الماتى وبلىسىندا 2025 جىلدان بەرى 3181 پاتەر ساتىپ الىنىپ، وسى ۋاقىتقا دەيىن ونىڭ 2536-سى الەۋمەتتىك وسال توپ ساناتىنا جاتاتىن ازاماتتارعا ۇلەستىرىلدى. ودان بولەك جىل سوڭىنا دەيىن تاعى 645 پاتەر كىلتى تابىستالادى. اتالعان باسپانالاردىڭ بارلىعى كوپبالالى انالارعا، قامقورشىسىنان نەمەسە اتا-اناسىنان ايىرىلعان جاندارعا جانە ەرەكشە قاجەتتىلىگى بار ازاماتتارعا بەرىلەدى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

بۇگىن وڭىردە 54 وتباسى باسپانا باقىتىنا كەنەلدى. كىلت تابىستاۋ ءراسىمىنىڭ ءبىرى تالعار اۋدانىنىڭ تۇزدىباستاۋ اۋىلىندا ءوتتى. بۇل شاراعا الماتى وبلىسىنىڭ اكىمى مارات سۇلتانعازييەۆ ارنايى بارىپ، تۇرعىندار قۋانىشىنا ورتاقتاستى. سونداي-اق 21 وتباسىعا سۋجاڭا پاتەر كىلتىن تارتۋ ەتتى.
ءوڭىر باسشىسى ءوز سوزىندە ازاماتتاردى باسپانامەن قامتاماسىز ەتۋ مەملەكەتتىك ساياساتتىڭ باستى باعىتتارىنىڭ ءبىرى ەكەنىن اتاپ ءوتتى. مارات ەلەۋسىز ۇلىنىڭ سوزىنشە، بۇگىندە وڭىردە پاتەر كەزەگىندە تۇرعان 74 839 ازامات بار. ونىڭ ىشىندە تالعار اۋدانى بويىنشا 10 مىڭعا جۋىق ادام تىركەلگەن. سوڭعى ەكى جىلدا تالعار اۋدانىندا 459 پاتەر ساتىپ الىنعان. ونىڭ 252ء-سى ءوز يەلەرىنە بەرىلدى. ال بۇگىن 21 وتباسى باسپانالى بولدى.

«مەملەكەت باسشىسى قاسىم-جومارت توقايەۆ حالىقتىڭ ءال-اۋقاتىن ارتتىرۋ، ازاماتتارعا جايلى ءومىر سۇرۋگە جاعداي جاساۋ مەملەكەتتىڭ باستى مىندەتتەرىنىڭ ءبىرى ەكەنىن ۇنەمى ايتىپ كەلەدى. ونىڭ ىشىندە باسپانا ماسەلەسى دە ماڭىزدى ورىن الادى.
تۇرعىن ءۇي كەزەگىندە تۇرعان ازاماتتاردىڭ ماسەلەسى ءاردايىم نازارىمىزدا. الداعى كەزەڭدە دە بۇل باعىتتاعى جۇمىستى جۇيەلى تۇردە جالعاستىرىپ، تۇرعىن ءۇي قورىن ۇلعايتۋعا باسىمدىق بەرەمىز. «ءۇيى باردىڭ – كۇيى بار» دەيدى دانا حالقىمىز. ءار وتباسىنىڭ ءوز شاڭىراعى، ءوز ءۇيى بولعانى – ەلدىڭ ءال-اۋقاتىنىڭ جاقسارعانىنىڭ ءبىر كورسەتكىشى ەكەنى انىق»، – دەدى ايماق باسشىسى.
باسپانالى بولعان تۇرعىنداردىڭ ءبىرى – 6 بالانىڭ اناسى گۇلميرا قۇدايبەرگەنوۆا. «2012 جىلدان بەرى ءۇي كەزەگىندە تۇرىپ، بۇگىن ءۇش بولمەلى پاتەرگە قول جەتكىزدىم. التى پەرزەنتىم بار. ءبىر بالام ەرەكشە بولىپ دۇنيەگە كەلدى. جاڭا پاتەرىمىز كوڭىلىمىزدەن شىقتى. ءىشى كەڭ، جارىق ءارى جايلى. باسپانالى بولاتىنىمدى العاش ەستىگەندە سەنەر-سەنبەسىمدى بىلمەدىم. قاتتى تولقىدىم. بالالارىمنىڭ دا قۋانىشىندا شەك جوق. وسىنداي مۇمكىندىك سىيلاعان جاندارعا العىس ايتامىن»، – دەدى تۇرعىن.

ايتا كەتەيىك، بۇگىن وبلىستىڭ وزگە اۋداندارىنداعى تۇرعىندار دا قونىس تويىن تويلادى. ماسەلەن، قاراساي اۋدانىندا 20، ىلە اۋدانىندا 13 ازامات پاتەر يەسى اتاندى. بۇل باعىتتاعى جۇمىستار الداعى ۋاقىتتا دا جالعاسىن تابادى.