تالدىقورعاندا تولىق جوندەلگەن ورتالىق ساياباق پايدالانۋعا بەرىلدى. بۇعان دەيىن ساياباقتىڭ جارتىسى جەكە كاسىپكەردىڭ مەنشىگىندە بولاتىن. كاسىپكەر ساياباقتىڭ ءوز مەنشىگىندەگى بولىگىن قايتارىمسىز نەگىزدە مەملەكەت مەنشىگىنە بەردى. جاڭارعان ساياباقتىڭ اشىلۋ سالتاناتىنا ءوڭىر باسشىسى اماندىق باتالوۆ قاتىستى، دەپ حابارلايدى وبلىس اكىمىنىڭ باسپا ءسوز قىزمەتى.

بالالاردىڭ ان-بيىمەن باستالعان ساياباقتىڭ اشىلۋىن وبلىس باسشىسى ا. باتالوۆ ءوز قۇتتىقتاۋىمەن جالعادى:

«بۇعان دەيىن ساياباقتىڭ ءبىر بولىگى جەكەمەنشىكتىڭ قولىندا بولعاندىقتان، ساياباققا تولىققاندى جوندەۋ جۇمىسىن جۇرگىزە الماعان ەدىك. جەر ۋچاسكەسىنىڭ يەسى، بەلگىلى كاسىپكەر، مەسەنات باعدات مانزوروۆ ساياباقتىڭ وزىنە تيەسىلى بولىگىن كوپشىلىكتىڭ يگىلىگى ءۇشىن مەملەكەتكە قايتارىپ بەردى. ەندى بالالارىمىز جاڭارعان ساياباقتا ەمىن-ەركىن وينايتىن بولادى. ءبىز ءوز تاراپىمىزدان ساياباقتىڭ جاڭعىرتۋ جۇمىستارىنا، اباتتاندىرۋ ىسىنە قاجەتتى قاراجات بولدىك. ساياباقتىڭ كەلبەتى تۇگەلدەي وزگەردى، كورىكتى دە قولايلى دەمالىس ورنىنا اينالدى»، - دەدى وبلىس اكىمى ا. باتالوۆ.

قوناقتار اباتتاندىرىلعان ساياباقتىڭ جۇمىسىمەن تانىستى. مۇرات مۇتىرعانوۆتىڭ سيرك مەكتەبىنىڭ ونەرپازدارى ءتۇرلى قىزىقتى قويىلىمدارىن ۇسىندى. وبلىس اكىمىمەن بىرگە اقساقالدار، سپورتشىلار مەن بالالار ساياباق ىشىندە جاس كوشەتتەر وتىرعىزدى. جالپى وسى كۇنى ساياباق پولشادان اكەلىنگەن 50 ءتۇپ قايىڭ كوشەتتەرىمەن تولىقتى. بالالار دەمالىس باعىنداعى 40 ورىندىق جۇردەك پويىزعا وتىرىپ، ءتۇرلى اتتراكسيونداردا وينادى.

ورتالىق ساياباقتىڭ جاڭعىرتىلۋى 2017 جىلدىڭ ناۋرىزىنان قولعا الىندى. نىساننىڭ جالپى سمەتالىق قۇنى 345،9 ملن تەڭگە. قۇرىلىس جۇمىستارىن باس مەردىگەر رەتىندە  «دوستىق استانا نس» ج ش س جۇرگىزگەن. سىرتقى جارىقتاندىرىلۋى، جاياۋ جۇرگىنشى جولى، گۇلزارلار مەن گازوندار جاسالىپ، ءتۇرلى اعاشتار وتىرعىزىلعان. شاعىن ارحيتەكتۋرالىق فورمالار، مۇسىندەر، ورىندىقتار، بالالار اتكەنشەكتەرى، قورشاۋلار، جاشىكتەر ورناتىلدى. سول سياقتى نەگىزگى كىرە بەرىس پەن اۆتوكولىكتەرگە ارنالعان ورىن جاسالدى.