ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ كافەدرا مەڭگەرۋشىسى، قازاقستاننىڭ ەڭبەك سىڭىرگەن قايراتكەرى، پروفەسسور، «قۇرمەت» وردەنىنىڭ كاۆالەرى گۇلدانا ساپارعالييەۆانىڭ الماتى اقشامى گازەتىندە ەلباسىنىڭ "رۋحاني جاڭعىرۋ" باعدارلامالىق ماقالسىنا قاتىستى ماقالاسى جارىق كوردى. نازارلارىڭىزعا اتالمىش ماقالانى ۇسىنامىز.

ءبىزدىڭ ۇجىم دا ەلباسىنىڭ «رۋحاني جاڭعىرۋ» باعدارلامالىق ماقالاسىن ەلىمىزدىڭ بۇگىنى مەن كەلەشەگىنە بەرگەن ناقتى تاپسىرماسى دەپ قابىلدادى. بۇل – كەلەشەكتىڭ باعىت-باعدارى، قازاقستاننىڭ بولاشاق ونەر مايتالماندارىن وتانشىلدىققا، ۇلتجاندىلىققا، ەۆوليۋسيالىق جولمەن دامۋعا، ولاردىڭ سانا-سەزىمىنىڭ اشىقتىعىنا تاربيەلەۋ. ول – عىلىم مەن بىلىمگە، دۇنيەجۇزىلىك وزىق جاڭالىقتارعا قابىلەتتى مامانداردى دايارلاۋ. جاڭعىرۋدىڭ باستى شارتى – ساناعا رۋح، جانعا جىگەر بەرۋ.

قازاقستان رەسپۋبليكاسىنىڭ ودان ءارى قاراي جەتىلۋىندەگى باسىمدىقتاردىڭ ءبىرى – ينتەللەكتۋالدى ۇلت قالىپتاستىرۋ. ەلارالىق بايلانىستاردى نىعايتۋ، ياعني باسقا مەملەكەتتەردەگى ونەر وقۋ ورىندارىمەن بايلانىس ورناتۋ، تاجىريبەلىك، پروفەسسور-وقىتۋشى قاۋىمى ارالىق قارىم-قاتىناس جاساۋ، ستۋدەنتتەرمەن الماسۋ، وقۋ-باعدارلاماسىن قايتا قاراپ، الەمدىك وقۋ جۇيەسىندەگى جاhاندىق وقۋ باعدارلامالارىمەن ساباقتاستىرۋ – ءبىزدىڭ ونەر اكادەمياسىنىڭ نەگىزگى ستراتەگيالىق باعىتى. سونىمەن بىرگە، الەۋمەتتىك بولمىستىڭ بارلىق نەگىزىن شارلاپ وتەتىن قۇبىلىس رەتىندەگى مادەنيەت اتتى فەنومەننىڭ تەرەڭ قابىلدانۋى – گۋمانيستىك قارىم-قاتىناستىڭ الەۋمەتتىك-مادەني ۇدەرىسىنىڭ باستى ماقساتى رەتىندە قالىپتاسۋىنا ەڭبەك ەتۋ.

ءداستۇرلى حالىق شىعارماشىلىعى مەن ورىنداۋشىلىعىنىڭ وسى ۇدەرىسكە ءوز  يننوۆاسيالىق جاڭالىقتارىمەن، ىزدەنىستەرىن دامىتا وتىرىپ، ءارى قاراي الەمدىك تۇرعىدا تانىلۋعا تالپىنۋى بۇگىنگى كۇننىڭ مىندەتى. قازىرگى ءبىلىم بەرۋدىڭ باستى  باعىتى – ءقايبىر سالادا بولماسىن كاسىبي مامان دايارلاۋ عانا ەمەس، ءتۇرلى ۇلت وكىلدەرىمەن قوسا جاhاندىق ەتنوستارمەن مادەني قارىم-قاتىناسقا دايىن گۋمانيستىك، دەموكراتيالىق، ادامگەرشىلىك، ىزگىلىك قۇندىلىقتارىنا نەگىزدەلگەن، مادەني جانە ۇلتتىق تولەرانتتى، ياعني توزىمدىلىك قوعامىندا ءومىر سۇرۋگە قابىلەتتى جانە دايىن «كاسىبي ءبىلىمى شىڭدالعان مادەني ادامدى» دايارلاپ شىعارۋ بولىپ تابىلادى.

