كۇن سايىنعى جۇمىس ساپارى بارىسىندا الماتى اكىمى باۋىرجان بايبەك تۇركسىب اۋدانىنىڭ اۋلالارى مەن كوشەلەرىن اباتتاندىرۋ جونىندە ءبىرقاتار تاپسىرمالار بەردى، سونىمەن قاتار «الماتى-1» تەمىرجول ۆوكزالى مەن ونىڭ اينالاسىن ارالاپ كوردى. مەگاپوليس باسشىسى اتالعان اۋدان قالاداعى بۇرىنعى ەلدى مەكەندەردىڭ ءبىرى ءارى مۇنداعىلاردىڭ باسىم بولىگى جەكە سكەتور ەكەنىن، سوندىقتان زاماناۋي ستاندارتتاردىڭ بارلىعىنا جاۋاپ بەرەتىن جاڭا ورتالىق قالىپتاستىرۋ قاجەت ەكەنىن اتاپ ءوتتى.

«جۇرگىنشىلەر ءۇشىن جايلى جاعداي تەك قالا ورتالىعىندا عانا بولۋى ءتيىس ەمەس. ورتالىقتاندىرۋ قاعيداسى بويىنشا قالانىڭ بارلىق اۋداندارىندا ءبىز تۇرعىندار ءۇشىن كوشەلەر مەن اۋلالاردى، جۇرگىنشى كەڭىستىكتەرىن جاڭارتىپ، جاسىل جەلەكتى كەڭەيتەمىز، پاركتەر مەن سكۆەرلەردى تارتىمدى ەتەمىز. جۇرگىنشىلەر جۇرەتىن تروتۋارلاردى باسىپ قالعان زاڭسىز قۇرىلىستاردى انىقتاۋ ءۇشىن جەكە جۇمىستار جۇرۋدە»،- دەدى ارالاۋ كەزىندە باۋىرجان بايبەك.

مىسالى، جىل اياعىنا دەيىن تۇركسىب اۋدانىندا جوندەلگەن 80 اۋلادان وزگە تاعى دا 50 اۋلا جاڭارادى.مودەرنيزاسيا اياسىندا جارىق كوزدەرى اۋىستىرىلادى، سپورت جانە بالا الاڭدارى پايدا بولادى، جولدار جوندەلەدى.

بيىلعى جىلى ەكى جەر استى جولى كۇردەلى جوندەلەدى جانە توعىز كوشە جاڭارادى. ەرجانوۆ كوشەسىنىڭ شىعىسىن جانە تىنىشبايەۆ كوشەسىنىڭ وڭتۇستىگىن الىپ جاتقان «دەتسكيي-بالالار» ساياباعىنداعى بالالار جانە سپورت الاڭدارى كەڭەيەدى، جاسىل جەلەك قورى ۇلعايىپ، سۋارۋ جۇيەسى ورناتىلادى. بۇلاردان وزگە، ساۋرانبايەۆ كوشەسى بويىندا جۇرگىنشى ايماعىن جاساۋ قاراستىرىلعان.

قالا باسشىسى «الماتى-1» تەمىرجول ۆوكزالىندا بولعاندا وعان اينالانى جاڭارتۋ،ۆوكزالدى كۇردەلى جوندەۋدەن وتكىزۋ جانە پەررونداردى كەڭەيتۋ تۋرالى باياندالدى. باۋىرجان بايبەك قالا قىزمەتتەرىنە جۇرگىنشىلەرگە قيىندىق تۋعىزباۋ ءۇشىن ۆوكزال الدىنداعى كولىك قوزعالىسىن ۇيىمداستىرۋ سىزباسىن قايتا قاراۋدى، ۆوكزال ماڭىنداعىى سكۆەر مەن ونىڭ اينالاسىن اباتتاندىرۋدى تاپسىردى.