قازاقستان رەسپۋبليكاسى تاۋەلسىزدىك مەرەكەسىنە، قازاقستان رەسپۋبليكاسى تۇڭعىش پرەزيدەنتى كۇنىنە وراي «س. مۇقانوۆ پەن ع. مۇسىرەپوۆتىڭ ادەبي-مەموريالدىق مۋزەي كەشەنىندە»  «كوك تۋدىڭ جەلبىرەگەنى» اتتى ادەبي كەش ءوتتى ، دەپ حابارلايدى Qamshy.kz اقپارات اگەنتتىگى.

س. مۇقانوۆ پەن ع. مۇسىرەپوۆتىڭ ادەبي-مەموريالدىق مۋزەي كەشەنىنىڭ جەتەكشىسى، حالىقارالىق «الاش» ادەبي سىيلىعىنىڭ لاۋرەاتى، فيلولوگيا عىلىمدارىنىڭ كانديداتى، اقىن ءادىلعازى قايىربەكوۆتىڭ جۇرگىزۋىمەن وتكەن ادەبي كەشتە ق ر مادەنيەت قايراتكەرى، شىعىس قازاقستان وبلىسى تارباعاتاي اۋدانىنىڭ قۇرمەتتى ازاماتى، قازاق پوەزياسىنا وزىندىك قولتاڭباسىمەن كورىنىپ جۇرگەن بەلگىلى اقىن، «كوك تۋدىڭ جەلبىرەگەنى» كىتابىنىڭ اۆتورى الماسبەك احمەتبەك ۇلى قوناق بولدى.

كەشكە جينالعان قاۋىم الماسبەك احمەتبەكۇلىنا وتباسى مەن شىعارماشىلىق جولى تۇرعىسىنان سۇراقتار قويسا، ءبىز دە ءوز كەزەگىمىزدە "رۋحاني جاڭعىرۋ" جايىندا  ا.احمەتبەك ۇلىنىڭ پىكىرىن سۇراعان ەدىك.  

قۇرمەتتى الماسبەك احمەتبەك ۇلى، بۇگىنگى تاڭدا ەكى جينالىستىڭ ءبىرىن "رۋحاني جاڭعىرۋ" اياسىندا دەپ جۇرگەندەر كوپ. "رۋحاني جاڭعىرۋدى" قالاي تۇسىنەسىز ؟

"مەن بىتكەن ويپاڭ جەرگە الاسا اعاش،

ەمەسپىن جەمىسى كوپ تاماشا اعاش.

قالعانشا جارتى جاڭقام مەن سەنىكى 

پايدالان شارۋاڭا جاراسا، الاش!" دەپ وتكەن، وسىدان تۇپ-تۋرا 100 جىل بۇرىن الاشوردانى قۇرعان  الاشورداشىلاردىڭ رۋحاني جالعاسى بولاتىن 10 تۇلعانىڭ بولۋى -  "رۋحاني جاڭعىرۋ".

ەلباسىمىزدىڭ كورەگەن ساياساتىنىڭ ارقاسىندا اتالعان جوبا بۇگىندە قولعا الىنىپ جاتىر، ءبىرشاما جۇمىستار اتقارىلۋدا. بۇگىن ءبىزدىڭ جينالىپ، ادەبي كەشكە جاستاردىڭ جينالۋى دا "رۋحاني جاڭعىرۋ" اياسىندا اتقارىلىپ جاتقان ءىستىڭ ءبىرى". 

"مەنىڭ الدىمدا ءوز جانىم مەن كوك تۋدىڭ ءبىرىن تاڭداۋ كەرەك بولسا، مەن مىندەتتى تۇردە كوك تۋدى تاڭدايمىن. "كوك تۋدىڭ جەلبىرەگەنى" ولەڭى ەلىمە دەگەن ماحابباتتان تۋعان ولەڭ" ، دەپ ايتىپ ءوتتى ا. احمەتبەك ۇلى. 

ادەبي كەشكە جينالعان قاۋىم قاسيەتتى قارا ولەڭ مەن كيەلى دومبىرادان توگىلگەن اسەم انمەن سۋسىنداپ، رۋحاني ازىق جينادى. 

 ايتا كەتسەك، 2017 جىلدىڭ 6 ناۋرىزىندا  «كوك تۋدىڭ جەلبىرەگەنى» اتتى جىر جيناقتىڭ ەكىنشى رەت باسپادان شىققانى حابارلانعان بولاتىن.