الماتى قالاسىندا دوستىق ۇيىندە «جاھاندىق باسەكەگە قابىلەتتىلىك جولىندا: مەملەكەت باسشىسى ن.ءا.نازاربايەۆتىڭ 5 ينستيتۋسيونالدىق رەفورمانى جۇزەگە اسىرۋ جونىندەگى «100 ناقتى قادام» ۇلت جوسپارى» اتتى دوڭگەلەك ۇستەل بولىپ ءوتتى، دەپ حابارلايدى Qamshy.kz اقپارات اگەنتتىگى.

«قوعامدىق جوبا» مەكەمەسى الماتى قالاسىنىڭ ىشكى ساياسات باسقارماسىنىڭ مەملەكەتتىك الەۋمەتتىك تالاپتارىنا سايكەس «الماتى قالاسىندا 5 ينستيتۋسيونالدىق رەفورمانى جۇزەگە اسىرۋ ماقساتىندا ءىس-شارالار وتكىزۋ» جوباسىن ىسكە اسىرۋ ءۇشىن ءبىرشاما ءىس-شارالار، دوڭگەلەك ۇستەلدەر ۇيىمداستىرۋدا. سولاردىڭ ءبىرى – الماتى قالاسىنداعى دوستىق ۇيىندە وتكەن «جاھاندىق باسەكەگە قابىلەتتىلىك جولىندا: مەملەكەت باسشىسى ن.ءا.نازاربايەۆتىڭ 5 ينستيتۋسيونالدىق رەفورمانى جۇزەگە اسىرۋ جونىندەگى «100 ناقتى قادام» ۇلت جوسپارى» اتتى دوڭگەلەك ۇستەل بولىپ تابىلادى.

اتالمىش شاراعا مودەراتور رەتىندە اباي اتىنداعى قازۇپۋ پروفەسسورى، عست، الماتى قالاسى قحا قكك مۇشەسى دانا مۋكاتوۆا قاتىستى. سونىمەن قاتار الماتى قالاسى قازاقستان حالقى اسسامبلەياسى ءتوراعاسىنىڭ ورىنباسارى قازبەك مامسۋروۆ، ق ر الماتى قالاسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باسشىسى ورىنباسارى گەنناديي دانياروۆ، الماتى قالاسى قوعامدىق كەڭەسىنىڭ مۇشەسى داۋرەن بابامۇراتوۆ جانە وزگە دە مەملەكەتتىك جانە قوعامدىق ۇيىم باسشىلارى، ساياسي پارتيا مۇشەلەرى، ءار ءتۇرلى ۋنيۆەرسيتەت ستۋدەنتتەرى مەن مۇعالىمدەرى قاتىستى.

قوعامدىق كەڭەس مۇشەسى داۋرەن بابامۇراتوۆ «الماتى قالاسىنىڭ الەۋمەتتىك ماڭىزدى ماسەلەلەرىن شەشۋدە ازاماتتىق قوعام مەن بيلىكتىڭ ءوزارا ارەكەتتەستىگىن كۇشەيتۋدەگى قوعامدىق كەلىسىمنىڭ ءرولى» جايىندا دوڭگەلەك ۇستەل بارىسىندا بايانداپ بەردى.

«بارلىقتارىڭىز بىلەتىن «100 ناقتى قادامنىڭ» ىشىندەگى ەڭ ماڭىزدىلارىنىڭ ءبىرى بۇكىل رەسپۋبليكا كولەمىندە قوعامدىق كەڭەستەردىڭ قۇرىلۋى بولىپ تابىلادى. قوعامدىق كەڭەستەر نە ءۇشىن قۇرىلدى؟ ءالى كۇنگە دەيىن جەر-جەرلەردە قوعامدىق كەڭەستەر قانداي قىزمەت اتقارادى؟ بۇل دا ءبىر باقىلايتىن ورگان با الدە ءجاي عانا كەزەكتى باسقوسۋ ما؟ دەگەن سەكىلدى الىپ-قاشپا پىكىرلەر دە وتە كوپ، سوعان سايكەس سۇراقتار دا تۋىنداپ جاتادى. بىرىنشىدەن، قوعامدىق كەڭەس – مەملەكەتتىك بيلىك پەن قوعامنىڭ، حالىقتىڭ اراسىنداعى ديالوگتى كۇشەيتۋ. ەكىنشىدەن، بۇل – بيلىك پەن حالىق اراسىنداعى ديالوگتى تۇرلەندىرۋ. ۇشىنشىدەن، قوعامدىق كەڭەس – قۇزىرلى مەملەكەتتىك ورگاندارعا قوعامنىڭ تاراپىنان باقىلاۋدى كۇشەيتۋ.

