رەسەيءدىڭ كەمەروۆو قالاسىندا اسا قايعىلى وقيعا ورىن العانى بەلگىلى. سونداعى «زيمنيايا ۆيشنيا» ساۋدا ورتالىعىندا ءورت بولىپ، ناتيجەءسىندە 63 ادام، ونىڭ ىشىندە 41 بالا قايعىلى قازاعا ۇشىراعان ەدى. وسىعان وراي قازاقستان ۇكىمەتى بىردەن وزىمىزدەگى ءقاۋىپسىزدىك جاعدايىن قولعا الدى. ءسويتىپ، ءتيىستى ورىندار دەرەۋ ءىرى ويىن-ساۋىق ساۋدا ورىندارىن لاڭكەستىكتەن قورعاۋ ءۇشىن جاپپاي تەكسەرىسكە الدى.
ارينە، الماتى قالاسى دا مۇنداي تەكسەرىستەردەن شەت قالمادى. 2015 جىلى ق ر ۇكىمەتىنىڭ «لاڭكەستىك تۇرعىسىنداعى ارەكەتتەر الدىندا ءالسىز نىسانداردى لاڭكەستىكتەن قورعاۋ جونىندەگى» قاۋلىسى قابىلدانعان بولاتىن. سونىڭ نەگىزىندە ەكى توپقا بولىنگەن كوپشىلىك ورىندار قاتاڭ تەكسەرۋگە جاتقىزىلدى. بۇل رەتتە قالالىق ءىىد-نىڭ ەكسترەميزمگە قارسى ىس-ارەكەت جونىندەگى باسقارماسى مەن جەرگىلىكتى پوليسيا قىزمەتى بىرلەسىپ مەگاپوليستەگى قوعامدىق تاماقتاندىرۋ ورىندارىن، ويىن-ساۋىق ساۋدا ورتالىقتارىن، ستاديونداردى، سوسىن بالاباقشالار مەن مەكتەپتەردى، كوللەدجدەر مەن ۋنيۆەرسيتەتتەردى جانە باسقا الەۋمەتتىك ماڭىزدى نىسانداردى تەكسەرىپ شىقتى.
بۇل ءۇشىن باستى نازار ولاردىڭ انتيتەرروريستىك قورعالۋىنا ءبولىندى. ول ءۇشىن ءار نىساندا لاڭكەستىككە قارسى ۇلگىلى ءتولقۇجات بولۋى كەرەك ەكەن. ال ول قۇجاتتا اتالعان ناقتى عيماراتتىڭ اۋماعى قانشا بولۋى كەرەكتىگى جانە ول قانشا ورىنعا لايىقتالعانى كورسەتىلۋى قاجەت. ءارى ولاردىڭ بارلىعى كۇزەت دابىلى، جۇيەلى حابارلاۋ، قاداعالاۋ جانە كىرىپ-شىعۋدى باسقارۋ، سونداي-اق، جۇيەلىك بەينەباقىلاۋ قۇرالدارىمەن مىندەتتى تۇردە جابدىقتالۋى ءتيىس بولاتىن.
مىنە، وسى تالاپتار ءتيىستى دەڭگەيدە ورىندالماعان جاعدايدا لاڭكەستىك تۇرعىدا ءالسىز دەپ تانىلعان نىسان يەسى نەمەسە جەتەكشىسى كىنالى دەپ تابىلادى جانە ق ر ءاج كودەكسىنىڭ 149-بابىنىڭ 1-تارماعى بويىنشا جەكە جانە لاۋازىمدى تۇلعالارعا 200 اەك، ال شاعىن كاسىپكەرلىك نەمەسە كوممەرسيالىق ەمەس ۇيىمدار سۋبەكتىلەرى ءۇشىن – 300 اەك، ورتا كاسىپكەرلىك سۋبەكتىلەرى ءۇشىن – 500 اەك جانە ءىرى كاسىپكەرلىك سۋبەكتىلەر ءۇشىن – 1000 اەك كولەمىندە ايىپپۇل سالىنادى.
اتالعان تەكسەرىستەر قورىتىندىسى بويىنشا الماتىلىق ويىن-ساۋىق ساۋدا ورتالىقتارىنىڭ يەلەرى مەن باسشىلارىنا بارلىعى 20 ملن. تەڭگە كولەمىندە ايىپپۇلدار سالىنعان. ونىڭ ۇستىنە، بيىلعى جىلدىڭ ەكىنشى توقسانىندا ساۋدا ورتالىقتارى مەن قوعامدىق تاماقتاندىرۋ ورىندارىن تاعى دا تەكسەرۋ جوسپارلانعان. سوعان دەيىن ءبىرىنشى تەكسەرۋدە انىقتالعان كەمشىلىكتەردىڭ ءبارى جويىلىپ ءبىتۋى ءتيىس.
الماتى اقشامى
