امان عۇماروۆ جاقىندا كورەرمەنگە جول تارتقان «تار زامان» سەريالىندا مۇحتار اۋەزوۆتىڭ جاستىق شاعىن سومداعان. Qamshy.kz اقپارات اگەنتتىگىنىڭ تىلشىسىنە بەرگەن سۇحباتىندا اكتەر ءوز ءرولىنىڭ اۋىرتپالىعىن ايتتى. ونەر جولىنداعى وزگەشە تاعدىرىنان سىر شەرتتى. تەاتر، كينو سالاسىنداعى ارىپتەستەرىن دە اڭگىمەگە ارقاۋ ەتتى.
- سىزگە مۇحتار اۋەزوۆتىڭ ءرولى بەرىلگەندە قانداي سەزىمدە بولدىڭىز؟
- بىرىنشىدەن، ەلىمىزدى، جەرىمىزدى بۇگىنگى ۇرپاققا جەتكىزۋ ءۇشىن جان قيعان اتا-بابالارىمىزعا العىس ايتقىم كەلەدى. قانشاما باتىردىڭ توگىلگەن قانى – ءبىزدىڭ تاۋەلسىز ەلدە ءومىر ءسۇرىپ جاتقانىمىزعا بىردەن-بىر سەبەپ. ال وزدەرىڭىزگە بەلگىلى «تار زامان» ءفيلمى ازاتتىق جولىندا ارپالىسقان الاش ارىستارى جايىندا ءتۇسىرىلدى. سول زاماندا قازاق نەندەي كۇي كەشتى، قالاي كۇرەستى، قانداي زارداپ شەكتى – ءبارى قامتىلدى. ءبىر ايتا كەتەرلىگى، بۇل – الاش ارىستارى تۋرالى قازاقستانداعى تۇڭعىش فيلم.
ال مۇحتار اۋەزوۆتىڭ رولىنەن قاتتى قورىقتىم. شىنى كەرەك، ءالى دە قورقامىن. سەبەبى ول كىسى – بار قازاق ءۇشىن الىپ ادام، ايتۋلى تۇلعا. ءبىراق قانشا سەسكەنسەم دە، ۇلى جازۋشىنىڭ ءرولى ماعان بۇيىرعانىنا ريزا بولدىم. مارتەبەسىن دە، جاۋاپكەرشىلىگىن دە ءتۇسىندىم. وسىنداي مۇمكىندىك بەرگەن رەجيسسەر مۇرات بيدوسوۆقا العىسىم شەكسىز. مۇحتار اۋەزوۆ سىندى تۇلعانى ءرولىن سومداۋ – كەز كەلگەننىڭ باسىنا قونا بەرمەيتىن ۇلكەن ب ا ق.
- ءرولدى الىپ شىعا الدىڭىز با؟ كوڭىلىڭىز تولدى ما؟
- «كوڭىلىم تولدى، ءرولدى الىپ شىقتىم» دەپ ايتا المايمىن. باعانى حالىق بەرە جاتار. نەگىزى مۇحتار اۋەزوۆتى سومداۋىم ءۇشىن ءالى تالاي ءرولدى ساحنالاپ، بىرنەشە فيلمگە ءتۇسۋىم كەرەك. ءبىراق شامام كەلگەنشە تىرىستىم. بويىمدا بار تالانتىمدى وسى رولگە سالدىم. حالىق پەن جوعارى ينتەللەكت يەسى مۇحتار اۋەزوۆتىڭ اراسىنداعى لينيانى تابۋعا تالپىندىم. تىم اسىرەلەپ نەمەسە تىم ارزانداتىپ جىبەرۋدەن اۋلاق بولدىم. كەم-كەتىگى بولسا، حالىقتان كەشىرىم سۇرايمىن...
- بۇعان دەيىن قانداي فيلمدەرگە ءتۇستىڭىز؟
- ەڭ ۇلكەن جوبانىڭ ءبىرى – رەجيسسەر اسقار ۇزابايەۆ تۇسىرگەن «سۇيە بىلسەڭ» سەريالىندا جاس بالانىڭ رولىندە وينادىم. سەريالدىڭ ەكى ماۋسىمىنا دا ءتۇستىم. وندا بۇگىنگى زاماننىڭ جاستارى، سولاردىڭ ءومىرى، ماحابباتى، قالاۋى بەينەلەنەدى. حالىقتىڭ كوڭىلىنەن شىققان تۋىندى بولدى. بۇدان بولەك، جاقىندا عانا كورەرمەنگە جول تارتقان «كلاسستاستار» فيلمىندە ايدوس دەگەن بالانىڭ بەينەسىن سومدادىم. وزدەرىڭىزگە بەلگىلى، ول – كومەديا. جالپى وسى ۋاقىتقا دەيىن ماعان جاس، ەركە بالالاردىڭ ءرولى بۇيىرعان ەكەن.
