قازاقستانداعى تۇز شىعاراتىن كوشباسشى كاسىپورىن «ارالتۇز» اق-نىڭ ونىمدەرى رەسەي، قىرعىزستان، وزبەكستان، ءازىربايجان نارىعىنا شىعارىلىپ جاتىر، دەپ جازادى Qamshy.kz اقپارات اگەنتتىگى. 

«ارالتۇز» اق ءبىرىنشى ۆيسە-پرەزيدەنتىنىڭ كومەكشىسى عاني سيسەكەشوۆتىڭ ايتۋىنشا، بيىل مەكەمەنiڭ قۇرىلعانىنا 92 جىل تولىپ وتىرعان كومپانيا يودتالعان اس تۇزىن شىعارادى جانە ونىڭ نەگiزگi ءوندiرۋشiسi. اكسيونەرلىك قوعام ساپالى تاۋار شىعارۋ بويىنشا كوپتەگەن حالىقارالىق جانە رەسپۋبليكالىق كورمەلەر ديپلومدارىنىڭ يەگەرi. 2001-2003 جىلدارى «ارالتۇزدا» زاۋىت تاريحىندا بiرiنشi رەت قايتا قۇرۋ جۇمىستارى اتقارىلىپ، ءوندiرiسكە «تۇزدى ەكiنشi رەت بايىتۋ» تەحنولوگياسى ەنگiزiلگەن. ياعني، تۇزدى جۋۋ، مايدالاۋ، يودتاۋ جانە كەپتىرۋ جۇمىستارى قازىرگى زامان تالابىنا ساي ورىندالۋدا.

ال 2012 جىلدان باستاپ «ارالتۇز» جاڭا ينۆەستوردىڭ كەلۋىنە وراي، كوپتەگەن يگىلىكتى جۇمىستار جاسالدى. ەلباسىنىڭ قولداۋىمەن جۇزەگە اسقان يندۋستريالىق-يننوۆاسيالىق دامۋدىڭ مەملەكەتتىك باعدارلاماسىنىڭ ارقاسىندا بيزنەستى دامىتۋعا جانە جاڭا باستامالاردى ىسكە اسىرۋعا مۇمكىندىك تۋدى. سونىڭ ارقاسىندا «ارالتۇز» اق اس جانە تەحنيكالىق تۇز ءوندىرىسىن ۇلعايتۋ» جوباسىن ىسكە قوسقان.

«جوباعا ەكى جارىم ميلليارد تەڭگەنىڭ ۇستىندە ينۆەستيسيا سالىنىپ جانە دۇنيە ءجۇزى بويىنشا تۇز وندىرۋگە ارنالعان قۇرال-جابدىقتىڭ كوشباسشىسى يسپانيا («Construcciones Mecanicas J.SERRA، S.A.») كومپانياسىنىڭ قۇرال-جابدىقتارىن الدىردىق. بۇعان دەيىن زاۋىت ونىمدىلىگى جىلىنا 120 مىڭ توننا بولسا، جاڭا زاۋىتتى ىسكە قوسۋ ارقىلى ونىمدىلىكتى 1،7 ەسەگە ۇلعايتتىق. بۇرىن «ارالتۇز» ىشكى نارىقتا اس تۇزىنىڭ 70 پايىزى تيەسىلى بولسا، جاڭا زاۋىتتى ىسكە قوسۋ ارقىلى ىشكى نارىقتاعى ۇلەس 90 پايىزعا دەيىن جەتتى. سايكەسىنشە، سىرتقى نارىقتاعى ۇلەسى دە ۇلعايدى»، - دەيدى عاني سيسەكەشوۆ.

«ارالتۇزدىڭ» ونىمدەرى قازاقستان نارىعىنان وزگە رەسەي، وزبەكستان، قىرعىزستان، ءازىربايجان ەلدەرىنە ەكسپورتتالۋدا. سونىمەن قاتار، جۇڭگو، جاپونيا، بىرىككەن اراب امىرلىكتەرىنە دە جونەلتۋدى جوسپارلاپ وتىر.

الداعى ۋاقىتتا كاسىپورىن حيميا ونەركاسىبىن دامىتۋ ماقساتىندا قۇنى 246 ملن اقش دوللارىن قۇرايتىن كالسييلەندىرىلگەن سودا جانە كىر جۋعىش ۇنتاق شىعارۋ جوبالارىن ىسكە قوسۋدى جوسپارلاپ وتىر.

قىزىلوردا وبلىسىنداعى كاسىپكەرلەر پالاتاسىنىڭ ساراپشىسى گۇلدانا تاڭاتوۆانىڭ ايتۋىنشا، رەسپۋبليكالىق «التىن ساپا» قىزىلوردا وبلىسى اتىنان «ارالتۇز» اق قاتىسادى.

«بۇل كومپانيانىڭ ونىمدەرى جارناماعا مۇقتاج ەمەس. سەبەبى، اتتارىنىڭ ءوزى برەندكە اينالعان كومپانيا ونىمدەرىن ەلىمىزدىڭ عانا ەمەس، شەت ەلدىڭ تۇرعىندارى دا كەڭىنەن قولدانۋدا»، - دەيدى گ.تاڭاتوۆا.