پاۆلودار قالاسىنىڭ ءتارتىپ ساقشىلارى مەشىتكە كەلگەن ادامداردىڭ قالتاسىنان اقشا ۇرلاپ جۇرگەن ۇرىنى قولعا ءتۇسىردى، دەپ حابارلايدى قازاقپارات پاۆلودار وبلىسىنىڭ ءىىد باسپا ءسوز قىزمەتىنە سىلتەمە جاساپ. ۆەدومستۆونىڭ حابارلاۋىنشا، پوليسياعا جەرگىلىكتى مەشىتتەردىڭ بىرىنە بارىپ جۇرەتىن ەكى ادام ارىزبەن جۇگىنگەن. ولاردىڭ ايتۋى بويىنشا، بەلگىسىز ادامدار مەشىتتىڭ كيىم ىلەتىن ورىندارىندا ءىلۋلى تۇرعان كۇرتەشەنىڭ قالتاسىنان اقشا، بانك كارتالارىن جانە باسقا دا باعالى زاتتاردى ۇرلاعان. «جابىرلەنۋشىنىڭ ايتۋىنشا، بەلگىسىز ادامدار ونىڭ كۇرتەشەسىنەن بىلعارى پورتمونە، 60 مىڭ تەڭگەگە جۋىق اقشالاي قاراجات جانە قۇجاتتاردى ۇرلاعان. بىرنەشە كۇننەن كەيىن پوليسياعا وسىعان ۇقساس ارىزبەن تاعى ءبىر جابىرلەنۋشى جۇگىندى.

ول جەرگىلىكتى مەشىتتەردىڭ بىرىندە بارسەتكاسىنىڭ، 15 000 تەڭگە اقشاسىنىڭ ۇرلانعانىن ايتتى»، - دەپ حابارلايدى پاۆلودار وبلىسىنىڭ ءىىد باسپا ءسوز قىزمەتىنەن. جەدەل-ىزدەستىرۋ ءىس-شارالارى بارىسىندا وسى قىلمىستى جاسادى دەگەن كۇدىكپەن 1994 جىلى تۋعان پاۆلودار قالاسىنىڭ تۇرعىنى ۇستالدى. كۇدىكتى ءوز كىناسىن تولىعىمەن مويىنداپ، ىستەگەن ىسىنە وكىنەتىنىن ايتقان. «تەرگەۋ بارىسىندا كۇدىكتىنىڭ مەشىتكە كىرىپ، كەلۋشىلەردىڭ اڭقاۋلىقتارىن پايدالانا وتىرىپ، كىرە بەرىستە تاستاپ كەتكەن سىرتقى كيىمدەردىڭ قالتاسىنان ۇرلىق جاساعاندىعى انىقتالدى. كەيىن كوزگە تۇسپەي قىلمىس ورنىنان ءىزىن سۋىتقان. قازىرگى ۋاقىتتا پوليسەيلەر ونىڭ وبلىس ورتالىعى اۋماعىندا جاسالعان ۇقساس قىلمىستارعا قاتىستىلىعىن تەكسەرۋدە»، - دەلىنگەن حابارلامادا. اتالعان جاعداي بويىنشا قازاقستان رەسپۋبليكاسى قىلمىستىق كودەكسىنىڭ 188-بابى بويىنشا سوتقا دەيىنگى تەرگەۋ باستالدى.