ق ر ۇلتتىق بانك 2017 جىلعى 22 قاراشادان باستاپ 2017 جىلعى ۇلگىدەگى ديزاينى وزگەرتىلگەن نومينالدىق قۇنى 500 تەڭگەلىك بانكنوتتاردى اينالىسقا شىعاردى. اينالىمعا ەنگەن جاڭا 500 تەڭگەلىك بانكنوتتى بۇگىن وڭىرلىك كوممۋنيكاسيالار قىزمەتى الاڭىندا وتكەن بريفينگتە ق ر ۇلتتىق بانكى بقو فيليالىنىڭ ديرەكتورى قوزىباق ءابۋ ۇلى قۇلباراقوۆ تانىستىردى.

ونىڭ ايتۋىنشا، جاڭا بانكنوتتىڭ ديزاينى اينالىستاعى «قازاق ەلى» سەرياسىنىڭ اقشا بەلگىلەرىمەن ءبىرىڭعاي ستيلدە – بەت جاعىندا باسىم تۇردە تىگىنەن بەينەلەر، ال سىرت جاعىندا كولدەنەڭ تۇرىندە بەينەلەر ورىندالعان. باسىم ءتۇسى – كوگىلدىر - كوك. بانكنوتتىڭ ولشەمى – 130ح62 مم. بانكنوتتىڭ وڭ جاعىندا «قازاق ەلi» مونۋمەنتى جانە ورتاسىندا تومەنگى بولىكتە ۇشىپ بارا جاتقان كوگەرشىندەر كەلتىرىلسە، جوعارى بولىگىندە، ورتاسىندا جانە سول جاعىنان قازاقستان رەسپۋبليكاسىنىڭ مەملەكەتتىك رامىزدەرى: مەملەكەتتىك ەلتاڭبا جانە مەملەكەتتىك تۋ بەينەلەنگەن. سول جاقتا تومەندە جانە جوعارى جاقتا نومينالدىڭ سيفرلىق بەينەلەنۋى، سول جاقتا ورتاسىندا نومينالدىڭ مەملەكەتتىك تىلدەگى ارىپتىك بەينەلەنۋى ورنالاسقان. جوعارى سول جاق بۇرىشىندا «قازاقستان ۇلتتىق بانكى» دەگەن جازبا، ونىڭ استىندا قولدان جاساعانى ءۇشىن جاۋاپكەرشىلىك تۋرالى ەسكەرتەتىن «بانكنوتتاردى قولدان جاساۋ زاڭمەن قۋدالانادى» دەگەن مەملەكەتتىك تىلدەگى جازبا ورنالاسقان.

بانكنوتتىڭ سىرت جاعىنداعى نەگىزگى بەلگىسى– كاسپيي تەڭىزى، ونىڭ ارتىندا – قازاقستان كارتاسىنىڭ بەينەسى. سول جاعىندا تومەندە جانە وڭ جاعىندا جوعارىدا بانكنوت نومينالىنىڭ سيفرلىق بەينەلەنۋى، ال تومەندە ورتاسىندا – ورىس تىلىندەگى ارىپتىك بەينەلەنۋى ورنالاسقان. «پوددەلكا بانكنوت پرەسلەدۋەتسيا پو زاكونۋ» دەگەن جازبا بانكنوتتىڭ سول جاق بۇرىشىندا ورنالاسقان.

2006 جىلعى ۇلگىدەگى جانە 2017 جىلعى ۇلگىدەگى نومينالى 500 تەڭگەلىك بانكنوتتاردىڭ قاتار قولدانىلۋ كەزەڭى 2017 جىلعى 22 قاراشا – 2020 جىلعى 10 ماۋسىم بولىپ بەلگىلەندى جانە «2006 جىلعى ۇلگىدەگى جانە 2017 جىلعى ۇلگىدەگى نومينالى 500 تەڭگەلىك بانكنوتتاردىڭ قاتار اينالىستا بولۋ كەزەڭىن بەلگىلەۋ تۋرالى» قازاقستان رەسپۋبليكاسى ۇلتتىق بانكى باسقارماسىنىڭ 2017 جىلعى 2 قاراشاداعى № 207 قاۋلىسىنا سايكەس جۇزەگە اسىرىلادى.

- 2006 جىلعى ۇلگىدەگى جانە 2017 جىلدىڭ ۇلگىدەگى نومينالى 500 تەڭگەلىك بانكنوتتار 2020 جىلدىڭ 20 ماۋسىمىنا دەيىن قازاقستان رەسپۋبليكاسىنىڭ بۇكىل اۋماعىندا زاڭدى تولەم قۇرالى بولىپ تابىلادى جانە تولەمدەر مەن اقشا اۋدارىمدارىنىڭ بارلىق تۇرلەرى بويىنشا قابىلدانۋعا مىندەتتى.

زاڭدى تولەم قۇرالى بولىپ تابىلاتىن بانكنوتتار مەن مونەتالاردى قابىلداۋدان باس تارتۋ اكىمشىلىك قۇقىق بۇزۋشىلىقتار تۋرالى قازاقستان رەسپۋبليكاسىنىڭ كودەكسىنە سايكەس اكىمشىلىك قۇقىق بۇزۋشىلىق بولىپ تابىلادى،-دەدى ق.قوزىباقوۆ.