بۇگىن وڭتۇستىك قازاقستان وبلىسىندا كامەلەت جاسىنا تولماعان ەكى ۇلىنىڭ كوزىنشە ايەلىن باۋىزداپ ولتىرگەن تۇرعىنعا قاتىستى سوت ۇكىمى  شىقتى. وبلىستىق قىلمىستىق ىستەر جونىندەگى مامانداندىرىعان اۋدانارالىق سوتى تۇركىستان قالاسىنىڭ 35 جاستاعى تۇرعىنىن 15 جىلعا باس بوستاندىعىنان ايىردى، دەپ حابارلايدى  قازاقپارات ءتىلشىسى.

وسى ءىستى قاراعان سۋديا داۋرەن مادالييەۆتىڭ ايتۋىنشا، اۋىر قىلمىس وتكەن جىلدىڭ 31ء-شى جەلتوقسان كۇنى تۇركىستان قالاسىندا بولعان. ايىپتالۋشى مەن ونىڭ ايەلى التى جىلداي وتانداسقان، زاڭدى نەكەدە تۇرعان. وسى ۋاقىت ارالىعىندا ولار ەكى بالالى بولادى. ءقازىر بالالارىنىڭ ۇلكەنى 10، كىشىسى 6 جاستا.

— ەرلى-زايىپتىلار بىرگە تۇرعان جىلدارى كوپ ۇرىسىپ، كۇيەۋى ايەلىن ۇرىپ-سوعىپتى. مۇنداي ازاپقا توزبەگەن ايەلى 2016 جىلى اجىراسقان. بالالارىن وزىمەن بىرگە الىپ كەتەدى. ال، قىلمىس بولعان كۇنى جابىرلەنۋشى كەلىنشەك ەكى بالاسىمەن مەشىتتىڭ جانىندا كەتىپ بارا جاتادى. ولاردىڭ جانىنا كۇيەۋى كەلىپ، ايەلىن ۇيىنە قايتارماقشى بولعان. ءبىراق وعان كەلىنشەگى قارسىلىق ءبىلدىرىپ، بارمايتىنىن ايتقان. ەكەۋى تاعى دا ۇرىسىپ قالادى. اشۋعا بۋلىققان كۇيەۋى جۇبايىنىڭ باسىن تاسپەن ۇرادى، ايەل قولىنداعى التى جاسار ۇلىمەن بىرگە جەرگە قۇلاپ تۇسكەن. وسى كەزدە ۇلكەن ۇلى سول ماڭداعى دۇكەنگە بارىپ، كومەك شاقىرۋعا بارماق بولادى. جولدا بارا جاتقاندا اناسىنىڭ داۋىسى شىقپاي قالىپتى. ارتىنا قاراسا اكەسى اناسىن باۋىزداپ تاستاعانىن كورگەن،- دەيدى سۋديا. 

وكىنىشتىسى سول، انالارى كوزدەرىنشە ولگەن ەكى جەتكىنشەك وسى جاعدايدان كەيىن پسيحولوگيالىق تۇرعىدا اۋىر جاراقات العان. ەكەۋى دە ءقازىر پسيحيكالىق زاقىم كەلۋىنە بايلانىستى ەسەپكە تۇرعىزىلعان. ءتيىستى ەم قابىلداۋدا. ال، 30-دان ەندى عانا اسقان ايەلىن دە، پەرزەنتتەرىن دە اياماعان تۇرعىنعا سوت اۋىر جازا تاعايىندادى. ول سوت وتىرىسى كەزىندە قىلمىسىن تولىق مويىندايتىنىن، جاساعان ىسىنە وكىنەتىنىن ايتقانىمەن جازاسى جەڭىلدەمەدى.

بار بولعانى كەلىنشەگىن ءسوز قايتارعانى ءۇشىن باۋىزداعان ايىپتالۋشىنى سوت قىلمىستىق كودەكستىڭ 99-بابى 2-بولىگى 5-تارماعىمەن كىنالى دەپ تاۋىپ،  15 جىلعا باس بوستاندىعىنان ايىردى. ول جازاسىن قىلمىستىق اتقارۋ جۇيەسىنىڭ بارىنشا جوعارى قاۋىپسىزدىك مەكەمەسىندە وتەۋدى بەلگىلەدى.