يتالياندىق «Iveco» كومپانياسى الماتى باعىتتارىندا گازبەن جۇرەتىن اۆتوبۋستاردى كورسەتتى. بۇل تومەن ەدەندى اۆتوبۋس، ۇزىندىعى 12 مەتر، كونديسيونەرمەن، پاندۋسپەن، ۆيدەوكامەرامەن جابدىقتالعان، سىيىمدىلىعى 100 جولاۋشىعا دەيىن.

قالانىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت يساحوۆ گازبەن جۇرەتىن اۆتوبۋس ءۇش اي بويىنا «قازاقستان» قوناق ۇيىنەن «مەدەۋ» مۇز ايدىنىنا دەيىن باراتىن №12 باعىتقا قىزمەت كورسەتەتىنىن ايتتى.

«اتالعان ماركالى اۆتوبۋستار الەمدىك نارىقتا وزدەرىن جاقسى قىرىنان كورسەتتى، دەگەنمەن ءبىز ونى الماتى جاعدايىندا تەكسەرىپ كورەمىز، سوندىقتان جۇكتەمەنى انىقتاۋ ءۇشىن وسى باعىت تاڭداپ الىندى. الماتى اكىمىنىڭ تاپسىرماسى بويىنشا قالادا كولىك رەفورماسى اياسىندا گازبەن جۇرەتىن اۆتوبۋستارعا قاتىستى قاجەتتى ينفراقۇرىلىم جاسالۋدا، جۇيەنىڭ اشىقتىعى قامتاماسىز ەتىلگەن، الاتاۋ اۋدانىندا 200 اۆتوبۋسقا ارنالعان اۆتوپارك قۇرىلىسى جۇرۋدە، سوندىقتان وندىرۋشىلەر قىزىعۋشىلىق تانىتۋدا. باعاسىنا، ساپاسىنا قاتىستى بارلىق مالىمەتتەر جينالعان سوڭ تاسىمالداۋشىلار بەلگىگى ماركالى اۆتوبۋستاردى الاتىن بولادى»، - دەدى ول.

«CNH Industrial» وڭىرلىك مەنەدجەرى روبەرتو بونزو اۆتوبۋستىڭ الماتىعا ەۋروپادان اكەلىنگەنىن جانە بارلىق جوعارى ساپالى ستاندارتتارعا ساي ەكەنىن اتاپ ءوتتى.

«ەگەر الماتى تاسىمالداۋشىلارى ءبىزدىڭ ماركانى قالاسا، قوستاناي قالاسىنداعى زاۋىتتا جاسالىپ، قۇراستىرىلاتىن وتاندىق اۆتوبۋستاردى ۇسىنامىز. مۇندا تيىسىنشە ۇتىمدى باعا مەن شارتتى جاعدايلار دا بولادى»، - دەدى «سارىاركااۆتوپروم» ءجشس-تىڭ باسقارۋشى ديرەكتورى ورۋدج نازاروۆ.

ەسكە سالساق، №12 باعىتىندا گازبەن جۇرەتىن «Mercedes-Benz» ماركالى اۆتوبۋس دا تەستەن وتۋدە.