ورال سوتى ورامال تاعاتىن قىزدىڭ اكەسىنىڭ شاعىمىن قاناعاتتاندىرمادى، دەپ Qamshy.kz اقپارات اگەنتتىگى ازاتتىققا سىلتەمە بەرىپ جازادى. 

ورال قالالىق №2 سوتىنىڭ سۋدياسى گۇلنار ماساۋروۆا №7 ورتا مەكتەپتىڭ ءبىرىنشى سىنىبىندا وقيتىن قىزدىڭ اكەسى اسەت سۇلتاننىڭ ازاماتتىق شاعىمىن قاناعاتتاندىرۋدان باس تارتتى. اسەت سۇلتان قىزىنىڭ ساباققا ورامال تاعىپ بارۋىنا رۇقسات بەرۋدى سۇراعان بولاتىن. 

بۇل ءىس بويىنشا جاۋاپكەر، №7 مەكتەپتىڭ ديرەكتورى ۆيكتور پروتاسوۆ سوت شەشىمىنە قاتىستى كوممەنتاريي بەرۋدەن باس تارتتى.

جاۋاپكەر تاراپتىڭ وكىلى ءارى زاڭگەر ارمان ءابدىراشيت ازاتتىققا سوت شەشىمىنە شاعىمداناتىنىن ايتتى. ءابدىراشيتتىڭ سوزىنشە، ورالداعى №9 جانە №37 مەكتەپتىڭ ورامال تاعاتىن بىرنەشە وقۋشىسىنىڭ اتا-اناسى دا سوتقا جوعارىداعىداي تالاپتارمەن شاعىمدانعان. ول شاعىمداردى دا سۋديا گۇلنار ماساۋروۆا قارايدى.

وتكەن اپتادا استانادا اقتوبە جانە باتىس قازاقستان وبلىستارىنداعى ونداعان وقۋشىنىڭ اتا-اناسىنىڭ مەكتەپتە ورامال تاعۋ داۋىنا قاتىستى شاعىمى بويىنشا سوت باستالعان. اتا-انالار ءبىلىم جانە عىلىم مينيسترلىگىنىڭ 2016 جىلى قاڭتاردىڭ 14ء-ى كۇنى شىققان №26 بۇيرىعىنىڭ 13-تارماعىن قازاقستان كونستيتۋسياسىنا جانە حالىقارالىق كەلىسىم-شارتتارعا قايشى دەپ تانۋدى تالاپ ەتىپ وتىر. ول بۇيرىق نەگىزىندە مەكتەپ فورماسىنىڭ ءبىرىڭعاي ەرەجەسى ەنگىزىلگەن. ەرەجەگە ساي، مەكتەپ وقۋشىلارى پيدجاك، كەۋدەشە، جەيدە، شالبار، كلاسسيكالىق جەيدە (قىس كەزىندە قالىڭ كەۋدەشە، سارافان) كيۋى كەرەك. ال بالالارى مەكتەپكە ورامال تاعىپ باراتىن اتا-انالار ءبىلىم مينيسترلىگى كونستيتۋسيالىق قۇقىعىمىزدى شەكتەپ وتىر دەپ سانايدى.