بۇگىن الماتى قالاسىندا «ۇكىمەتتىك ەمەس ۇيىمدار مەكتەبى» جوباسى اياسىندا «رۋحاني جاڭعىرۋ: ازاماتتىق سەكتوردىڭ الەۋمەتتىك باستامالارى مەن جوبالارى» اتتى جارمەڭكە بولىپ ءوتتى، دەپ حابارلايدى Qamshy.kz اقپارات اگەنتتىگى.

اتالمىش شارانى الماتى قالاسى ىشكى ساياسات باسقارماسىنىڭ قولداۋىمەن ق ر پرەزيدەنتى جانىنداعى «قوعامدىق كەلىسىم» رمم جانە رەسپۋبليكالىق دوستىق ءۇيىنىڭ جۇمىسىن قامتاماسىز ەتۋ قىزمەتىمەن بىرلەسە وتىرىپ «قازاقستاننىڭ ۇەۇ ارو ۇلتتىق جۇيەسى» اسسوسياسيا نىسانىنداعى زتب ۇيىمداستىردى.

اتالمىش جوبانىڭ نەگىزگى مىندەتى ماقساتتارى – الماتى قالاسىنىڭ ماقساتتى توپتارى ءۇشىن الەۋمەتتىك قىزمەتتەر كورسەتۋ سالاسىندا جۇمىس ىستەيتىن كوممەرسيالىق ەمەس ۇيىمداردىڭ الەۋمەتتىك جوبالارىنىڭ اشىق بايقاۋىنىڭ ناتيجەلەرىن قورىتىندىلاۋ بولىپ تابىلادى. سونىمەن قاتار، بۇل جوبا الەۋمەتتىك ماسەلەلەردى شەشۋگە باعىتتالعان قوعام تالپىنىسىن بىرىكتىرۋ، سەكتورلىق ءوزارا ىسكەرلىكتىڭ الەۋەتىن پايدالانا وتىرىپ ۇزدىك ازىرلەمەلەردى ءىس جۇزىندە جۇزەگە اسىرۋ، ءبىرتۇتاس تۇجىرىمدامالىق باعىتتاردى، قاعيدالاردى جانە ستراتەگيالاردى جاساقتاۋدى دا ماقسات تۇتقان.

اتالمىش جارمەڭكەدە ءوز جوبالارىن ۇسىنۋشىلاردىڭ ءبىرى ارمان اۋباكىر بۇگىنگى شارا جونىندە ايتا وتىرىپ، ونىڭ قوعامعا تيگىزەر كومەگى وتە كوپ ەكەندىگىن ايتتى.

«بۇگىنگى تاڭدا ۇكىمەتتىك ەمەس ۇيىمداردىڭ جۇمىسىن وتە جاقسى جولعا قويىپ جاتىر. ولاردىڭ جۇيەسىن جەڭىلدەتىپ جاتىر. مىسالى، بۇعان دەيىنگى ۇكىمەتتىك ەمەس ۇيىمدار وز-وزىمەن جەكە-جەكە جۇرەتىن بولسا، ءقازىر وسى ۇيىم ۇكىمەتتىك ەمەس ۇيىمدار ءۇشىن دەمەۋشىلەردى ءوزى ىزدەيتىن بولدى. ۇكىمەتتەن ءتۇرلى-تۇرلى قۇجاتتاردىڭ جەڭىلدەتۋىن تالاپ ەتەدى. ەكى ورتادا دانەكەرلىك جاساپ، ءار ءتۇرلى جوبالار ۇسىنعان ۇكىمەتتىك ەمەس ۇيىمداردىڭ جوبالارىن دامىتاتىنداي ءار ءتۇرلى يدەيالىق كونكۋرستار ۇيىمداستىرىپ وتىرادى. ول كونكۋرستار وتە جەڭىل، ارتىق قۇجاتتارسىز بولادى. ونداعى ەڭ ماڭىزدى نازار اۋدارارلىق ماسەلە – يدەيانىڭ ماڭىزدىلىعى، ونىڭ قۇندىلىعى بولىپ تابىلادى»، - دەيدى ارمان اۋباكىر.

ونىڭ ايتۋىنشا، بۇعان دەيىنگى ۇكىمەتتىك ەمەس ۇيىمدار وتە كوپ قۇجات جينايتىن، كونكۋرسقا قاتىسۋ ءۇشىن ەڭ ماڭىزدى قۇجات بولىپ، يدەيا ءوز جايىندا قالاتىن ەدى.

«وسى ۋاقىتقا دەيىن كوپتەگەن كونكۋرستاردا قۇجاتتىڭ تولىق بولۋى مەن جوبانى تانىستىرۋ بارىسىندا ونىڭ قالاي بەزەندىرىلگەنىنە باسا نازار اۋداراتىن. سونىڭ سالدارىنان يدەيانىڭ وزەكتىلىگى، ونىڭ ماڭىزدىلىعى ەلەنبەي قالاتىن. ال، بۇل جوبانىڭ باستاماسى كوپتەگەن ۇكىمەتتىك ەمەس ۇيىمداردىڭ جوباسىن جارىققا شىعارۋعا، ىستەرىن جۇرگىزۋگە كوپ كومەگى تيەدى جانە قوعامعا دا تيگىزەر پايداسى وتە مول»، - دەيدى ول.

ايتا كەتەر بولساق، «ۇكىمەتتىك ەمەس ۇيىمدار مەكتەبى» جوباسى اياسىندا «الماتى قالاسى ۇەۇ-لارىنىڭ ۇزدىك الەۋمەتتىك جوباسى» اتتى بايقاۋ جاريالاندى. بۇل – الەۋمەتتىك سالا ۇيىمدارىنىڭ الەۋمەتتىك ماڭىزدى پروبلەمالاردى شەشۋدەگى مۇمكىندىكتەرىن، الەۋمەتتىك جوبالاردىڭ تۇساۋ كەسەرلەرى، مەملەكەتتىك ەمەس ۇيىمداردىڭ مەملەكەتتىك بيلىك ورگاندارىمەن جانە بيزنەس قۇرىلىمدارمەن ىنتىماقتاستىعىن ارتتىرۋعا قولداۋ كورسەتۋ، «الماتى 2020» قالانىڭ دامۋ باعدارلاماسى اياسىندا الماتى قالاسىنىڭ الەۋمەتتىك جاعىنان از قورعالعان تۇرعىندارىنىڭ ساناتىنا قولداۋ كورسەتۋ جانە پروبلەمالارىن شەشۋ ارناسىندا ۇجىمدىق تالپىنىستى بىرىكتىرۋ ءۇشىن الەۋمەتتىك سەرىكتەستىك قاتىناستارىن دامىتۋ جانە ىسكەرلىك بايلانىستاردى ورناتۋدى كورسەتەدى.

اتالمىش بايقاۋدىڭ ەرەجەسى رەتىندە «رۋحاني جاڭعىرۋ» ۇلتتىق باعدارلاماسىنىڭ جانە «الماتى 2020» قالانى دامىتۋ باعدارلاماسىنىڭ باسىم باعىتتارى ۇسىنىلعان. بۇل بايقاۋعا – 31 ۇكىمەتتىك ەمەس ۇيىم قاتىسىپ، 36 جوبا ۇسىنىلعان.