الماتىدا جاستارعا ارنالعان 2020 جىلعا دەيىن 12 جاتاقحانا سالىنادى، سونىڭ 4-ەۋىنىڭ قۇرىلىسى بيىل اياقتالادى. بۇل تۋرالى الماتى قالاسى بويىنشا قازاقستان حالقى اسسامبلەياسى حاتشىلىعىنىڭ مەڭگەرۋشىسى نازار بالعىمبايەۆ «دوستىق ۇيىندە» وتكەن «بىرلىگى مىقتى جاستار - بولاشاققا جول باستار» اكسياسىندا ايتتى.

بۇگىن الماتىداعى «دوستىق ۇيىندە» وتكەن «بىرلىگى مىقتى جاستار - بولاشاققا جول باستار» اكسياسىندا بايانداما جاساعان قازاقستان حالقى اسسامبلەياسى حاتشىلىعىنىڭ مەڭگەرۋشىسى نازار بالعىمبايەۆ الماتىدا «جاستار جىلى» ىشىندە اتقارىلعان ناقتى شارالارعا توقتالدى.

«قازاقستانداعى ءاربىر ءۇشىنشى ستۋدەنت الماتىدا ءبىلىم الىپ جاتىر. سوندىقتان دا ەلباسىنىڭ باستاماسىمەن 2017 جىل الماتىدا «جاستار جىلى» بولىپ جاريالانعان بولاتىن. وسىعان وراي الماتىدا جول كارتاسى ازىرلەنىپ، ساپالى ءبىلىم،  جۇمىسپەن قامتۋ، مادەنيەت، سالاۋاتتى ءومىر سالتىن دامىتۋ، تۇرعىن ۇيمەن قامتاماسىز ەتۋ سەكىلدى نەگىزگى 5 باعىت بويىنشا جۇمىس اتقارىلدى. جاستاردىڭ تۇرعىن ءۇي ماسەلەسىن شەشۋ ءۇشىن بيىل ستۋدەنتتەر مەن جاس وتباسىلارعا جاتاقحانالار سالۋ جوباسى قولعا الىندى.

«جول كارتاسى» اياسىندا 2020 جىلعا دەيىن الماتى ستۋدەنتتەرىنە 12 جاتاقحانا  سالۋ جوسپارلانعان. جوسپارلانعان 12 جاتاقحانانىڭ 4-ەۋىنىڭ قۇرىلىسى بيىل اياقتالادى. «الماتى جاستارى» دەپ اتالاتىن باعدارلامامەن جاستارعا باسپانانى جەڭىلدەتىلگەن جولمەن جالعا بەرۋ جوسپارى باستالدى. «ءتۇرعىنۇيقۇرىلىسجيناق» بانكى ارقىلى نەسيەلەۋدىڭ پيلوتتىق جوباسى ىسكە قوسىلدى. جاستاردىڭ جاس دەڭگەيى 35-كە دەيىن ۇزارتىلىپ، باعدارلامانىڭ جۇزەگە اسۋى ءۇشىن جەرگىلىكتى بيۋدجەتتەن 1 ملرد تەڭگە ءبولىندى. «الماتى جاستارى» باعدارلاماسى ارقىلى جىلدىق 5 پايىزدىق مولشەرلەمەمەن جىل اياعىنا دەيىن 100 جاس وتباسى باسپانالى بولادى»، - دەدى بايانداماشى نازار بالعىمبايەۆ.  

نازار بالعىمبايەۆ 2017 جىلى جاستاردى جۇمىسپەن قامتۋ كولەمى دە ارتقانىن جەتكىزدى.

«جاستاردى جۇمىسپەن قامتۋعا جەرگىلىكتى بيۋدجەتتەن 500 ملن تەڭگە ءبولىندى. جۇمىس ىزدەگەن 2000 جاس يننوۆاسيالىق ماماندىقتاردى يگەرۋ ءۇشىن وقۋعا جىبەرىلدى. 2017 جىلى بارلىعى 16 000 ادام جۇمىسقا ورنالاستىرىلدى. جاستارعا ارنالعان لوفت-ورتالىق اشىلىپ، ونىڭ بازاسىندا ەرىكتىلەر، جاس كاسىپكەرلەر، جاس سۋرەتشىلەر سەكىلدى ورتالىقتار جۇمىس ىستەي باستادى. سونىمەن قاتار، قىركۇيەك ايىندا الاتاۋ اۋدانىنداعى اتلەتتەر قالاشىعىندا جاستارمەن جۇمىس جاسايتىن «الماتى جاستارى» ورتالىعى جۇمىسىن باستادى. اۋەزوۆ اۋدانىندا ءدال سونداي «باعدارشام» ورتالىعى اشىلدى»، - دەدى نازار بالعىمبايەۆ.

«بىرلىگى مىقتى جاستار - بولاشاققا جول باستار» شاراسى اياسىندا «ءبىز لاتىن ءالىپبيىن قولايمىز» اكسياسى ءوتتى. وندا 3*2 مەترلىك باننەرگە 100 جاس وكىل قول قويىپ شىقتى.  سونىمەن  قاتار، «Q كەزەڭىنىڭ جاستارى» فلەش-موبى ءوتتى. وندا سۋرەتتەر سالىنعان فۋتبولكا كيگەن 120 جاس پانفيلوۆ كوشەسى بويىنداعى جاڭا جاياۋ جۇرگىنشىگە ارنالعان جولمەن ءجۇرىپ ءوتتى.