سەنات دەپۋتاتى ءالي بەكتايەۆ ۇكىمەت باسشىسىنا دەپۋتاتتىق ساۋال جولداپ، اجىراسۋ ءۇشىن تولەنەتىن باج سالىعىن كوبەيتۋدى ۇسىندى، دەپ جازادى Qamshy.kz

دەپۋتاتتىڭ دەرەگىنشە،  سوڭعى بەس جىلدا   اجىراسۋلاردىڭ سانى 4 مىڭعا كوبەيگەن. ونىڭ 40 پايىزى  قالالىق وتباسى.

وتباسى قۇندىلىعىن جانداندىرۋ ماسەلەسىن كوتەرگەن دەپۋتات قىز-كەلىنشەكتەردى تۇرمەگە جاپقاننان گورى، ولارعا كەشىرىممەن قاراۋ كەرەك دەگەن ۇسىنىس ايتتى. ءقازىر ەلىمىزدەگى 6 كولونيادا 2 161 ايەلزاتى جازاسىن وتەپ جاتىر ەكەن.

«ايەل وزدىگىنەن قىلمىس جاسامايدى. ەگەر زاڭ بۇزۋشىلىققا بارسا، ونىڭ استارىن الەۋمەتتىك پروبلەمادان ىزدەۋ كەرەك. قىز-كەلىنشەكتەردى تۇرمەگە جاپقاننان گورى كەشىرىم جاساپ، ولارعا كومەك كورسەتكەن ابزال. تۇرمەگە تۇسكەن قىز بالاسى تۇگىلى، ەرلەردىڭ اراسىنان سانا-سەزىمى پسيحولوگيالىق دەفورماسياعا ۇشىراماعان جاندى كەزدەستىرۋدىڭ ءوزى قيىن. قوعامدا قىزعا، ايەلگە، اناعا، بالالى وتباسىلارعا دەگەن كوزقاراستى مۇلدەم قايتا قاراۋدىڭ ۋاقىتى كەلدى»، — دەدى سەناتور.

ستاتيستيكاعا سۇيەنسەك، 2016 جىلى قازاقستاندا 140 840 نەكە تىركەلگەن. دەگەنمەن وسى ءبىر جىل ىشىندە 51 775 وتباسى اجىراسىپ كەتكەن. ونىڭ ىشىندە باتىس قازاقستان وبلىسىندا 5 030 جۇپ ۇيلەنسە 1829-ى اجىراسقان.

ءتۇرلى ستاتيستيكانى سويلەتكەن ءالي بەكتايەۆ پرەمەر-مينيسترگە ءبىرقاتار ۇسىنىس ايتتى. وتباسى قۇندىلىقتارىن جان-جاقتى زەرتتەۋ  ماقساتىندا ق ر ءبىلىم جانە عىلىم مينيسترلىگى جانىنان ارنايى نەكە جانە وتباسى عىلىمي-زەرتتەۋ ينستيتۋتىن اشۋ كەرەكتىگىن العا تارتتى. سونداي-اق،  وتباسىنىڭ بۇزىلۋىن تەجەۋ ماقساتىندا نەكە بۇزۋعا تولەنەتىن باج سالىعىنىڭ كولەمىن جۇپتارعا ماتەريالدىق تۇرعىدان سەزىلەتىندەي ەتىپ كوبەيتۋدى ۇسىندى.