- قانداي ءرولدى ارماندايسىز؟
- تابيعاتىم – ليريكا. دەگەنمەن، مەنىڭشە، اكتەر كەز كەلگەن رولگە يكەمدى بولۋى كەرەك. كومەديا، تراگەديا دەپ تالعاماي، ءبارىن الىپ شىعا الاتىن تالانت قاجەت. سول ءۇشىن ءوزىم دە ەڭبەكتەنىپ كەلەمىن. ءوزىمدى كورسەتىپ، بيىككە باستايتىن رولدەرىم ءالى كوپ.
جالپى ماحاببات ساحناسىندا ەرەكشە ليريكتى ويناعىم كەلەدى. اكتەرلىك قابىلەتىمدى ايشىقتاي تۇسەتىن پسيحولوگيالىق رولدەردى دە سومداپ، باعىمدى سىناپ كورسەم دەيمىن.
- جانىڭىزعا ليريكاعا جاقىن بولسا، ولەڭ شىعاراتىن قابىلەتىڭىز بار شىعار؟
- شىعارامىن، ءبىراق ءوزىم ءۇشىن. اقىن ەمەسپىن.
- العاش تەاتردا وينادىڭىز با، الدە كينودا ما؟
- تەاتردىڭ ورنى مەن ءۇشىن بولەك. ونىڭ ساحناسى، اۋراسى ادامعا ەرەكشە دەم بەرەدى. سەزە الاتىن جان ءۇشىن كيەسى بار. ءوزىم تەمىربەك جۇرگەنوۆ اتىنداعى ونەر اكادەمياسىنىڭ تۇلەگىمىن. تەاترادعى العاشقى قادامىم – عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى بولدى. كەيىن ايگۇل يمانبايەۆا اشقان ا.ي. تەاترىندا جۇمىس ىستەدىم. ءقازىر «استانا ميۋزيكل» تەاترىن ا.ي.-مەن قاتار الىپ ءجۇرمىن. العاش تەاترعا قادام باستىم، تەاترعا عاشىق بولدىم، ءسۇيدىم، وعان ءومىرىمدى ارناۋعا بارمىن. ال جالپى تەاتر دا، كينو دا جانىما جاقىن، ەكەۋىن ءبولىپ-جارمايمىن.
- ءوزىڭىز ايتقان ايگۇل يمانبايەۆا قاتارداعى اكتريسا بولىپ ءجۇرىپ، جەكەمەنشىك ا.ي. تەاترىن قۇردى. سول سەكىلدى ازامات ساتىبالدى دا تەاتر اشىپ الدى. سىزدە ونداي جوسپار بار ما؟
- بولاشاقتىڭ ەنشىسىندە. ولار جەكە تەاترىن وزدەرىنىڭ ادال ەڭبەگىمەن اشتى. قازاقتىڭ ونەرىنە جانى اشيتىن نار تۇلعالار دەپ تانيمىن. نەگە اشپاسقا؟ قايتا تەاتر كوبەيسە، ەلىمىزدىڭ مادەنيەتى ارتار ەدى.
ال ءوزىم تەاتر اشام دەپ سىزگە ۋادە بەرمەي-اق قويايىن. دەگەنمەن، جاسىرىپ قايتەيىن، ارمانىم بار. ءبىراق تەاتر اشۋ ءۇشىن تالاي ەڭبەكتەنىپ، سول كىسىلەردىڭ دارەجەسىنە جەتۋىم كەرەك.
- اكتەر ءوز رولىنە قالاي دايىندالادى؟
- اكتەر ءوز رولىنە ءار سەكۋند سايىن دايىندالادى. ماسەلەن، مەن سىزبەن سۇحباتتاسىپ وتىرىپ، ءوز ءرولىمدى ويلاپ وتىرمىن. ءرول – ادامنىڭ كيىمى سەكىلدى بولۋى كەرەك. «ۇيقىڭنان تۇر» دەگەندە كيىمىڭدى كيىپ الىپ، رولگە كىرىپ كەتۋىڭ كەرەك. ءرول ادامعا وڭاي كەلمەيدى، اسپاننان تۇسە سالمايدى. كيەسىن تۇسىنە بىلگەن جان جوعارى دەڭگەيدە سومدايدى. ارينە، ءوزىم دە كەز كەلگەن ءرولدى الىپ شىعۋعا تىرىسامىن.
«رومەو – دجۋلەتتا» قويىلىمىندا ماعان بەرىلگەن مەركۋسيونىڭ ءرولى مەن ءۇشىن ۇلكەن تاجىريبە بولدى. مەركۋسيو مەنىڭ دوسىم دا، سىرلاسىم دا، مۇڭداسىم دا بولا الدى. مەركۋسيودا تەمپەرامەنت بولۋ كەرەك، ول مىنەزدى، ەركىندىكتى قاجەت ەتەدى. ءار رولدەن وزىمە ۇقسايتىن جانە ۇقسامايتىن قاسيەتتەرىن ىزدەيمىن. سودان ءبىر ءتۇيىن جاسايمىن. ال رولگە كىرە الماي جاتقان جاعدايدا اعا-اپكەلەرىممەن اقىلداسامىن. تابيعاتقا شىعىپ، ميىمدى تىنىقتىرامىن، مۋزىكا تىڭداپ، ءتۇرلى جانردا فيلمدەر كورەمىن.
