جۇمىس ساپارى بارىسىندا الماتى اكىمى باۋىرجان بايبەك قازاقستاندىق ىسكەرلىك سەرىكتەستىك ورتالىعى «اتاكەنت» پەن ونىڭ اينالاسىن ارالاپ كوردى. مەگاپوليس باسشىسى باسقارۋشى كومپانيانىڭ ايماقتى دامىتۋ جونىندەگى مىندەتتى ورىنداماعانى ءۇشىن ءتيىستى باسقارمالارعا جالعا بەرۋ كەلىسىمىن بۇزۋ جانە جەردى قالانىڭ كوممۋنالدىق مەنشىگىنە قايتارۋ تۋرالى ماسەلە كوتەرۋدى تاپسىردى.
«كەزىندە «اتاكەنت» اينالاسى جاسىل جەلەككە ورانىپ، مۇندا ادامدار وتباسىمەن سەرۋەندەۋگە كەلەتىن، بۇرىن كاسكادتى سۋبۇرقاق بار ەدى، ال ءقازىر ونىڭ ءبارىن اسفالتتاپ، كولىك تۇراعى مەن بازارعا اينالدىرعان. باسقارۋشى كومپانيا وسى اۋماقتتى دامىتۋ جونىندە قالالىقتارعا ۇلكەن ۋادە بەرىپ ەدى، الايدا، كورىپ وتىرعانىمىزداي سوڭعى جىلدارى ەشتەڭە اتقارىلماعان»، - دەدى باۋىرجان بايبەك.
الماتى اكىمى كەشەن اينالاسىنداعى اسفالتتى جەردى ازايتۋدى، جاسىلداندىرۋدى، گازوندارعا ورنالاسقان ءتۇرلى كونسترۋكسيالار مەن قۇرىلىستاردى الىپ تاستاۋدى، اعاش وتىرعىزۋدى، ورىندىقتار مەن ۋرنالار جانە باسقالارىن قويۋدى تاپسىردى. بۇلاردان وزگە، جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن ورتالىق كىرەبەرىستەگى كولىك تۇراعى الىنادى جانە ءقىسو «اتاكەنت» اۋماعىنا كولىكتىڭ كىرۋىنە تىيىم سالىنادى.
جۇمىس ساپارى اياسىندا باۋىرجان بايبەك تيميريازيەۆ جانە اۋەزوۆ كوشەلەرىن اباتتاندىرۋ بويىنشا ءبىرقاتار تاپسىرمالار بەردى.
پىكىر قالدىرۋ