قازاقستان رەسپۋبليكاسى مادەنيەت جانە سپورت مينيسترلىگىنىڭ «قازاقكونسەرت» مەملەكەتتىك كونسەرتتىك ۇيىمى مەملەكەت باسشىسى ن.ءا.نازاربايەۆتىڭ «بولاشاققا باعدار – رۋحاني جاڭعىرۋ» ماقالاسىندا كورسەتىلگەن جوبالاردى جۇزەگە اسىرۋ ءۇشىن جۇيەلى جۇمىستار اتقارىپ كەلەدى. ۇلتتىق بولمىستىڭ وزەگى بولىپ سانالاتىن قازاقستاندىق مادەنيەتتى الەمگە تانىتۋ ءۇشىن ەلباسى «جاھانداعى زاماناۋي قازاقستاندىق مادەنيەت» جوباسىن ۇسىنعانى بارشامىزعا ايان.

وتاندىق مادەنيەتتىڭ زاماناۋي بەينەسىن اشىپ، ونىڭ الەمدىك ارەناعا جول تارتۋىنا وڭ ىقپال ەتۋ جانە جوعارىدا اتالعان ءىرى مادەني جوبانى ىسكە اسىرۋ ماقساتىندا، ق ر مادەنيەت جانە سپورت مينيسترلىگىنىڭ قولداۋىمەن «قازاقكونسەرت» مەملەكەتتىك كونسەرتتىك ۇيىمى جانە رەسپۋبليكالىق نەمىس دراما تەاترى 2017 جىلعى جەلتوقسان ايىندا ەۋروپا مەملەكەتتەرىنىڭ استانالارىندا ۇلكەن گاسترولدىك تۋرنە وتكىزۋدى جوسپارلاۋدا. «قازاقكونسەرت» مەملەكەتتىك كونسەرتتىك ۇيىمىنىڭ «Astana Musical» تەاترى ەلىمىزدىڭ رۋحاني قۇندىلىقتارىنا اينالعان حالىق اندەرى مەن حالىق كومپوزيتورلارىنىڭ شىعارمالارى، ۇلتتىق وپەرامىز بەن كلاسسيكالىق مۋزىكامىزدىڭ ءىنجۋ-مارجاندارى نەگىزىندە دالا تەاترىنىڭ ەلەمەنتتەرىن پايدالانا وتىرىپ «ۇلى دالا تەاترى» اتاۋىمەن "قىز جىبەك" ەتنو-فولكلورلىق ميۋزيكلىن ۇسىنادى. ال رەسپۋبليكالىق نەمىس درامى تەاترىنىڭ ارتىستەرى قازاق ۇلتتىق دراماتۋرگياسىنىڭ شىڭى – م.اۋەزوۆتىڭ «قاراگوز» سپەكتاكلىن نەمىس تىلىندە كورسەتەدى. (قويىلىمدار فرانسۋز،نەمىس،اعىلشىن، ورىس تىلدەرىندە سۋبتيترمەن جۇرەدى)

ۇلكەن گاسترولدىك تۋردىڭ مارشرۋتى ءىرى مادەني ورتالىقتارعا اينالعان كەلەسى قالالاردى قامتيدى:بەرلين (گەرمانيا) –– پاريج (فرانسيا) - كانن (فرانسيا) – ۆەنا (اۆستريا)-بريۋسسەل (بەلگيا) - ماسكەۋ (رەسەي).

قازاقستاندىق ارتىستەردىڭ حالىقارالىق گاسترولدەرى «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا زور ۇلەس قوسىپ، وتاندىق مادەنيەتتى الەمگە بىرىككەن ۇلتتار ۇيىمىنىڭ التى تىلىندە تانىستىرۋدىڭ وڭتايلى تاسىلىنە اينالاتىنىنا سەنىمدىمىز.