جۋرناليستيكا سالاسىندا مامانداردى دايارلاۋ ماسەلەسىن «مەديا اليانس» قوعامدىق بىرلەستىگىنىڭ قۇرىلتايشىسى ارمان شورايەۆ كوتەرىپ، قازۇۋ-دان باسقا ۋنيۆەرسيتەتتەردە جۋرناليستيكا فاكۋلتەتىن جابۋ كەرەك دەگەندى ۇسىنعانى حابارلانعان بولاتىن.

وسى تۇستا اتالمىش ۇسىنىسقا بايلانىستى جانە بۇل تاقىرىپ توڭىرەگىندەگى ءتۇرلى پىكىرلەردى سارالاي كەلە ساۋالداردىڭ ءبىر پاراسىن جۋرناليست ارمان سقابىلۇلىنا قويعان ەدىك. مارحابات!

- ارمان سقابىل ۇلى، كەشەلى بەرى جۋرناليستيكا فاكۋلتەتتەرىن جابۋ تۋرالى ۇسىنىس كەڭ تالقىلانىپ، قارسى پىكىرلەر دە ايتىلىپ جاتىر. وسى جايىندا نە ايتاسىز؟

جۋرناليستيكا فاكۋلتەتتەرىن جابۋ  – ويلانباي ايتىلعان  ءسوز. مەن جۋرناليستيكا فاكۋلتەتتەرىن جاڭا زامانعا لايىقتاپ، جاڭا تەحنولوگيامەن جابدىقتاپ، پراكتيك مۇعالىمدەردى كوبەيتۋ سىندى اڭگىمەلەر كوتەرىلسە  قوس قولداپ قولدار ەدىم. جۋرناليستيكا بۇگىندە جۋرناليستەردىكى بولماي قالدى. بۇگىنگى تاڭدا جۋرناليستيكا فاكۋلتەتتەرىنىڭ جايى مەنى دە  قۋانتپايدى. سوڭعى جىلدارى تۇلەپ ۇشقان بىلىمگەرلەردىڭ ءبىلىم دارەجەسى دە تومەن.  جۋرفاكتان ەڭ الدىمەن كوزى اشىق، كوكىرەگى وياۋ ازاماتتار، اقىن، جازۋشىلار شىعاتىنىن ەسكەرۋ كەرەك. سوعان لايىقتاپ ارەكەت ەتۋ كەرەك. مەن جۋرفاكتى مودەرنيزاسيالاۋ، مۇعالىمدەرىن اۋىستىرۋ، جاڭا زامان تالابىنا ساي ءبىلىمدى جەتىلدىرۋ كەرەك دەسە كەلىسەمىن، الايدا جۋرناليستيكا فاكۋلتەتىن جابۋ دەگەن اقىماقتىق ءسوز.

- جۋرناليستيكادا پراكتيكادان گورى تەوريا باسىمىراق. بىلىكتى مامانداردى دايىنداپ شىعارۋ ءۇشىن نە ىستەۋ كەرەك؟ 

بۇگىندە جاس جۋرناليستەر، ستۋدەنتتەر ماعان كوپ كەلەدى. كەلگەن كەزدە ايتاتىن وتىنىشتەرى ءبىر: «اعا، مەنى ءبىر جەردەن پراكتيكادان وتكىزۋگە جاردەمدەسىڭىز» دەيدى. جۇمىس بەرۋشى ارنالار قابىلداماي جاتسا،  نەگە ءبىز جۋرناليستيكانىڭ مۇعالىمدەرىن كىنالايمىز؟ كەيبىر جۇمىس بەرۋشىلەر، مەملەكەتتىك ارنالارمەن وقۋ وردالارى اراسىندا كەلىسىم بار. دەي تۇرعانمەن ول مەكەمەلەر بارلىق ستۋدەنتتى، جاس جۋرناليستەردى پراكتيكادان وتكىزە المايدى. ونىڭ وزىندە تامىر-تانىستىقپەن وتەدى. قالامى قارىمدى ۇلكەن جۋرناليستەردىڭ ءوزى باس سۇعا الماي جۇرگەن ەسىككە ستۋدەنتتەر قالاي كىرسىن؟

ءبىر شاعىن مىسال كەلتىرەيىن، ءبىر ستۋدەنت قىز پولشادان جۋرناليستيكانى وقىپ كەلگەنىن ايتتى. ەلگە ورالعانىنا وكىنىپ وتىر. پولشادا مەملەكەتتىك ارناعا اقشا تولەپ، پراكتيكادان وتۋگە مۇمكىندىك بار ەكەن. بار ىنتاسىمەن ۇيرەتەدى دەيدى . ال ەلگە ورالعان سوڭ ونداي مۇمكىندىكتەردىڭ قاراسى دا كورىنبەيتىنىن ايتىپ نالىپ وتىر. ودان دا «مەديا اليانس» وسى ماسەلەنى كوتەرسىن، وسى ماسەلەنى جولعا قويسىن. مەديا-اليانس – جۋراليستيكانى قورعاۋ ءۇشىن ەمەس، قۇرتۋ ءۇشىن قۇرىلعان ەشقانداي پايداسى جوق ۇيىم.

- جۋرناليستيكاعا 4 جىل وقۋ كوپتىك ەتپەيدى مە؟ 

جۋرناليستيكاعا 4 جىل كوپتىك ەتەدى. ونى بۇگىندە ءبىرشاما جۋرناليستەر دە ايتىپ ءجۇر. 5 جىل وقىعانىمدى جۇمىسقا ورنالاسقان سوڭ ءبىر جىل ىشىندە ۇيرەنىپ الدىم دەپ جاتادى.  سوعان قاراماستان جۋرناليستيكا فاكۋلتەتتەرى بولۋ كەرەك. كەڭەستىك كەزدەن قالعان قاجەتى جوق پاندەردى قىسقارتۋ كەرەك. جۋرناليستيكا فاكۋلتەتتتەرىندە پروفەسسور، دوكتور بولىپ وتىرعانداردىڭ باسىم كوپشىلىگى گازەتتە ءبىر كۇن جۇمىس ىستەمەگەندەر. «مەديا-اليانس» وسىعان دا نازار اۋدارسىن. پراكتيكالىق ساباقتاردىڭ ءتىزىمىن ارتتىرىپ، بىلىكتى مامانداردى دايارلاۋعا ات سالىسسىن. 

«قازاقستان مەديا اليانس»  جۋرناليست بوستاندىعى مەن قۇقىعىن جانە ب ا ق تاۋەلسىزدىگىن قورعاۋ ءۇشىن قۇرىلعان ۇيىم. الايدا ءدال وسى ۋاقىتقا دەيىن مەديا اليانستىڭ مينيسترلىكتەر الدىندا ءبىر ءجۋرناليستىڭ قۇقىعىن قورعاعانى جايىندا ەستىگەن ەمەسپىن. مۇنداي «مەديا اليانستان» گورى جۋرناليستەر وداعىن جاڭالاپ، قازاق جۋرناليستيكاسىنىڭ مۇددەسىن  قورعايتىن، دامۋىنا جول سالاتىن باسقا ۇيىم قۇرۋىمىز كەرەك.  

- سۇحباتىڭىزعا راقمەت! 

سۇحباتتاسقان: ايگەرىم تاۋباي