جوعارىدا اتالعان ماقساتتار قانشالىقتى ورىندالىپ جاتىر؟ الماتى قالاسىنىڭ توڭىرەگىندە قوعامدىق كەڭەس جۇمىسىنىڭ قانشالىقتى جۇزەگە اسىپ، جۇيەلى تۇردە ءوتىپ جاتقاندىعىن ايتى كەتەر بولساق، مۇنىڭ اتقارىپ وتىرعان شارۋاسى وتە كوپ. ءبىزدىڭ almatykenes.kz اتتى سايتىمىز بار، سونىڭ ىشىندە اتقارىپ وتىرعان جۇمىستار، ءوتىلىپ جاتقان ءىس-شارالار بارلىعى دا كورسەتىلگەن. كەز كەلگەن ۋاقىتتا وزدەرىڭىزگە كەرەكتى اقپاراتپەن تانىسا الاسىزدار»، - دەپ قوعامدىق كەڭەستىڭ نەگىزگى اتقاراتىن جۇمىستارىنا توقتالىپ ءوتتى.

ونىڭ ايتۋىنشا، قوعامدىق كەڭەس ەڭ ءبىرىنشى كەزەكتە حالىقپەن جۇمىس ىستەيدى جانە دە جاۋاپتى قۇزىرلى ورگاندارعا جەتپەي قالعان مۇڭ-مۇقتاجدىقتار ماسەلەسىن بارىنشا شەشۋگە تىرىسادى.

سونىمەن قاتار، قوعامدىق كەڭەس مۇشەسى داۋرەن بابامۇراتوۆ الماتى قالاسىنداعى ورالماندار ماسەلەسىنە دە توقتالىپ ءوتتى. بۇل رەتتە قوعامدىق كەڭەس پەن الماتى قالاسىنداعى كوشى-قون باسقارماسىنىڭ بىرلەسە وتىرىپ جاساعان جۇمىستارى جايىندا ايتىپ ءوتتى.

«الماتى قالاسى 2011 جىلدان باستاپ وسى ۋاقىتقا دەيىن ورالمانداردى قابىلداۋ ستاتۋسىنان ايىرىلعان بولاتىن. الايدا، وتكەن جىلدان باستاپ الماتىدا قايتادان ورالمانداردى قابىلداۋ جۇيەلى تۇردە قولعا الىندى. سونىڭ اياسىندا، وسى ءبىر جىلدىڭ ىشىندە بارلىق جاعدايلاردى باقىلاپ قاراپ وتىردىق. ورالمان مارتەبەسىن الۋعا ۇسىنىس بەرگەن تۇلعالاردىڭ بارلىعى وعان قول جەتكىزدى. بۇل ماسەلە تىكەلەي ءبىزدىڭ قاراماعىمىزدا بولدى. ۇنەمى جاۋاپتى قۇزىرلى ورگاندارمەن كەزدەسىپ، ءىستىڭ ءمان-جايىن باقىلاپ وتىردىق»، - دەيدى ول.

داۋرەن بابامۇراتوۆ الماتى قالاسى قوعامدىق كەڭەسىنىڭ وزگە دە اتقارىپ جۇرگەن ىستەرىنە، قوعامنىڭ، ۇلتتىڭ ماسەلەسىن شەشۋدەگى ونىڭ ءرولى جايىندا تولىققاندى بايانداپ بەردى.