الماتى قالاسى اكىمىنىڭ وكىمىمەن ءبىلىم باسقارماسىنىڭ، تىلدەردى دامىتۋ باسقارماسىنىڭ، جۇمىسپەن قامتۋ جانە الەۋمەتتىك باعدارلامالار باسقارماسىنىڭ، مادەنيەت جانە مۇراعاتتار باسقارماسىنىڭ جاڭا باسشىلارى تاعايىندالدى، دەپ حابارلايدى Qamshy.kz اقپارات اگەنتتىگى الماتى قالاسى اكىمدىگىنىڭ باسپا ءسوز قىزمەتىنە سىلتەمە جاساپ. 

الماتى قالاسى ءبىلىم باسقارماسىنىڭ باسشىسى بولىپ گۇلنار حودجابەرگەنوۆا بەكىتىلدى. ول ءوزىنىڭ پەداگوگتىق قىزمەتىن 1985 جىلى الماتى قالاسىنداعى س. شاكىروۆ اتىنداعى مەكتەپ-ينتەرناتتا باستاعان. ءتۇرلى جىلدارى قالانىڭ ءبىرقاتار مەكتەپتەرىندە ءمۇعالىم، ديرەكتوردىڭ ورىنباسارى، ديرەكتور، سونىمەن قاتار المالى، جەتىسۋ، اۋەزوۆ اۋداندارىندا ءبىلىم ءبولىمىنىڭ باسشىسى بولعان.

بۇرىن ءبىلىم باسقارماسىنىڭ باسشىسى بولعان راحات شيماشيەۆا ەندى الماتى قالاسى تىلدەردى دامىتۋ باسقارماسىنا جەتەكشىلىك ەتەدى. ءوز كەزەگىندە ماماي احەتوۆ قالا اكىمىنىڭ كەڭەسشىسى بولىپ تاعايىندالدى.

بۇلاردان وزگە، مادەنيەت جانە مۇراعاتتار باسقارماسىنىڭ باسشىسى دا اۋىستى. بۇگىنگى كۇنگە دەيىن حانزادا ەسەنوۆا قالالىق ءماسليحاتتىڭ دەپۋتاتى بولدى، ۇزاق جىلدار بويى ا. قاستەيەۆ اتىنداعى بەينەلەۋ ونەرى جانە تەحنيكالىق ديزاين مەكتەبىنىڭ ديرەكتورى قىزمەتىن اتقارعان.

بۇرىندارى جۇمىسپەن قامتۋ جانە الەۋمەتتىك باعدارلامالار باسقارماسىنىڭ، باسشىسى بولىپ مەيىرجان وتىنشييەۆ تاعايىندالعان ەدى. ول ءتۇرلى جىلدارى جۇمىسپەن قامتۋ جانە الەۋمەتتىك باعدارلامالار باسقارماسىندا باس مامان، ءبولىم باسشىسى بولىپ ىستەگەن، سوڭعى 3 جىلدا وسى باسقارما باسشىسىنىڭ ورىنباسارى بولعان.