ءۇندىستاننىڭ تاريحي "باحۋبالي" سەريالى

الماتىلىق ناتاليا گوردەيەۆا 10 جىلدان بەرى كينويندۋستريا سالاسىندا جۇمىس ىستەپ كەلەدى. قازىرگى تاڭدا ول ءۇندى جانە گولليۆۋد فيلمدەرىن تۇسىرۋگە كومەكتەسىپ ءجۇر. ءوز ءومىرى، وتاندىق كينوبيزنەستىڭ ۇتىمدى تۇستارى مەن كەمشىلىكتەرى تۋرالى ناتاليا Tengrinews.kz پورتالىنىڭ The ەفير جوباسىنا بەرگەن سۇحباتىندا ايتىپ بەردى، دەپ جازادى Qamshy.kz اقپارات اگەنتتىگى.

ۇلكەن كينوعا العاش قادام باسقان ءساتى تاريحي «ماركو پولو» سەريالىنىڭ قازاقستانداعى تۇسىرىلىمدەرىنەن باستالعان.

«ءبىز سەنارييشى ءارى رەجيسسەر احات يبرايەۆپەن بىرلەسىپ ءتۇرلى جوبالاردا جۇمىس اتقاردىق. «ماركو پولو» قازاقستانعا كەلگەندە احات مەنى شاقىردى. ءسويتىپ ءبارى وزدىگىنەن جۇرە بەردى. وزگە دە رەجيسسەرلەرمەن تانىستىم، كينو الەمىنە ەنە باستادىم. كەيىن اتالمىش سەريالدىڭ ەكىنشى ماۋسىمىن تۇسىرۋگە مالايزياعا اتتاندىم. ءۇندىستاندىق تاريحي «باحۋبالي» ءفيلمىنىڭ تۇسىرىلىمىنە كومەكتەستىم. قازىرگى ۋاقىتتا بولليۆۋد پەن گولليۆۋدتىڭ جوبالارىمەن اينالىسىپ ءجۇرمىن»، - دەدى ناتاليا.

سونداي-اق ناتاليا بولليۆۋدتىق جوبامەن اينالىسۋ بارىسىندا وتاندىق مەنەدجمەنتتى ساعىناتىنىن مويىندادى. «ءبىز مۋمبايدا ءبىر جوبامەن اينالىسىپ جۇرگەن ۋاقىتتا، وتاندىق تۇسىرىلىمدەردى، ءبىزدىڭ اكىمشىلىكتى قاتتى ساعىنامىن. ولارعا ۇيىمداستىرۋشىلىق، مەنەدجمەنت، لوگيستيكا جەتىسپەيدى. سول سەبەپتى ءبىزدى شاقىرادى. ال كرەاتيۆتى تۇرعىدان ءبىزدى قاجەت ەتىپ تۇرعان جوق. ولاردىڭ قولىنان ءبارى كەلەدى»، - دەدى ول.

گولليۆۋدتىق جوبالاردا ءبارى كەرىسىنشە. ناتاليانىڭ ايتۋىنشا، وندا ءبارى ويلاستىرىلعان. «اركىم تەك وزىنە تيەسىلى جۇمىسپەن اينالىسادى. ءبىر كوماندادا عانا جۇمىس ىستەيسىڭ. جۇمىس قيىن، اۋىر، الايدا بارلىق جاعداي جاسالعان. جاقسى تولەيدى، وزدەرى كولىكپەن تاسىپ، تاماقتاندىرادى».

قازىرگى تاڭدا ناتاليا بولليۆۋدتىق جوبالاردان جاقسى اقشا تاۋىپ جاتقانىن مويىندادى. مۇنى ءۇندىستاننىڭ جاڭا دەڭگەيگە كوتەرىلگەندىگىمەن ءتۇسىندىردى.

