بيىلعى جىلى مەگاپوليستە «الماتىنى دامىتۋدىڭ 50 جوبا- درايۆەرلەرى» باعدارلاماسى اياسىندا ءبىرقاتار ءىرى ءوندىرىس نىساندارىن سالۋ جوسپارلانۋدا. الماتى اكىمى باۋىرجان بايبەك الاتاۋ اۋدانىنداعى يندۋستريالدى ايماقتىڭ ينفراقۇرىلىمدارىنىڭ قۇرىلىسىن تەكسەردى، مۇندا قۇرىلىس، فارماسيەۆتيكا، حيميا، تاماق جانە جەڭىل ونەركاسىپ سالالارىنىڭ 40-تان استام وتاندىق جانە شەتەلدىك جوبالار جۇزەگە اسۋدا.

جۇمىس ساپارى بارىسىندا باۋىرجان بايبەك ەڭ الدىمەن مۇناي، گاز، سۋ جانە مۇناي ونىمدەرىن تاسىمالدايتىن ۇلكەن ديامەترلى بولات قۇبىرلارىن شىعاراتىن ەلىمىزدەگى العاشقى جوعارىتەحنولوگيالى زاۋىتتىڭ قۇرىلىس الاڭىندا بولدى. قازاقستاندىق- قىتايلىق «Asia Steel Pipe Company» كاسىپورنىنىڭ ىسكە قوسىلۋى قازاقستانعا سىرتتان اكەلىنەتىن قۇبىر ونمىدەرىنىڭ 60%-ىن قامتاماسىز ەتەدى.

الماتى اكىمى كابەل جەلىلەرىن شىعاراتىن رەسەيلىك كومپانيانىڭ «كمك Investment» زاۋىتىنىڭ، جاپونيادان تىس جەردە بالاماسى جوق ينجەنەرلىك جەلىلەردىڭ قاۋىپسىزدىگىن قامتاماسىز ەتەتىن «Tokyo Rope Almaty» زاۋىتىنىڭ قۇرىلىس قارقىنىمەن تانىستى.

ءدال وسى كۇنى باۋىرجان بايبەك وندىرىستىك قۋاتى قالانىڭ قالدىقتارىن تولىق وڭدەيتىن قالدىق سۇرىپتايتىن كەشەندى ارالاپ كوردى.

جوبانى جۇزەگە اسىرۋ بارىسىندا تقق جينايتىن، تاسىمالدايتىن، سۇرىپتايتىن باسقارۋ كەشەنىن ەنگىزۋ جوسپارلانعان. بۇل ءوز كەزەگىندە اينالا قورشاعان ورتاداعى ەكولوگيالىق جۇكتەمەنى ازايتادى.

جۇمىس ساپارى بارىسىندا قالا باسشىسى 200 جولاۋشى اۆتوبۋسىنا ەسەپتەلگەن №3 كوممۋنالدى اۆتوبۋس پاركىنىڭ قۇرىلىسىمەن دە تانىستى.

جاڭا اۆتوبۋس پاركى بىرمەزەتتە 10 اۆتوبۋسقا قىزمەت كورسەتەتىن گاز قوندىرعىلارىمەن جابدىقتالادى. اۆتوبۋس پاركىندە تەحنيكالىق قىزمەت كورسەتۋ، كولىكتى جۋۋ، جۇرگىزۋشىلەر تىنىعىپ، ۇيىقتايتىن اكىمشىلىك- تۇرمىستىق بلوك نىساندارىن سالۋ قاراستىرىلعان.