بۇعان دەيىن ارنايى رۇقسات قاعازدارىن راسىمدەۋ جۇمىستارى شەتەلدىك تۋريستەردىڭ ايماقتىڭ شەكارالاس اۋداندارىنا كەلۋىنە ءبىرشاما شەكتەۋ قويدى. وبلىس باسشىلىعى وڭىردەگى حالىقارالىق ءتۋريزمدى دامىتۋ ماقساتىندا كوشى-قون شەكتەۋلەرىن الىپ تاستاۋدى ۇسىندى. بۇل باستامانىڭ بۇگىنگى جاي كۇيىن 2017 جىلدىڭ 29-شى قاراشاسىندا استاناداعى ورتالىق كوممۋنيكاسيالار قىزمەتىندە وتكەن بريفينگكە قاتىسقان شىعىس قازاقستان وبلىسىنىڭ اكىمى دانيال احمەتوۆ ايتىپ بەردى، دەپ جازادى Qamshy.kz اقپارات اگەنتتىگى. 

ەندى شەتەلدىك تۋريستەر كوشى-قون پوليسياسىندا كوپ ۋاقىتتارىن جوعالتپاي كاتونقاراعاي اۋدانىنىڭ شەكارالاس جەرلەرى مەن مارقاكولگە بارا الادى. الىنعان شەكتەۋلەر كاتونقاراعاي ۇلتتىق پاركى مەن مارقاكول تابيعي قورىعىنداعى ەكولوگيالىق ءتۋريزمنىڭ دامۋىنا وڭ سەپتىگىن تيگىزبەك. سونداي-اق، ايماق باسشىسى شقو الاكول جاعالاۋىندا جۇڭگو حالىق رەسپۋبليكاسىمەن شەكارالاس تۋريستىك ىنتىماقتاستىقتى قۇرۋ باستاماسى مەملەكەت تاراپىنان قولداۋ تابادى دەپ ۇمىتتەنەتىنىن مالىمدەدى. بۇل باعىتتى دامىتۋ قىتايلىق تۋريستەردىڭ ارنايى رۇقسات قاعازدارىن راسىمدەۋىن ءبىرشاما جەڭىلدەتپەك.

ءوڭىر باسشىلىعى وسى ماسەلەنى جاقىن ارادا سىرتقى ىستەر، مادەنيەت جانە سپورت مينيسترلىكتەرىمەن تالقىلاۋعا نيەتتى.