نۇرسۇلتان نازاربايەۆ داڭعىلى، ساعادات نۇرماعامبەتوۆ، تالعات بيگەلدينوۆ، روزا باعلانوۆا اتىنداعى كوشەلەردىڭ تاقتالارىن وزگەرتۋ 16 جەلتوقسانعا بەلگىلەندى.

قالالىق ءماسليحات دەپۋتاتتارى مۇرات ءادىلحانوۆ، ۆياچەسلاۆ بانششيكوۆ، ۆلاديسلاۆ لي بيزنەستىڭ الەۋمەتتىك جاۋاپكەرشىلىگى اياسىندا ءبىرقاتار كوشەلەردىڭ تاقتالارىن وزگەرتۋ تۋرالى باستاما كوتەردى.

«مەملەكەت باسشىسىنىڭ ارقاسىندا ءبىز بارلىعىمىز قازاقستاندا بەيبىتشىلىك پەن كەلىسىم جاعدايىندا ءومىر ءسۇرىپ جاتىرمىز. بولاشاققا جوسپار قۇرىپ، اركىمنىڭ ءوز ءىسىن اشۋعا، بيزنەسىن جاساۋعا بارلىق جاعدايلار جاسالعان. ونىڭ ۇستىنە، نۇرسۇلتان نازاربايەۆ داڭعىلى - الماتىداعى باستى كوشەلەردىڭ ءبىرى، سوندىقتان ءبىز كوشە تاقتالارىن جاڭارتۋ جۇمىستارىنا اتسالىسساق دەيمىز»، - دەدى ءماسليحات دەپۋتاتى، بيزنەسمەن، مەسەنات ۆياچەسلاۆ بانششيكوۆ.

اتاپ ايتقاندا، ق ر تاۋەلسىزدىگى كۇنى نۇرسۇلتان نازاربايەۆ داڭعىلىنداعى 160 ءۇي مەن 33 زاڭدى ۇيىمنىڭ تاقتالارى اۋىستىرىلادى. ساعادات نۇرماعامبەتوۆ اتىنداعى كوشەدە 115 تۇرعىن ءۇي مەن 11 زاڭدى ۇيىم تاقتالارى وزگەرەدى. روزا باعلانوۆا اتىنداعى كوشەدە 136 تۇرعىن ءۇيدىڭ تاقتاسى جاڭارادى. تالعات بيگەلدينوۆ اتىنداعى كوشەدە 24 ءۇيدىڭ تاقتاسى اۋىستىرىلادى.

«كوشە تاقتالارىن وزگەرتۋ رەسپۋبليكالىق، وبلىستىق، اۋداندىق ءمانى بار قالالار، استانا، اۋىل جانە باسقا دا ەلدى مەكەندەر راسىمدەۋدىڭ ءبىرىڭعاي ستاندارتى بويىنشا جۇزەگە اسىرىلادى»، - دەدى الماتى قالاسىنىڭ تىلدەردى دامىتۋ باسقارماسىنان.

ايتا كەتەر بولساق، الماتىدا نۇرسۇلتان نازاربايەۆ داڭعىلىندا العاشقى جول نۇسقاۋلىقتارى پايدا بولعان ەدى. جول نۇسقاۋلىقتارى فۋرمانوۆ كوشەسىن اۋىستىرعان كۇننىڭ ەرتەسىندە بىردەن قويىلعان.

فۋرمانوۆ كوشەسى 30 قاراشا كۇنى ءماسليحات دەپۋتاتتارىنىڭ شەشىمىمەن نۇرسۇلتان نازاربايەۆ داڭعىلىنا اۋىستىرىلعان بولاتىن.

الماتى قالاسى اكىمدىگىنىڭ باسپا ءسوز قىزمەتى جۇزەگە اسىرىلىپ جاتقان «Almaty Smart City» تۇجىرىمداماسىنىڭ جاڭا نۇسقاۋلىقتارعا قالا بيۋدجەتىنەن ءبىر تەڭگە دە جۇمسالماعانىن جەتكىزدى.

ايتا كەتەيىك، تۇجىرىمداما «Billboard Video Digital Broadcast» كومپانياسىنىڭ ينتەللەكتۋالدى-اقپاراتتىق ناۆيگاسيالىق كولىك جۇيەسى جوباسىنا تيەسىلى. جوبا جوعارى ساپالى LED-ديسپلەيمەن، بورت كومپيۋتەرلەرمەن، جول اپاتىن بىلدىرەتىن، اۋا رايىن، كۋرس باعامىن حابارلايتىن ناۆيگاسيالىق حابارلاعىشتارمەن قامتىلعان جول بويىنداعى مەتتالوقۇرىلعىلاردىڭ اقپاراتتىق-تەحنيكالىق كەشەنىنەن تۇرادى.

قازىرگى ۋاقىتتا الماتىدا ءدال وسىنداي 44 مەديابورد جانە جاڭا الاڭدا ءبىر «Jumbo» مەگابوردى جۇمىس ىستەپ تۇر. سونداي-اق، مەدەۋ اۋداندىق حالىققا قىزمەت كورسەتۋ ورتالىعىندا «اقىلدى حقو» پيلوتتىق جوباسى ىسكە قوسىلدى.

كومپانيا الداعى ۋاقىتتا «اقىلدى قالا» جوباسىن استانا مەن اقتاۋ قالالارىندا، الماتىداعى جاياۋ جۇرگىنشىلەر، اۆتوتۇراق ايماقتارى مەن ساۋدا ورتالىقتارىندا جانە قازاقستاننىڭ وزگە قالالارىنداعى حقو-نىڭ In-door جۇيلەرىنە ەنگىزبەك.

ايتا كەتەرلىگى، قازاقستاندىق «Smart-City» ەكو-جۇيەسىن اتالعان كومپانيا جۇڭگو، سينگاپۋر، ءباا، رەسەيگە ەنگىزۋ تۋرالى كەلىسىمشارتقا قول جەتكىزگەن.