الماتى قالاسىنداعى دوستىق ۇيىندە  قازاقستان حالقى اسسامبلەياسىنىڭ رەسپۋبليكالىق ءبىرىڭعاي كۇنى اياسىندا «قازاق تىلىندەگى 100 جاڭا وقۋلىق» جوباسىن تالقىلاۋعا ارنالعان جيىن ءوتتى. قحا ءتوراعاسىنىڭ ورىنباسارى ءابىلفاس حامەدوۆ ءتوراعالىق ەتكەن جيىنعا ابىلاي حان اتىنداعى حالىقارالىق قاتىناستار جانە الەم تىلدەرى ۋنيۆەرسيتەتىنىڭ عىلىمي جۇمىس جونىندەگى پرورەكتورى ساعادي بولەكبايەۆ، ءال-فارابي اتىنداعى قازۇۋ-دىڭ فيلوسوفيا كافەدراسىنىڭ مەڭگەرۋشىسى گۇلجيھان نۇرىشيەۆا،  قازاقستان كۇردتەرىنىڭ «باربانگ» قاۋىمداستىعىنىڭ ءتوراعاسى كنياز ميرزويەۆ قاتىستى.

سونىمەن قاتار، قحا «جاڭعىرۋ جولى» رەسپۋبليكالىق جاستار قوزعالىسىنىڭ الماتى قالالىق شتابىنىڭ وكىلدەرى، قالالىق ەتنومادەني بىرلەستىكتەردىڭ جاستار قاناتىنىڭ ءتوراعالارى، ستۋدەنتتىك ۇيىمداردىڭ كوشباسشىلارى بار. باسقوسۋعا قاتىسۋشىلار «رۋحاني جاڭعىرۋ» باعدارلاماسى اياسىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ ماڭىزىنا توقتالىپ، الەمدىك ادەبيەتتىڭ جاۋھارى سانالاتىن 18 وقۋلىقتىڭ تۇڭعىش رەت قازاق تىلىنە اۋدارىلۋى باعا جەتپەس قازىنا ەكەندىگىن تىلگە تيەك ەتتى.

– ءبىز دەرەك دجونستوننىڭ «فيلوسوفيانىڭ قىسقاشا تاريحى. سوكراتتان دەرريداعا دەيىن» دەگەن وقۋلىعىن اعىلشىن تىلىنەن قازاق تىلىنە اۋداردىق. ەكىنشى اۆتور  فيلوسوفيا عىلىمىنىڭ كانديداتى گاۋھار زۇلپىحار قىزى. ءبىز جۇمىستى بىلتىرعى ماۋسىم ايىندا باستادىق. جۇمىس وڭاي بولمادى. جاۋاپكەرشىلىگى مول. ويتكەنى، بۇل پرەزيدەنتتىڭ تاپسىرماسى. ونىڭ ۇستىنە، اۋدارىلعان كىتاپتىڭ ساپاسىنا قاراي وتاندىق فيلوسوفتارعا باعا بەرىلەدى. ءبىز كىتاپتىڭ سوڭعى نۇسقاسىن 4-5 رەت وڭدەدىك. ءاربىر ءسوزدى، ءاربىر سويلەمدى تەكسەردىك. نەگىزگى ماقسات – بۇل قازاقتىڭ جاستارىنا ارنالعان وقۋ قۇرالىن جازىپ شىعۋ، – دەدى فيلوسوفيا عىلىمىنىڭ دوكتورى گۇلجيھان نۇرىشيەۆا.

ال قازاقستان كۇردتەرىنىڭ «باربانگ» قاۋىمداستىعىنىڭ ءتوراعاسى كنياز ميرزويەۆتىڭ ايتۋىنشا، جوعارى وقۋ ورىن­دارىنداعى ستۋدەنتتەردىڭ 70 پايىزى قازاق تىلىندە وقيتىنىن ەسكەرسەك، الەمنىڭ گۋمانيتارلىق سالاداعى ءىنجۋ-مارجاندارىنىڭ قازاق تىلىندە سويلەۋى رۋحاني جاڭعىرۋىمىزعا ىقپال ەتپەك.

«قازاق تىلىندەگى 100 جاڭا وقۋلىق» جوباسى بويىنشا جاقىندا 18 وقۋلىق جارىققا شىعادى. ولار ەكونوميكا، فيلوسوفيا، تاريح، ءتىل ءبىلىمى، جالپى الەۋمەتتىك-گۋمانيتارلىق سالالاردى قامتيدى. ءبىر ەرەكشەلىگىلى، بۇل كىتاپتاردىڭ بارلىعى دا اعىلشىن تىلىنەن قازاق تىلىنە اۋدارىلعان. 

18 وقۋلىقتىڭ ءارقايسىسى 10 مىڭ دانامەن باسىلادى. الداعى ءبىر ايدا ەلىمىزدىڭ بارلىق وڭىرلەرىنە تاراتىلىپ، كىتاپحانا سورەلەرىنەن تابىلاتىن بولادى. 

الماتى اقشامى