بۇگىن الماتى قالاسى «Dostyk plaza» ساۋدا جانە ويىن-ساۋىق ورتالىعىندا «مەملەكەتتىك قىزمەتتەر مەن بوس جۇمىس ورىندارىنىڭ جارمەڭكەسى بولىپ ءوتتى، دەپ حابارلايدى Qamshy.kz اقپارات اگەنتتىگى.

شارانى الماتى قالالىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن مەدەۋ اۋداندىق اكىمدىگى اپپاراتى ۇيىمداستىردى.

اتالمىش جارمەڭكەنى وتكىزۋدەگى نەگىزگى ماقسات – حالىقتىڭ مەملەكەتتىك قىزمەتتىڭ كومەگىن الۋ كەزىندەگى ادىستەمەلىك-تۇسىندىرۋ اۋقىمىن كەڭەيتۋ بولىپ تابىلادى. سونىمەن، قاتار وسىنداي شارالار ارقىلى مەملەكەتتىك قىزمەتتەردى قولدانۋ اياسىن كەڭەيتۋدى كوزدەپ وتىر. جانە دە حالىققا كورسەتىلەتىن مەملەكەتتىك قىزمەتتەردى ۇسىنۋ ءتارتىبىن جانە «ازاماتتارعا ارنالعان ۇكىمەت» مەملەكەتتىك كورپوراسياسىنىڭ «ەلەكتروندى ۇكىمەت» پورتالى ارقىلى كورسەتىلەتىن قىزمەتتەر تۋرالى كەڭىنەن ءتۇسىندىرۋ بولىپ تابىلادى.

بۇگىن وتكەن مەملەكەتتىك قىزمەتتەر جارمەڭكەسىنە الماتى قالاسىنىڭ جەرگىلىكتى اتقارۋشى جانە اۋماقتىق ورگانداردىڭ بىلىكتى ماماندارى قاتىستى.

مەملەكەتتىك ىستەر جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنت باسشىسى بايقانوۆا ايگۇل اتالمىش شارانىڭ نەگىزگى ماقساتىنا توقتالىپ ءوتتى.

«بۇگىندە ءبىز مەملەكەتتىك قىزمەتتەر جارمەڭكەسىن ءتورتىنشى رەت وتكىزىپ وتىرمىز. سونىمەن قاتار، بۇگىن مەملەكەتتىك ورگاندارداعى وس ورىندار جارمەڭكەسىن قوسىپ ۇيىمداستىردىق. مۇنداي شارالار قالانىڭ ءاربىر اۋدانىندا وتكىزىلەتىن بولادى. اتالمىش جارمەڭكەنىڭ حالىق ءۇشىن ماڭىزى زور جانە دە بۇگىنگى تاڭدا مۇنداي شارالاردىڭ بەدەلى ەل اراسىندا كۇن ساناپ وسۋدە. سەبەبى، ەڭ العاش وتكىزىلگەن جارمەڭكەگە مىڭعا جۋىق ادام كەلگەن بولسا، تۇركسىب اۋدانىندا وتكەن جارمەڭكەگە ەكى مىڭنان اسا كەلۋشى وزدەرىنە قاجەتتى كەڭەس العان بولاتىن. ال، ناۋرىزباي اۋدانىندا ۇيىمداستىرىلعان مەملەكەتتىك قىزمەتتەر جارمەڭكەسىنە ءۇش جارىم مىڭداي ادام كەلگەن بولاتىن»، - دەيدى بايقانوۆا ايگۇل.

ونىڭ ايتۋىنشا، ەلەكتروندى ۇكىمەت قىزمەتىن قولدانۋشىلار جىل سايىن ارتىپ كەلەدى ەكەن. مەملەكەتتىك قىزمەتتەر جارمەڭكەسىن وتكىزۋدىڭ ماڭىزدىلىعىن اتاپ وتكەن دەپارتامەنت باسشىسى بۇل شارانىڭ حالىققا كوپتەگەن پايداسىن تيگىزەتىندىگىن ايتادى.

