كەشە زەينەتاقى جۇيەسى تۋرالى اقپارات تاراتۋ ماقساتىمەن اشىلعان تاۋەلسىز enpi.kz پەن 7kun.kz سايتى ۇيىمداستىرعان جۋرناليستەرگە ارنالعان وتىرىس ءوتتى،- دەپ حابارلايدى Qamshy.kz اقپارات اگەنتتىگىنىڭ ءتىلشىسى. 

قازاقستانداعى زەينەتاقى جۇيەسى قانداي؟ ونىڭ كەمشىلىكتەرى مەن ارتىقشىلىقتارى، بولاشاق زەينەتكەرلەردى الاڭداتاتىن وزەكتى ماسەلەلەر مەن زەينەتاقى توڭىرەگىندەگى داۋدىڭ تۋۋ سەبەپتەرىن Freedom Finance قامقورشىلار كەڭەسىنىڭ جەتەكشىسى، بەلگىلى قارجى ساراپشىسى، جۋرناليست، كوممۋنيكاسيا مامانى بوتا جۇمانوۆا ءتۇسىندىردى.

«ءسىز بولاشاقتا قانشا كولەمدە زەينەتاقى الاتىنىڭىزدى بىلەسىز بە؟ بۇل ماسەلەدە ۇلكەن گاپ بار سەبەبى، بىرىنشىدەن، قىزمەتكەرلەر وتە از اقشا جيناۋى مۇمكىن. ەكىنشىدەن، قارجىنى دۇرىس باسقارا الماۋ.

2016 جىلدان باستاپ، زەينەتاقى قورىن باقىلاپ جۇرەمىن. ءسىزدىڭ ينۆەستيسيالىق قارجىڭىز وسىنشا سومانى قۇرايدى دەگەن اقپاراتتى ءبىلىپ وتىرامىن. ال ەلدە بولعان ينفلياسيا جونىندە ەشقانداي جاڭالىق ايتىلعان جوق. ينفلياسياعا دەيىن مەنىڭ شوتىمدا شامامەن 8 ميلليونعا جۋىق قارجى بولعان. ال دوللار باعامى كۇرت جوعارىلاعاندا مەنىڭ زەينەتكە جيناعان قارجىنىڭ كولەمى ەكى ەسەگە ازايدى.

زەينەتاقى قورىن باسقارىپ وتىرعان قارجى ماماندارى حالىقتىڭ جيعان-تەرگەنىنە نەمقۇرايلى قاراپ، ونى تەك تەڭگەدە ساقتاعان. الايدا، وزدەرىن بىلىكتى مامان رەتىندە سانايتىندار، زەينەتاقىنى تەڭگەدە ەمەس، دوللار نەمەسە باسقا دا سەنىمدى ۆاليۋتادا ساقتاۋىنا بولار ەدى»، -دەپ باستادى ءسوزىن بوتا جۇمانوۆا.

يا، ارينە، ينفلياسيا كەزىندە تەك بوتا جۇمانوۆانىڭ عانا ەمەس، بارشامىزدىڭ جيعان-تەرگەن زەينەتىمىزگە اسەر ەتتى.

«وسى جاعدايدان كەيىن تۇيگەنىم، قازاقستاندىقتاردىڭ بولاشاعىنا، زەينەتاقى قورىنا شىنىندا دا جانى اشيتىن ۇيىم قۇرۋ كەرەكتىگى. سوندىقتان، 2016 جىلدىڭ قاڭتارىندا ءاربىرىمىزدىڭ قارتايعاندا الاڭسىز ءومىر سۇرە الۋىمىزدى قامتاماسىز ەتەتىن Freedom Finance قامقورشىلار كەڭەسىن قۇرۋ ىسكە اسىرىلدى.

ال 2016 جىلدىڭ ماۋسىمىندا زەينەتاقى نارىعىن دامىتاتىن جوبانى تانىستىردىق. زەينەتاقى قورىنىڭ جۇمىسىمەن تىعىز قارىم-قاتىناس ورناتىپ، ولارعا اسەر ەتۋدىڭ ماقساتىندا 2017 جىلدىق اقپانىندا «ءبىرىڭعاي جيناقتاۋشى زەينەتاقى قورى» اق -ڭ كەڭەسىنە مۇشە بولدىق. كەڭەستە ايتارلىقتاي ناتيجەگە جەتە الماعاننان سوڭ، 2017 جىلدىڭ ساۋىرىندە ونىڭ قۇرامىنان شىعۋعا تۋرا كەلدى.

كەڭەس قۇرامىندا بولعاندا ۇسىنىس ايتقانىمدا، «ءسىزدىڭ قارجىلىق ءبىلمىڭىز جوق» نەمەسە «ءسىز وسى ماسەلەنى كوتەرۋگە عىلىمي دارەجەڭىز بولۋ كەرەك» دەگەن سىلتاۋلاردان كەيىن زاڭ ماگيسترى اتانۋدى ماقسات ەتتىم. ماگيسترلىك ديسسەرتاسيانى «زەينەتاقى قورى ينۆەستيسيا وبەكتىسى» دەگەن تاقىرىپتا قورعاپ شىقتىم.

وسىدان سوڭ، زەينەتاقى تاقىرىبىن كوتەرۋگە دارەجەم جەتكىلىكتى بولعان ۋاقىتتا enpi.kz (ءبىرىڭعاي جيناقتاۋ اقپاراتتاندىرۋشىسى) سايتىن قۇرىپ، 2018 جىلدىڭ ماۋسىم ايىنان باستاپ سايتتى گرانتتار عانا ەمەس، باسقا دا قارجىلاندىرۋ كوزدەرىن پايدالانا وتىرىپ، تۇراقتى تۇردە جۇرگىزۋدى كوزدەيمىن».

بوتا جۇمانوۆانىڭ باستاماسى زەينەتاقى قورىن جيناقتاپ جۇرگەن ۇلكەن-كىشىگە ورتاق ماسەلە ەكەندىگىن ۇمىتپاي، enpi.kz سايتىنا جاريالانعان اقپاراتپەن تانىس بولىپ جۇرىڭىزدەر. سەبەبى، بوتا جۇمانوۆا حالىقتىڭ قامىن ويلاپ، اتالمىش جوبانى ىسكە اسىرىپ جۇرگەن قازاقتىڭ قامقورشى قىزى.