قازاقستاندا «رۋحاني جاڭعىرۋ» باعدارلاماسى اياسىندا جوعارى وقۋ ورىندارىندا «ۇلى دالا جاستارى» جوباسى ىسكە قوسىلدى، دەپ حابارلايدى Qamshy.kz اقپارات اگەنتتىگى.
ونى «رۋحاني جاڭعىرۋ» باعدارلاماسى باسقارۋ ءوفيسىنىڭ مەنەدجەرى بولات اتىباي دوڭگەلەك ۇستەل ماجىلىسىندە تانىستىردى.
«تاربيە جانە ءبىلىم باعدارلاماسى» ءۇش باعىتتان تۇرادى. سول ءۇش باعىتتىڭ بىرەۋى - سانالى ازامات. «سانالى ازامات» باعىتىنىڭ شەڭبەرىندە «ۇلى دالا جاستارى» جوباسى ازىرلەندى. رۋحاني جاڭعىرۋ باعدارلاماسى اياسىندا جاسالىپ جاتقان جۇمىستاردان جوعارى وقۋ ورىندارى شەت قالعان بولاتىن. سول جوو-لاردى رۋحاني جاڭعىرۋ باعدارلاماسىنا قوسۋ ءۇشىن وسى جوبا جاسالدى. وسى جوبادان باسقا 21 جوبا بەكىتىلىپ بارلىق وڭىرلەرگە جولداندى. جوبانىڭ ماقساتى - ەلىمىز العا قويعان مىندەتتەردى جاستاردىڭ بويىنا ءسىڭىرۋ»، - دەدى بولات اتىباي.
الماتى قالاسى بويىنشا «رۋحاني جاڭعىرۋ» ءوفيسىنىڭ باس مەندجەرى لاۋرا ىرگەبايەۆا «ۇلى دالا جاستارى» جوباسىنىڭ يدەياسىن ءبىلىم جانە عىلىم مينيسترلىگى ۇسىنىپ وتىرعانىن ايتتى.
«نەگىزى باستاماشى - ق ر ءبىلىم جانە عىلىم مينيسترلىگى. «ۇلى دالا جاستارى» جوباسى قازان ايىنان باستالدى. جوبا جاستاردىڭ بەلسەندىلىگىن ارتتىرۋعا، ياعني، عىلىم، بيزنەسپەن اينالىسۋىنا جاعداي جاساۋ. وقۋ ورنىن بىتىرگەن جاستاردىڭ جۇمىسپەن قامتىلۋ دەڭگەيى تومەن. نە ءۇشىن تومەن؟ وسى ماسەلەنىڭ بارلىعى قامتىلاتىن بولادى»، - دەدى لاۋرا ىرگەبايەۆا.
جيىندا جوو ۇستازدارىنا جوبا بويىنشا ءوز وقۋ ورىندارىنا ىڭعايلى بولاتىن ۇسىنىس جاساپ، جۇمىس باعدارلاماسىن ازىرلەۋ تاپسىرىلدى.
ەلباسىنىڭ «رۋحاني جاڭعىرۋ» باعدارلامالىق ماقالاسىنا قاتىستى اباي اتىنداعى قازۇپۋ وقىتۋشىسى جومارت سيمتيكوۆ بىلاي دەپ پىكىر بىلدىرگەن بولاتىن: «ءبىزدىڭ ەلدە ءبىلىم – جالپىعا ورتاق. سوڭعى جىلدارى ەكونوميكالىق دامۋدىڭ كاسىپتىك سيپاتى بۇرىن-سوڭدى ەشبىر ۋاقىتتا وسىلايشا جەدەل وزگەرمەگەن بولاتىن. تەحنولوگيانىڭ قارقىندى ريەۆوليۋسياسى بىزگە تاياۋ ونجىلدىقتا قازىرگى كاسىپتەردىڭ ءبىرازى جويىلىپ كەتەتىنىن كورسەتەدى. ەلباسىنىڭ سوزىمەن ايتقاندا: «جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارت. سەبەبى، قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى».
عالامدانۋ جاعدايىنىڭ زاڭدىلىعىنا سۇيەنسەك، سانانىڭ اشىقتىعى ادامزات بالاسىن ۇلكەن جەتىستىكتەرگە جەتكىزەدى. ۇلى دالاداعى قالىپتاسقان سانانىڭ اشىقتىعى مەن وي ەركىندىگى ناتيجەلى تۇردە دالا دەموكراتياسىنا اكەلەدى. حح عاسىردا ەگەمەندىككە قول جەتكىزسەك، رۋحاني جاڭعىرۋ ارقىلى ححI عاسىردا «ماڭگىلىك ەل» باعىتىدا كوشىمىزدى تۇزەدىك. ەندەشە، عالامدانۋداعى باسەكەلەستىكتە ۇلتتىق كودىمىزدى ساقتاي وتىرىپ جاڭعىرۋ ءبىزدىڭ ەڭ باستى قۇندىلىعىمىز ەكەنىن ەستەن شىعارمايىق».
ايتا كەتەر بولساق، اعىمداعى جىلدىڭ 9-قازانىندا مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ىسكە اسىرۋ ماقساتىندا «ۇلى دالا جاستارى» جوباسىن دايىنداۋ، سونداي-اق جوبانى جۇزەگە اسىرۋعا ارنالعان جيىن رەسپۋبليكالىق جوبالىق كەڭسە مۇشەسى بولات اتىبايدىڭ باسشىلىعىمەن م.اۋەزوۆ اتىنداعى وقمۋ-دا جيىن وتكەن بولاتىن. اتالمىش جيىندا «تاربيە جانە ءبىلىم» كىشى باعدارلاماسى تالقىلانىپ، ۋنيۆەرسيتەتتەر جاۋاپتى بولاتىن باعدارلاما پاسپورتتارى جايىندا ءسوز قوزعالعان.
