پاۆلوداردا ورىس قولباسشىسى ميحايل كۋتۋزوۆ اتىنداعى كوشەگە قازاقستان پرەزيدەنتى نۇرسۇلتان نازاربايەۆ ەسىمىن بەرۋدى ۇسىندى. وبلىس اكىمدىگى باسپا ءسوز قىزمەتىنىڭ حابارلاۋىنشا، ۇسىنىستى 16 اقپان كۇنى پاۆلودار وبلىسىنىڭ اكىمى بولات باقاۋوۆتىڭ تۇرعىندارعا ەسەپ بەرۋ جيىنىندا قوعامدىق كەڭەس ءتوراعاسى، پاۆلوداردىڭ بۇرىنعى اكىمى الەكساندر ريۋمكين ءبىلدىردى. جەرگىلىكتى اقپاراتتىق سايتتاردىڭ حابارلاۋىنشا، كەزدەسۋ ەستاي اتىنداعى قالالىق مادەنيت ۇيىندە وتكەن، دەپ جازادى Qamshy.kz اقپارات اگەنتتىگى. 

- سوڭعى ۋاقىتتا قالامىزدىڭ كوركىن كىرگىزۋ ءۇشىن كوپ نارسە ىستەلدى، اسىرەسە كۋتۋزوۆ كوشەسى وزگەرتىلدى. قالانى كوركەيتۋگە كوڭىل ءبولىپ جاتقانىڭىز ءۇشىن كوپ راحمەت. الماتىدا فۋرمانوۆ اتىنداعى كوشەنىڭ اتىن وزگەرتتى. شىمكەنتتە دە مۇنداي ماسەلە كوتەرىلدى. پاۆلوداردا دا كورىكتى كوشەلەردىڭ بىرىنە قازاقستان پرەزيدەنتىنىڭ ەسىمى بەرىلۋى ءتيىس دەپ ويلايمىن، - دەدى الەكساندر ريۋمكين. وبلىس اكىمى بۇل ۇسىنىسقا ويلاناتىنىن ايتقان.

قازاقستاندا كوشە جانە نىسانعا نۇرسۇلتان نازاربايەۆتىڭ ەسىمى بۇعان دەيىن دە بەرىلگەن.

بىلتىر پاۆلوداردا جەرگىلىكتى تۇرعىندار اكىمگە لەنين كوشەسىن استانا دەپ وزگەرتۋدى ۇسىنعان. كەيبىر تۇرعىندار قالانىڭ ورتالىعىنداعى ۇلكەن كوشەلەردىڭ ءبىرى كۋتۋزوۆ كوشەسىن استانا دەپ اتاۋدى ۇسىنعان. ءبىراق قالالىق ءماسليحات اقىرىندا لەنين كوشەسىن استانا دەپ اتاۋدى قولداعان.

بىرەر كۇن بۇرىن ورالدا جاڭا سالىنعان الاڭعا نازاربايەۆتىڭ اتىن بەرۋ ۇسىنىسى ايتىلعانى حابارلانعان.

وتكەن ايدا وڭتۇستىك قازاقستان وبلىسى ءماسليحاتىنىڭ دەپۋتاتتارى شىمكەنتتەگى استانا الاڭىنىڭ اتىن پرەزيدەنت نۇرسۇلتان نازاربايەۆ اتىنداعى الاڭ دەپ وزگەرتۋ تۋرالى ۇسىنىستى قولداعانى حابارلانعان.

بىلتىر قاراشانىڭ سوڭىندا الماتىنىڭ ورتالىعىنداعى سوۆەت كەزەڭىنەن بەرى وزگەرتىلمەگەن فۋرمانوۆ كوشەسى نازاربايەۆ داڭعىلى دەپ وزگەرتىلگەن. نۇرسۇلتان نازاربايەۆ تۇڭعىش پرەزيدەنت كۇنى قارساڭىندا قابىلدانعان بۇل شەشىمدى «كوپتەگەن تۇرعىننان تۇسكەن ۇسىنىس» دەپ تۇسىندىرگەن.