدارشام ىسپەتتەس»، - دەيدى ازەربايجاننان كەلگەن الەكپەر مۇستافايەۆ.

 باۋىرلاس ەلدەردىڭ ۇلاندارى باس قوسقان جيىندا جاستار ساياساتى ماسەلەلەرىنىڭ ءتۇيىندى تۇستارى تالقىلاندى. سونداي-اق الەمدىك دەڭگەيدەگى ءىس-شارالار وتكىزۋدە جيناقتاعان تاجىريبەلەرى ورتاعا سالىندى. قازاق-ازەربايجان جاستارىنىڭ ەكىجاقتى ارىپتەستىك مەموراندۋمعا قول قويۋى فورۋم ماڭىزدىلىعىن ارتتىرا ءتۇستى. فورۋمعا قاتىسۋشىلار قالا كۇنىنە وراي وتكەن «اقتاۋ - ارمان قالا» اتتى جاس اقىندار ايتىسىن تاماشالاپ، قازاقتىڭ اقىندىق ونەرىمەن ەتەنە تانىستى. ال سەنبى-جەكسەنبى كۇندەرى «وتپان تاۋ» تاريحي-مادەني كەشەنىنە زيارات قۇرىپ، ايماق باسشىسىنىڭ كۋبوگىنا ارنالعان حالىقارالىق پانكراتيوندا جەرلەستەرىنە جانكۇيەر بولدى.

 سونىمەن 15 قىركۇيەكتە ەلىمىزدىڭ بارلىق وڭىرىندە باستاۋ العان «رۋحاني جاڭعىرۋ» جالپىرەسپۋبليكالىق جاستار اكسياسى كاسپيي جاعاسىندا قورىتىندىلاندى. مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسىن قولداۋ جانە قوعامدىق سانانى جاڭعىرتۋ ۇردىسىنە جاستاردى بەلسەندى تۇردە جۇمىلدىرۋعا شاقىرعان اكسيا ءتورت باعىتتى قامتىدى.

ق ر ءدىن ىستەرى جانە ازاماتتىق قوعام مينيسترلىگى جاستار ساياساتى دەپارتامەنتىنىڭ ديرەكتورى عابيدوللا وسپانقۇلوۆتىڭ ايتۋىنشا،  باستى ماقسات - قازاق ءسالت-داستۇرىن، تاريحقا دەگەن قۇرمەتىن كورسەتۋ. "ءبىلىم» دەگەن سايىستا ولار وزدەرىنىڭ «رۋحاني جاڭعىرۋدىڭ» يدەيالارىن قانشالىقتى تۇسىنەتىندىگىن ۆيكتورينالار وتكىزۋ ارقىلى ءبىلدىردى. «تاعزىم» تۋرالى باعىتتا ءبىزدىڭ رۋحاني جانە مادەني، تاريحي وشاقتارىمىزعا بارىپ، تازالىق جۇمىستارىن جۇرگىزدى. «اسار» اكسياسىندا ولار از قامتىلعان وتباسىلارعا بارىپ، ءتۇرلى كومەك كورسەتۋ سياقتى ىستەرىمەن ۇلەس قوستى".

 جاھان جاستارىنىڭ فورۋمى مەن قالا كۇنىن قامتىعان ءىس-شارالار ءتىزىمىن «Gakku داۋىسى» مۋزىكالىق فەستيۆالى تۇيىندەدى. تەڭىز جاعاسىنا سەرۋەنگە شىققان كوپشىلىك قازاقتىڭ تانىمال انشىلەرىنىڭ ونەرىن جاندى داۋىستا تىڭداپ، كوتەرىڭكى كوڭىل-كۇيمەن تارقاستى.