بۇگىن 23 تامىز قازاقستاننىڭ ساياسي تاريحىندا جاڭا كەزەڭ باستالدى. ەلىمىزدە قۇرىلتاي دەپۋتاتتارىنىڭ العاشقى سايلاۋى ءوتىپ جاتىر. بۇل – جاڭا مەملەكەتتىك قۇرىلىم اياسىندا زاڭ شىعارۋ بيلىگىن جۇزەگە اسىراتىن ءبىر پالاتالى جوعارى وكىلدى ورگاندى قالىپتاستىرۋعا باعىتتالعان العاشقى سايلاۋ.
بۇگىن ءبىز الماتى قالاسىنداعى سايلاۋ ۋچاسكەلەرىنىڭ بىرىنە بارىپ، تۇرعىنداردىڭ قۇرىلتاي دەپۋتاتتارىن سايلاۋعا قاتىسىپ، ءوز تاڭداۋىن جاساعان ساتىنە كۋا بولدىق. قالانىڭ قاق ورتاسىندا، ۇلتتىق كىتاپحانا عيماراتىندا ورنالاسقان سايلاۋ ۋچاسكەسىندە دە ازاماتتاردىڭ قاراسى قالىڭ، ءبارى بەلسەندى تۇردە داۋىس بەرۋ راسىمىنە قاتىسىپ جاتىر.
قۇرىلتاي قۇرامىنا پارتيالىق ءتىزىم بويىنشا 145 دەپۋتات بەس جىل مەرزىمگە سايلانادى. سايلاۋعا جەتى ساياسي پارتيا قاتىسۋدا. ولار:
- «ادىلەت» پارتياسى
- جالپىۇلتتىق سوسيال-دەموكراتيالىق پارتياسى
- قازاقستاننىڭ «بايتاق» جاسىلدار پارتياسى
- «قازاقستان حالىق پارتياسى»
- «اۋىل» پارتياسى
- «اق جول» قازاقستاننىڭ دەموكراتيالىق پارتياسى
- «Respublica» پارتياسى.
ايتا كەتەيىك، ورتالىق سايلاۋ كوميسسياسىنىڭ ساعات 10:00-دەگى الدىن الا دەرەكتەرى بويىنشا، ەلىمىز بويىنشا داۋىس بەرۋ قۇقىعى بار ازاماتتاردىڭ 17،96%-ى ءوز تاڭداۋىن جاساپ ۇلگەردى.
رەسپۋبليكالىق ستاتيستيكا مالىمەتتەرى (قازىرگى اقپارات):
سايلاۋشىلاردىڭ جالپى سانى: 12 605 788 ادام.
داۋىس بەرۋگە قاتىسقاندار: 2 264 411 ازامات.
وڭىرلەر اراسىنداعى بەلسەندىلىككە توقتالساق، تاڭعى ساعاتتاردا قىزىلوردا وبلىسى (22،91%)، قاراعاندى وبلىسى (21،06%) جانە جەتىسۋ وبلىسى (20،87%) كوش باستاپ تۇر. ال مەگاپوليستەر اراسىندا الماتى قالاسى (9،96%) ازىرگە باسەڭدەۋ كورسەتكىش كورسەتىپ تۇر.
ەسكە سالا كەتەيىك، ەلىمىزدىڭ بارلىق سايلاۋ ۋچاسكەلەرىندە داۋىس بەرۋ پروسەسى كەشكى ساعات 20:00-گە دەيىن جالعاسادى.