ونەر اكادەمياسىندا ەڭبەك ەتىپ جۇرگەن پروفەسسور-وقىتۋشى قاۋىمى رۋحاني قۇندىلىقتاردى بويىنا سىڭىرگەن، بولاشاقتا باسەكەگە قابىلەتتى بولا الاتىن ماماندار دايىنداپ شىعارۋ جولىندا تەر توگىپ ءجۇر.  ءبىزدىڭ «جەكە ءان سالۋ» كافەدراسى وسى ماقساتتا ستۋدەنتتەر اراسىندا 10 باعىتتا: پاتريوتتىق؛ وتباسىلىق؛ رۋحاني-ادامگەرشىلىك؛ ساياسي-قۇقىقتىق؛ ليدەرلىك ساپا؛ ەكولوگيالىق جانە ەڭبەك تاربيەسى؛ ينتەللەكتۋالدىق تاربيە؛ سالاۋاتتى ءومىر سالتى تاربيەسى، پوليمادەني تاربيە، ءدىني تاربيە نەگىزىندە اۋقىمدى جۇمىستار جۇرگىزۋدە. ءبىزدىڭ جاستار وتە بەلسەندى.

جاستارعا سەنەتىنىن ىلعي ايتىپ جۇرەتىن نۇرسۇلتان نازاربايەۆ كۇنى كەشە سويلەگەن سوزىندە رۋحاني جاڭعىرۋ اياسىنداعى جۇمىستاردىڭ ماڭىزدىلىعىنا توقتالىپ، «100 جاڭا وقۋلىق» جوباسىنىڭ جاس ۇرپاققا ءبىلىم بەرۋ ىسىندەگى ءرولى زور ەكەنىن ايتتى.

– جاستارىمىز جوعارى عىلىمي ستاندارتتارعا سايكەس ءبىلىم الۋعا ءتيىس. سوندىقتان ءبىز 800 كىتاپتان تۇراتىن ۇزدىك وقۋلىقتاردىڭ اۋقىمدى ءتىزىمىن ازىرلەدىك. ۇلتتىق اۋدارما بيۋروسى قۇرىلىپ، جۇمىسىنا كىرىستى، – دەگەن ەلباسى بۇل شارانىڭ بۇكىل الەۋمەتتىك-گۋمانيتارلىق سالا ءۇشىن ماڭىزدى ەكەنىن ايتىپ، ونىڭ ءبىرقاتار ەرەكشەلىگىن اتاپ ءوتتى.

– بۇگىنگى العاشقى زياتكەرلىك ترانش اقش، رەسەي، ۇلىبريتانيا، فرانسيا جانە شۆەيساريا سياقتى الدىڭعى قاتارلى ەلدەردىڭ ەڭ ۇزدىك عىلىمي ەڭبەكتەرىن قامتيدى. بۇل كىتاپتارمەن تانىسۋعا مۇمكىندىك العان جاستارىمىز كوپ ەمەس، – دەگەن نۇرسۇلتان نازاربايەۆ ۇسىنىلعان كىتاپتار قازاق تىلىنە ءتۇپنۇسقادان اۋدارىلعانىن ايتتى.

– بۇل – اۋقىمدى ەنسيكلوپەديالىق ىزدەنىس ارقىلى ادامزات دامۋىنىڭ كوكجيەگىنە جول اشاتىن كەزەڭ. بۇگىندە زياتكەرلىك دامۋ ۇدەرىسىنەن تۋىنداعان تىڭ سەرپىننىڭ ارقاسىندا رۋحاني ريەۆوليۋسيا باستاۋ الىپ كەلەدى، – دەدى ەلباسى. مەملەكەت تاراپىنان جاسالىپ وتىرعان وسىناۋ مول مۇمكىندىكتەردى ءبىزدىڭ وزىندىك كوزقاراسى، پىكىرى بار سەرگەك ويلى جاستارىمىزدىڭ دۇرىس پايدالانا الاتىنىنا سەنەمىن.