«بۇرىندارى ءۇندى كينولارىندا بيلەپ، ءان شىرقاۋ ءجيى بولسا، ءقازىر توبەلەستەردى ءجيى كەزدەستىرەمىز. ول ءۇشىن ماماندار پروفەسسيونالداردى شاقىرادى. مەن قازاقستانعا كەلگەندە، مۇنداعى اكتەرلەرگە از تولەيتىنىن بايقادىم. الايدا نارىق سونداي، بۇل قالىپتى دا. مەنىڭ سالامدا اقشا اپتا سايىن بەرىلەدى. ايلىق 2 مىڭ دوللاردان جوعارى. قازاقستانداعى ەڭ جوعارعى ايلىق 2 مىڭ دوللار. مەن كوبىنە كاسكادەرلەرمەن جۇمىس ىستەيمىن»، - دەدى ناتاليا.  

الەمدىك دەڭگەيدەگى كاسكادەرلەرمەن جۇمىس ىستەپ، تاجىريبە جيناعان ناتاليا قازاقستاندىق Nomad Stunts كاسكادەرلەرىن جوعارى باعالايدى.

«ءبىزدىڭ كاسكادەرلەر توبەلەسەدى، شابادى، ءورتتىڭ دە اراسىندا جۇرەدى، ساداقپەن اتادى. مۇنداي ادامدار جوبا ءۇشىن ىڭعايلى. مۇندايدا ءبىزدىڭ ويىمىزعا بىردەن نومادتىقتار كەلەدى. ولار جاراقات الاتىندارىن بىلسە دە، وسى قادامعا بارادى. ولار – كاسىپقوي كاسكادەرلەر».

سوڭعى 8 جىلدا جۇمىس بارىسىمەن ناتاليا گوادا تۇرىپ جاتىر. «مەن 4-تەن 8 ايعا دەيىن جالعاساتىن جوبالاردا جۇمىس ىستەيمىن. اپتاسىنا 6 كۇن جۇمىستا بولىپ، 1 كۇن دەمالامىن. دەمالىستا گواعا بارىپ سۋعا تۇسەمىن، كۇنگە قىزدىرىنامىن، ءتۇرلى تاعامدار دايىنداپ، كىتاپ وقيمىن. ءبىر كۇندىك دەمالىسىمدى تەك وزىمە ارنايمىن».

«ماركو پولو» ءفيلمىنىڭ ءتۇسىرىلىم الاڭىندا ناتاليا ءوزىنىڭ بولاشاق جارى مورنەنى كەزدەستىرگەن. ول وڭتۇستىك افريكانىڭ تۋماسى. قازىرگى ۋاقىتتا جاڭا زەلانديادا تۇرادى، ماماندىعى – ينجەنەر-ديزاينەر.

ناتاليا قازاقستاندى، الماتىنى ساعىنىپ جۇرگەنىن ايتادى. ول قازاقستاننىڭ بولگاريا سىندى بولعانىن قالايدى. «بولگاريادا كينونىڭ جالپى ىشكى ءونىمى 27 پايىزدى قۇرايدى. قازاقستاندا فيلم تۇسرىلىمىدەرى ءۇشىن ءوز لوكاسياسىن ساتۋعا بارىنشا مۇمكىندىك جاسالعان. ءبىز ءتۇرلى لوكاسيالاردى، ادەمى ولكەلەرىمىزدى ساتا الامىز، الايدا زاڭدىق تۇرعىدان بۇل قاراستىرىلماعان»، - دەيدى ناتاليا.

«ءۇيىمدى، ۇلتتىق تاعامداردى ساعىنامىن. الماتىعا كەلگەن سايىن ورتالىق بازارعا بارىپ قازى، جايا، شۇجىق ساتىپ الامىن. كورەيا سالاتتارىن دا جاقسى كورەمىن. ەشقانداي مەكەن الماتىما جەتپەيدى»، - دەپ ءسوزىن قورىتىندىلادى ناتاليا گوردەيەۆا.