ءوز كاسىبىن باستاعىسى كەلىپ جۇرگەن جاستارعا قول ۇشىن بەرۋگە دايىن «دامۋ» قورىنىڭ وكىلى اسەم اسەت قىزى وزدەرىنىڭ ءتيىمدى جەڭىلدىكتەرى مەن شارتتارى جونىندە ايتىپ ءوتتى.

ونىڭ ايتۋىنشا، قازىرگى تاڭدا جەكە كاسىپتى باستاۋ ءۇشىن مۇمكىندىكتەر كوپ جانە سونداي مۇمكىندىكتەردىڭ ءبىرشاماسىن جاستار «دامۋ» قورىنان كەپىلدىكپەن تابا الادى ەكەن.

«دامۋ» قورى – شاعىن ورتا كاسىپكە قارجىلاندىرۋ جاعىنان كومەك كورسەتەتىن قور بولىپ تابىلادى. «دامۋ» قورىنا قىزىعۋشىلىعىن ءبىلدىرىپ كەلىپ جاتقاندار كوپ، ولاردىڭ باسىم بولىگى جاستار بولىپ تابىلادى. قازىرگى تاڭدا «ناتيجەلى جۇمىسپەن قامتۋ جانە جاپپاي كاسىپكەرلىكپەن دامىتۋ» دەگەن باعدارلاماعا قىزىعۋشىلىق تانىتىپ وتىرعاندار كوپ.

ءبىزدىڭ ەڭ ءتيىمدى جەڭىلدىكتەرىمىزدىڭ ءبىرى – پايىزدىق ۇستەمەسى، بۇگىنگى تاڭدا قازاقستان بويىنشا ەڭ تومەن بولىپ تابىلادى. سونىمەن قاتار، كەز كەلگەن بانك نەسيە العان كەزدە كەپىلگە قانداي دا ءبىر زات سۇرايدى، ال كاسىبىن ەندى باستاپ جاتقان كاسىپكەرلەرگە ول جەتكىلىكسىز بولادى، وسىنداي جاعدايعا ارنالعان ءبىزدىڭ «گارانتيا» دەگەن كومەگىمىز بار.

«دامۋ» قورىندا تەگىن وقۋلار بار جانە دە تولىققاندى كەڭەس بەرۋ قىزمەتى دە تەگىن جۇرگىزىلەدى جانە وزگە دە جەڭىلدىكتەرى وتە كوپ. ءبىزدىڭ باس كەڭسەمىزگە كەلگەن ادامعا ءبىز بارلىعىن ەگجەي-تەگجەيلى ءتۇسىندىرىپ، كاسىبىن باستاپ، دوڭگەلەتىپ الىپ كەتۋگە كوپتەگەن جاعدايلار جاساي الامىز»، -  اتالمىش قوردىڭ وكىلى اسەم اسەت قىزى.

ايتا كەتەر بولساق، جارمەڭكەگە 23 مەملەكەتتىك ورگان، 4 ۇكىمەتتىك ەمەس ۇيىم، «اتامەكەن» ۇقك، «دامۋ» اق وكىلدەرى قاتىستى.

2359 ادام مەملەكەتتىك قىزمەت تۋرالى ماعلۇمات بىلۋگە كەلسە، 350 ادام بوس ورىندار جارمەڭكەسىنە قاتىستى. ولاردىڭ ىشىندە 56 ادامدى الماتى قالالىق جۇمىسپەن قامتۋ ورتالىعى جۇمىسقا تۇرعىزۋ ماسەلەسىن قاراستىرىپ جاتىر.

ەندىگى كەزەكتە مۇنداي جارمەڭكەلەردى الاتاۋ جانە جەتىسۋ اۋداندارىندا وتكىزۋ جوسپارلانۋدا.