الماتىدا ۇيالى تەلەفوندى قۋاتتاپ، Wi-Fi-عا تەگىن قوسىلۋعا بولاتىن يننوۆاسيالىق ايالدامالار ورناتىلادى.

الماتىدا «Science Slam - Kazakhstan» عىلىمي شوۋى ق ر تۇڭعىش پرەزيدەنتى قورىنىڭ ۇيىمداستىرۋىمەن وسىمەن ءۇشىنشى وتكىزىلىپ وتىر. بۇگىن فينالعا شىققان 7 جاس عالىم اقىلدى ايالداما، يننوۆاسيالىق قوقىسحانا، شوكولاد پرينتەرى تۋرالى ايتتى.

Science Slam - جاس عالىمداردىڭ  stand up فورماتىنداعى سايىسى. ءار قاتىسۋشى 10 مينۋت ىشىندە ءوزىنىڭ عىلىمي جاڭالىعىن جان-جاقتى تانىستىرىپ ۇلگەرۋى ءتيىس.

ناتيجەسىندە، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى رافاەل حيسامۋتدينوۆ «قاتتى تۇرمىستىق قالدىق كونتەينەرلەرىن قاشىقتىقتان باسقارۋدىڭ ينتەللەكتۋالدى جۇيەسى» جوباسىمەن ءبىرىنشى ورىن الدى.

كۇمىس مەدالعا يە بولعان حالىقارالىق اقپاراتتىق تەحنولوگيالار ۋنيۆەرسيتەتىنىڭ ستۋدەنتى نۇرلان كارىمجانوۆ كۇن ەنەرگياسىمەن قۋاتتاندىرىلاتىن "ecoStation" اقىلدى ايالداما يدەياسىن ۇسىندى.

ءۇشىنشى ورىنعا «ەۋرازيا ەكونوميكالىق وداعى اياسىندا تۇتىنۋشىلار مىنەز-قۇلقىنىڭ كروس-مادەني اسپەكتىلەرى» جوباسىمەن  تۇران ۋنيۆەرسيتەتىنىڭ ستۋدەنتى گۇليرا ابرايەۆا لايىقتالدى.

«يننوۆاسيالىق ايالدامادا تەلەفوندى قۋاتتاۋعا بولادى. ول ءۇشىن ەنەرگيا كۇن باتارەيالارىنان الىنادى. تۇندە ايالداما جيناقتالعان ەنەرگيامەن جارىقتانادى.  سونداي-اق ەكى باقىلاۋ كامەراسى، تەگىن Wi-Fi، 42-ديۋيمدى ۇلكەن ەكران، «سيتي-روۋتەر-ناۆيگاتور» بولادى. قالا تۇرعىندارى ءۇش تىلدە اقپارات الا الادى. قالانىڭ ءبىر بۇرىشىنان ەكىنشىسىنە قالاي جەتۋگە بولادى، قانداي كورىكتى ورىندار بار دەگەن سياقتى. ءبىز اۋا لاستانۋىن تىم بولماسا 15-20%-عا ازايتا الامىز دەپ سەنەمىن»، - دەدى نۇرلان كارىمجانوۆ.

ايتا كەتۋ كەرەك، مۇنداي ايالدامالاردىڭ ءبىرى ءقازىر جاندوسوۆ-ماناس كوشەلەرىنىڭ قيىلىسىندا تۇر.

قالادا تاعى 6 ايالداما جاساۋ تۋرالى كەلىسسوزدەر جۇرگىزىلىپ جاتىر.

«تالانتتى جاستاردى، جاس عالىمداردى قولداۋ ماقساتىندا ن.نازاربايەۆ اتىنداعى قور تەك گرانت تاراتۋمەن شەكتەلىپ قالماي «Science Slam» سياقتى ماڭىزدى شارالاردى وتكىزىپ كەلەدى. بۇل جاستاردىڭ اراسىندا عىلىمعا، بىلىمگە دەگەن قۇشتارلىقتى وياتۋ ءۇشىن جۇزەگە اسىرىلادى. بۇل وڭاي جۇمىس ەمەس، ارينە. ءبىراق ءۇشىنشى جىل قاتارىنان قاتىسۋشىلاردىڭ دەڭگەيى ارتقانىن، جوبالار ساپاسىنىڭ جاقسارعانىن  اتاپ وتۋگە بولادى»، - دەدى قوردىڭ الماتىداعى وكىلى سەرگەي توقتاروۆ.