قازاقستاننىڭ سىرتقى ىستەر ءمينيسترى قايرات ءابدىراحمانوۆ تۇركياعا جاساعان رەسمي ساپارى بارىسىندا وسى ەلدىڭ مەملەكەت باسشىسى رەجەپ تايىپ ەردوعاننىڭ قابىلداۋىندا بولدى. بۇل جايىندا 24.kz حابارلادى.

ەكىجاقتى كەزدەسۋدە سىرتقى ىستەر ۆەدومستۆو جەتەكشىسى تۇركيا پرەزيدەنتىنە ەلباسىنىڭ سالەمى مەن يگى تىلەكتەرىن جەتكىزدى. ءوز سوزىندە تايىپ ەردوعان قازاقستان كوشباسشىسىنىڭ الداعى ۋاقىتتا تۇرىك ەلىنە جوسپارلانعان ساپارى اياسىندا ءبىرقاتار ەكونوميكالىق كەلىسىمشارتقا قول قويىلاتىنىن اتاپ ءوتتى.

تاراپتار كولىك، اۋىلشارۋاشىلىعى، كىشى جانە ورتا بيزنەس پەن تۋريزم سالالارىندا ىنتىماقتاستىقتىڭ كوكجيەگىن كەڭەيتۋگە نيەت تانىتىپ وتىر. باسقوسۋدا حالىقارالىق جانە ايماقتاعى وزەكتى ماسەلەلەر دە نازاردان تىس قالمادى. قوس مەملەكەت شام ەلىندەگى شيەلەنىستى شەشۋدە استانا پروسەسىنىڭ ءرولىن ءبىراۋىزدان جوعارى باعالايتىنىن ايتىپ، بۇل باعىتتاعى كەلەلى كەلىسسوز جالعاسا بەرەدى دەپ سەندىردى.

سونىمەن قاتار قايرات ءابدىراحمانوۆ تۇركيا ۇلى ۇلتتىق ءماجىلىسىنىڭ ءتوراعاسى يسمايىل كاحرامانمەن دە كەزدەستى. وتىرىستا تاراپتار پارلامەنتارالىق بايلانىستاردى نىعايتۋ ماسەلەلەرىن تالقىلادى. سىرتقى ىستەر ءمينيسترى قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىنا جانە ەلىمىزدىڭ حالىقارالىق باستامالارىنا قولداۋ بىلدىرگەنى ءۇشىن تۇرىك ۇكىمەتى مەن ءماجىلىس ءتوراعاسىنا العىسىن ءبىلدىردى.