بيىلدىڭ وزىندە سەمەيدە ەكى بىردەي ءبىلىم شاڭىراعى بوي كوتەردى. سولاردىڭ ءبىرى قازاقستان رەسپۋبليكاسىنىڭ تۇڭعىش پرەزيدەنتى كۇنى اشىلدى. 1-جەلتوقسان مەرەكەسىن ايماق باسشىسى دانيال احمەتوۆ سەمەيلىكتەرمەن بىرگە قارسى الدى. كەزەكتى رەت اۋەجايدى قايتا قۇرۋ جۇمىسىمەن تانىسىپ، «ۇشاقتار» كەنتى وقۋشىلارىنىڭ قۋانىشىنا ورتاقتاستى، دەپ جازادى Qamshy.kz اقپارات اگەنتتىگى.
دانيال احمەتوۆ تۇساۋىن كەسكەن جاراتىلىستانۋ-ماتەماتيكا باعىتىنداعى مەكتەپ 1200 ورىنعا شاقتالعان. زامان اعىمىنا، ستاندارت تالابىنا ساي بوي كوتەرگەن وقۋ ورنى جاڭا موديفيكاسيا سىنىپتارىمەن جابدىقتالعان. كەشەندى ينتەراكتيۆتى قۇرالدار ورناتىلىپ، حيميا، بيولوگيا، فيزيكا جانە ينفورماتيكا كابينەتتەرى جاقسارتىلعان. ايماق باسشىسى دانيال احمەتوۆ الەمنىڭ باسقا مەملەكەتتەرىمەن سالىستىرعاندا، قازاقستاندا مەكتەپتەر ەمەس، ناعىز سارايلار سالىنىپ جاتقانىن ەرەكشە اتاپ ءوتتى.
– مەن كوپتەگەن ەلدەردە بولدىم. ونداعى مەكتەپتەر مەن بالاباقشالاردىڭ جاعدايىمەن جاقىن تانىسپىن. كوزىم كورگەنى، بالالار قاراپايىم جاعدايدا ءبىلىم الىپ جاتىر. ءتىپتى، تاماقتانۋ ءۇشىن قولايلى ورىن قاراستىرىلمايدى. ماسەلەن، وسى مەكتەپ پەن ءبىزدىڭ ەلدەگى وزگە دە الەۋمەتتىك ماڭىزدى نىساندارمەن سالىستىرۋعا دا كەلمەيدى. ەرەكشەلىكتى وتانداستارىمىزدىڭ ءبارى بىردەي كورە المايتىنى وكىنىشتى، ارينە. ءبىراق، مەن ءبىزدىڭ مەملەكەتتەگى مەكتەپتەر كەرەمەت تۋىندى، ناعىز سارايلار دەپ ۇلكەن سەنىممەن ايتا الامىن، - دەدى شقو اكىمى دانيال امحەتوۆ.
مەكتەپتە تەك ءبىلىم الىپ قانا قويماي، بالالاردىڭ جان-جاقتى دامۋلارى ءۇشىن دە بارلىق جاعداي جاسالعان. سپورتتىق جانە گيمناستيكالىق قۇرىلعىلارى بار ەكى سپورت زال جۇمىس ىستەيدى. ودان بولەك، فۋتبول مەن باسكەتبول الاڭدارى دا وقۋشىلاردىڭ بوس ۋاقىتىن ءتيىمدى وتكىزەر جەرگە اينالماق. ال قىزدار مەن ۇلدارعا ارنالعان شەبەرحانالار ماتا، اعاش جانە مەتالل وڭدەۋگە ارنالعان سوڭعى تەحنولوگياداعى قۇرالدارمەن جابدىقتالعان.
