ماڭعىستاۋ وڭىرىندەگى وقۋ ورىندارى مۇناي سالاسىنان تىس ماماندىقتارعا دا ەرەكشە كوڭىل بولۋدە. بۇل تۋرالى بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ ماڭعىستاۋ وبلىسىنا ساپارى بارىسىندا بەلگىلى بولدى، دەپ حابارلايدى Qamshy.kz اقپارات اگەنتتىگى.

ساپار بارىسىندا مۇحتار قۇل-مۇحاممەد اقتاۋ قالاسىنداعى ماڭعىستاۋ پوليتەحنيكالىق كوللەدجىنە ارنايى ات باسىن بۇردى. قازىرگى تاڭدا بۇل ءبىلىم وشاعى ەلىمىزدەگى ەڭ ۇزدىك ون ارنايى ورتا وقۋ ورىندارىنىڭ قاتارىندا. مۇندا دانەكەرلەۋشى، مۇناي جانە گاز كەن ورىندارىن پايدالانۋعا بەرۋ، توكار، مەتالل وندەۋ سياقتى وبلىستا جوعارى سۇرانىسقا يە 20 ماماندىق بويىنشا ماماندار دايارلايدى. سونداي-اق، ءوڭىردىڭ مۇناي شيكىزاتىنا تاۋەلدىلىگىن ازايتۋ ماقساتىندا كوللەدجدە اۋىل شارۋاشىلىعى سياقتى وبلىستا كەنجەلەپ قالعان سالالار بويىنشا دا ماماندار دايارلاۋ قولعا الىنىپ، جاڭا ون ماماندىق اشىلعان.

ستۋدەنتەرمەن كەزدەسۋىندە مۇحتار قۇل-مۇحاممەد قازاقستاندى ءۇشىنشى جاڭعىرتۋعا ارنالعان ەلباسى تاپسىرمالارىن ورىنداۋدىڭ ماڭىزىنا توقتالىپ، ەلىمىزدىڭ كەمەل كەلەشەگى تۋرالى ايتتى. سونداي-اق، ول مەملەكەت باسشىسى جۇكتەگەن مىندەتتەردى جۇزەگە اسىرۋدا ءوڭىردىڭ بەلسەندىلىگىنە نازار اۋداردى. سونىڭ ىشىندە كوللەدجدە ءدۋالدى جۇيە بويىنشا وقىتۋ ءادىسىنىڭ قولعا الىنۋىن بەرەرى مول باستاما دەپ اتاپ ءوتتى. وسى رەتتە كوللەدجدە ەلباسى تاپسىرماسىمەن جۇزەگە اسىرىلىپ جاتقان «ءساتتى قادام» پارتيالىق جوباسىمەن وقىپ جۇرگەن جاستار دا از ەمەس ەكەنىن ايرىقشا اتاپ وتكەن ءجون.

سونىمەن قاتار مۇحتار قۇل-مۇحاممەد مەملەكەتتىك باعدارلامالاردىڭ ناتيجەسىندە جەمىستى جۇمىس ىستەپ تۇرعان «كاسپيي» سۋ تۇششىتۋ زاۋىتى مەن «ماعاش نان» نان ونىمدەرى كومبيناتىندا بولدى. ايتا كەتەيىك، تەك «نۇرلى جول» باعدارلاماسى بويىنشا 2017 جىلى ماڭعىستاۋ وبلىسىنا 80 ميلليارد تەڭگە كولەمىندە قاراجات ءبولىندى. سونىڭ ناتيجەسىندە تۇرعىن ۇي-كوممۋنالدىق شارۋاشىلىق نىساندارى جاڭعىرتىلىپ، مەكتەپتەر مەن بالاباقشالار سالىنۋدا جانە ءوڭىردىڭ كولىك ينفراقۇرىلىمى دا قارقىندى دامىپ كەلەدى.

سونداي-اق، پارتيا ءتوراعاسىنىڭ ءبىرىنشى ورىنباسارى وبلىستاعى جوعارى وقۋ ورىندارى مەن ارنايى ورتا وقۋ ورىندارىنىڭ وقىتۋشىلار قۇرامىمەن جانە ستۋدەنتتەرىمەن كەزدەستى. اتالعان ءىس-شارادا مۇحتار قۇل-مۇحاممەد ەلباسى الدىمىزعا قويىپ وتىرعان مىندەتتەرگە توقتالدى. سونىڭ ىشىندە قوعامدىق سانانى جاڭعىرتۋدىڭ ماڭىزى مەن مانىنە نازار اۋدارىپ، بۇل جولدا مەملەكەت باسشىسى جاستارعا زور سەنىم ارتىپ وتىرعانىن جەتكىزدى.

پارتيانىڭ وبلىستىق اكتيۆىمەن كەزدەسۋىندە «نۇر وتان» پارتياسى ءتوراعاسىنىڭ ءبىرىنشى ورىنباسارى ەلباسىنىڭ پارتيا ساياسي كەڭەسىنىڭ كەڭەيتىلگەن وتىرىسىندا بەرگەن تاپسىرمالارىن جۇزەگە اسىرۋ جونىندە نۇروتاندىقتاردىڭ الدىندا تۇرعان ناقتى مىندەتتەردى اتاپ ءوتتى.