جاڭا ماۋسىمدا تىڭ جوبالارمەن كورەرمەندەرگە جول تارتقان «QAZAQSTAN» تەلەراديوكورپوراسياسىنىڭ شقو بويىنشا فيليالى ەندى جاڭا اتاۋمەن شىقپاق. بۇگىن وبلىس تۇرعىندارىنا رەبرەندينگتەن كەيىن جاڭارعان «Altai’» تەلەارناسى تانىستىرىلدى،- دەپ حابارلايدى Qamshy.kz اقپارات اگەنتتىگى. 

سالتاناتتى شاراعا قاتىسقان شقو اكىمىنىڭ ءبىرىنشى ورىنباسارى نۇرىمبەت ساقتاعانوۆ تەلەارنا كورەرمەندەرى مەن ۇجىمىنا جاڭا ماۋسىمدا ساتتىلىك تىلەپ، لەبىزىن ءبىلدىردى.

–  ەلباسىنىڭ «بولاشاققا باعدار: رۋحاني جاڭعىرۋ» ماقالاسىن ناسيحاتتاۋ تۇرعىسىنان العاندا بۇل – ءدال ۋاقىتىندا جاسالعان قادام. «قازاقستان» كورپوراسياسىنىڭ بارلىق مەديارەسۋرستاردى ءبىر لوگوتيپ اياسىندا بىرىكتىرىپ، اتاۋلارىن ءبىرىڭعاي  لاتىن ارىپتەرىمەن تاڭبالاۋى -  قۇپتارلىق شەشىم. «قازاقستان-وسكەمەن» تەلەارناسىن «التاي» دەپ وزگەرتۋ ورىندى. ويتكەنى، التاي – تۇركى الەمىنىڭ التىن بەسىگى. شىعىس قازاقستان – كەندى التايدىڭ، ءور التايدىڭ جۇرەگى، – دەدى نۇرىمبەت ساقتاعانوۆ.

ايتا كەتسەك، جاڭا ماۋسىماشاردا «QAZAQSTAN» تەلەراديوكورپوراسياسىندا ورىن العان رەبرەندينگتەن كەيىن ءبىرقاتار تەلەارنالاردىڭ اتاۋى وزگەرتىلىپ تانىستىرىلۋدا. بۇگىن «Altai’» تەلەارناسى جەتىنشى بولىپ جاڭا ماۋسىمعا اياق باستى.

وسكەمەن قالاسىندا 1958 جىلى 16 ناۋرىزدا اشىلعان تۇڭعىش تەليەۆيزيالىق ستۋديا ەڭبەك جولىن مەملەكەتتىك ساياساتپەن تىكەلەي بايلانىستىرعان. جەرگىلىكتى بيلىكتىڭ قولداۋىمەن شىعىسقازاقستاندىقتار وبلىستا جانە ەلدە بولىپ جاتقان سوڭعى جاڭالىقتاردان ۇنەمى حاباردار. جاڭا ماۋسىمدا كوگىلدىر ەكران ارقىلى كورەرمەندەرگە جول تارتقان جوبالار ءقازىردىڭ وزىندە اۋديتوريانى باۋراپ ۇلگەرۋدە.