كۇندەلىكتى جۇمىس اپارى بارىسىندا الماتى اكىمى باۋىرجان بايبەك حالىقارالىق «سايران» اۆتوۆوكزالىنىڭ عيماراتى مەن ونىڭ اينالاسىن جانە «ساياحات» اۆتوبەكەتىن ارالاپ كوردى. مەگاپوليس باسشىسى «سايران» اۆتوۆوكزالىنىڭ كوپتەن بەرى حالىقارالىق دەڭگەيگە ساي ەمەستىگىن، سوندىقتان قايتا جوندەپ، مەنەدجمەنت مودەلىن قاراستىرۋ قاجەتتىگىن اتاپ ءوتتى.

الماتىدا «ءتۋريزمدى دامىتۋدىڭ 100 قادامى» جول كارتاسى اياسىندا قالا سەرۆيسى مەن ونىڭ ينفراقۇرىلىمىن جاقسارتۋ بويىنشا جۇمىس ودان ءارى جالعاسۋدا. وسىدان بىرنەشە كۇن بۇرىن عانا «قتج» ۇك» اق-مەن بىرگە «الماتى-1» جانە «الماتى-2» ۆوكزالدارىن رەكونسترۋكسيالاۋ مەن قىزمەت ساپاسىن جاقسارتۋ بارىسىندا بىرىككەن جوسپار قابىلدانعان ەدى. دەگەنمەن، مەگاپوليستىڭ اۆتوموبيل ۆوكزالدارىنىڭ جاعدايلارى قاناعاتتانعىسىز بولعاندىقتان جاڭارتۋدى قاجەت ەتەدى.

بۇگىنگى كۇنى «سايراننىڭ» ۆوكزال الدى اينالاسىندا ءبىرقاتار قۇرىلىستار بار، كەڭەستىك مودەرنيزم ستيلىندە سالىنعان ىشكى ارلەۋدىڭ ەلەمەنتتەرى مەن عيماراتتىڭ سىرتقى كەلبەتى بۇرىنعى بەينەسىنەن ءبىرشاما ايرىلعان، سونىڭ سالدارىنان ارحيتەكتۋرالىق بىرەگەيلىگىن جويۋ ءقاۋپى بار.

ىشكى تۋريزم الەۋەتىن دامىتۋدى ەسكەرىپ باۋىرجان بايبەك كۇن سايىنعى جولاۋشى لەگى 1200 ادامدى قۇرايتىن اۆتوۆوكزال اينالاسىن رەتكە كەلتىرۋدى جانە ونىڭ عيماراتىن جوندەۋدى تاپسىردى. زاڭناماعا سايكەس نىساندى جەرگىلىكتى ماڭىزى بار تاريحي ەسەكرتكىشتەر تىزىمىنە ەنگىزۋ ماسەلەسى قاراستىرىلادى. ايتا كەتەرلىگى، بۇرىندارى مەگاپوليس باسشىلىعى قۇنى 20،2 ملرد. تەڭگەنى قۇرايتىن «باتىس» اۆتوۆوكزالىن سالۋ جونىندەگى جوبانى بەكىتپەگەن ەدى.

«وتكەن جىلى باستالعان قالانى قايتا جاڭعىرتۋ اياسىندا ءبىز الماتىعا بۇرىنعى تاريحي كەلبەتىن قايتارۋدامىز. ەڭ الدىمەن، نىسانداردى العاشقى بەينەلەرىن ساقتاۋ قادجەت. ساراپشىلاردى تارتا وتىرىپ، جولاۋشىلار لەگىنىڭ لوگيستيكاسىن تولىق قايتا قاراعان ءجون. ياعني ءبىز تاريحي نىساندى قالپىنا كەلتىرىپ، ۆوكزالدىڭ بارشا قىزمەتىن جاڭاشا جۇرگىزىپ، ونى قالانىڭ كولىك حابىنا اينالدىرامىز»، - دەدى باۋىرجان بايبەك.

قازىرگى كەزدە اۆتوۆوكزال اينالاسىندا زاڭسىز سالىنعان قۇرىلىستار الىنۋدا. اۆتوۆوكزال اينالاسىندا بۇرىندارى ساۋدامەن اينالىسقان كاسىكەرلەرگە اۋداننىڭ ساۋدا ورىندارى مەن بازارلارىنانن جەڭىلدەتىلگەن ورىندار ۇسىنىلادى.

الماتى اكىمى جۇمىس ساپارى بارىسىندا قالا ماڭىنداعى ەلدى مەكەندەرگە قىزمەت كورسەتەتىن «ساياحات» اۆتوبەكەتى مەن ونىڭ اينالاسىن ارالاپ كوردى. جەر ۋچاسكەسىنىڭ يەلەرى ونىڭ اينالاسىن اباتتاندىرۋ بويىنشا ءتيىستى جۇمىستاردى باستاۋعا جانە ودان ءارى دامىتۋ جونىندەگى ناقتىلى جوسپاردى قىسقا مەرزىمدە ۇسىنۋعا مىندەتتەندى.