- ءرول اكتەردى تاربيەلەي مە؟
- جاڭا ايتىپ ءوتتىم عوي، مەركۋسيو سىرلاسىم بولدى. وزىمە قارسى تۇستارىندا «نەگە بۇلاي ىستەدى، نەگە ولاي ايتتى؟» دەپ ويعا باتامىن. ءار اكتەر ءوز ءرولىن اقتاپ الۋى ءتيىس. مەن دە جاقسى جاعىنان كورسەتۋگە تىرىسامىن. وزىڭە تيەسىلى رولدەگى كەيىپكەردىڭ جان دۇنيەسىن ءتۇسىنىپ الامىن. قارسى شىعاتىن تۇستارىم دا كوپ بولادى.
--ونەر ءۇشىن وبرازىڭىزدى وزگەرتۋگە دايىنسىز با؟
- ءيا، دايىنمىن. بۇعان دەيىن مەنىڭ شاشىم ۇزىن بولعان. مۇحتار اۋەزوۆتىڭ ءرولى ءۇشىن ۇزىن شاشىمدى بۇيرالادىم. «كلاسستاستار» ءفيلمى ءۇشىن شاشىمدى قيدىم. قىسقاسى، رەجيسسەر مەنەن قانداي وبراز كورگىسى كەلسە، مەن سوعان قاراي يىلەمىن.
- اكتەر ومىردە نەنى قۇربان ەتەدى؟
- ءبىر اكتەر بولعان. بىر-ەكى ساعاتتان كەيىن تەاتردا قويىلىمى بار، سول ساتتە وعان سۋىق حابار كەلەدى. جاقىن باۋىرىنان ايىرىلعان. ءبىراق اكتەر قويىلىمدى ۇزبەي، ءوز ءرولىن ويناپ شىقتى. ءتىپتى، قايعىلى ءحالىن حالىققا بىلدىرگەن جوق. جاقىنى ومىردەن ءوتىپ كەتسە دە، جانازاسىنا بارا المادى. ارينە، مۇنداي جاعدايلار بولماي-اق قويسىن، دەگەنمەن مەن ءۇشىن ونداي كىسىلەر ۇلكەن قۇرمەتكە لايىق.
- ءوزىڭىز ءۇشىن ونەردىڭ ورنى قانداي؟
- ونەر جولى جەكە ومىرىمە كەدەرگى كەلتىرەدى. ونى جاسىرمايمىن. الايدا شامام كەلگەنشە ءبارىن قامتۋعا تىرىسامىن. ونەر – مەنىڭ بالام، مەنىڭ سۇيگەنىم، بارىم دا، نارىم دا. سول سەبەپتى ءبىرىنشى ورىندا. اتام كۇيشى، اقىن بولعان. بقو-داعى جاڭاقالا اۋدانى قىزىلوبا اۋىلىنىڭ تۋماسى. ونەر ماعان قاننان دارىعان شىعار دەپ ويلايمىن. سونىمەن قاتار اعام وماروۆ سامير ءان ايتۋعا، دومبىرا تارتۋعا باۋلىدى. سول كىسىنىڭ ارقاسىندا ءتۇرلى بايقاۋلارعا قاتىستىم. ءسويتىپ ءجۇرىپ ارمان قۋىپ الماتىعا كەلدىم دە، ونەر اكادەمياسىنا قۇجات تاپسىردىم. نەگىزى ءانشى بولامىن دەپ ويلاعانمىن، ءبىراق ۇستازىم، جەتەكشىم اسحات ماەميروۆ قولىمنان جەتەكتەپ اپارىپ، اكتەر ماماندىعىنا ءتۇسىردى.
- ەگەر قولىڭىزعا بيلىك تيسە، ءوز سالاڭىزدا نەنى وزگەرتەر ەدىڭىز؟
- ءبىر مىسال ايتايىن، وپەرا قازاقتىڭ ءتول تۋىندىسى ەمەس. ءبىراق دامىدى، اۋىز تولتىرىپ ايتارلىقتاي وپەرا انشىلەرىمىز جەتكىلىكتى. «انانى وزگەرتۋ كەرەك، مىناۋ قاتە» دەپ كوڭىلىڭ تولماي، حالىققا مۇڭ شاققاننان گورى ارەكەت ەتكەن دۇرىس. ءار ادام ءوزىن دامىتسا، ەل دە داميدى.
- اڭگىمەڭىزگە راقمەت!
