بۇگىن "نۇر وتان" پارتياسى جانىنداعى "ميراس" رەسپۋبليكالىق كەڭەسىنىڭ مۇشەلەرى الماتى قالاسىنداعى ۋنيۆەرسيتەتتەردىڭ ستۋدەنتتەرىمەن كەزدەسىپ، ەلباسىنىڭ 5 الەۋمەتتىك باستاماسى اياسىندا سالىناتىن جاتاقحانالاردىڭ جوباسىمەن تانىستى.

كەڭەس مۇشەلەرى الماتىداعى ءال-فارابي اتىنداعى قازاق ۇلتتىق ۋنيۆەرسيتەتى، ق. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قازاق مەملەكەتتىك قىزدار پەداگوگيكالىق ۋنيۆەرسيتەتتەرىنىڭ ستۋدەنتتەرىمەن كەزدەسىپ، ولاردىڭ جاتاقحاناداعى جاعدايىمەن تانىستى.

سونداي-اق ءال-فارابي اتىنداعى قازۇۋ-نىڭ ستۋدەنتتەر قالاشىعىندا بولىپ، جاتاقحانالاردىڭ قۇرىلىس جوباسىمەن تانىستى.

ۋنيۆەرسيتەت رەكتورى عالىمقايىر مۇتانوۆتىڭ ايتۋىنشا، جوسپارلانعان جاڭا ەكى جاتاقحانانىڭ قۇرىلىسىنا ورتا ەسەپپەن 6-7 ميلليارد تەڭگە قاراستىرىلعان. ولاردىڭ جالپى اۋدانى 45 500 شارشى مەتردى قۇرايتىن بولادى، بولمەلەر سانى - 543.

اتاپ وتىلگەندەي، ءاربىر سالىناتىن شارشى مەترگە 450 اقش دوللارىنان جۇمسالادى. ءماجىلىس دەپۋتاتى بەكبولات تىلەۋحان بۇل سيفرانىڭ استانامەن سالىستىرعاندا از ەكەندىگىن اتاپ ءوتتى.

"شارشى مەترىنە 450 اقش دوللارىنان كەلسە، بۇل استانامەن سالىستىرعاندا تۇك ەمەس. ەلوردادا ءبىر شارشى مەترىنە 627 اقش دوللارىنان جۇمسالىپ وتىر"، - دەدى ول.

ۇلتتىق ۋنيۆەرسيتەت باسشىسى ەلباسىنىڭ قولداۋىمەن بۇل جوبا الداعى ءبىر ايدا ءوز جۇمىسىن باستايتىنىن جەتكىزدى. ونىڭ ايتۋىنشا، ستۋدەنتتەردى جاتاقحانالارمەن تولىقتاي قامتۋ ارقىلى شەتەلدەن كەلەتىن ستۋدەنتتەردىڭ سانىن ارتتىرۋعا بولادى. قازىرگى تاڭدا، اتالمىش جوو-دا 1500-دەن استام شەتەلدىك ستۋدەنت ءبىلىم الۋدا.

سونداي-اق "نۇر وتان" پارتياسىنىڭ وكىلدەرىنە قازۇۋ-نىڭ ستۋدەنتتەر قالاشىعىندا بوي كوتەرەتىن №2 عالىمدار ءۇيىنىڭ قۇرىلىس جوباسى  تانىستىرىلدى.

ايتا كەتەيىك، ەلىمىز جوو-لارىندا ءبىلىم الىپ جاتقان 530 مىڭ ستۋدەنتتىڭ 204 مىڭى وزگە ەلدى مەكەندەردەن كەلگەن جاستار. جاتاقحانالارعا سۇرانىس الماتى قالاسىندا - 21 557، استانا قالاسىندا - 14 239، قاراعاندى وبلىسىندا 8253 ادامعا جەتىپ وتىر. جالپى رەسپۋبليكا بويىنشا 77 500 ستۋدەنت جاتاقحاناعا مۇقتاج.

ايتا كەتسەك، «ميراس كەڭەسى – 2010 جىلى 15 قازاندا «نۇر وتان» پارتياسى جانىنان قۇرىلعان كونسۋلتاتيۆتىك-كەڭەسۋ ورگانى. قوعامدىق كەڭەس قۇرامىنا قازاقستاننىڭ بەلگىلى مادەنيەت جانە ونەر قايراتكەرلەرى ەنگەن. كەڭەس شەشىمدەرى ۇسىنىمدىق سيپاتتا بولىپ كەلەدى.

2014 جىلعى مامىردا  پارتيانىڭ وبلىستىق فيليالدارى جانىنان «ميراس» قوعامدىق كەڭەسىنىڭ ايماقتىق الاڭدارىن قۇرۋ جونىندە  جۇمىس باستالىپ كەتتى. كەڭەستىك ايماقتىق الاڭى سونداي-اق ءار ايماقتا مادەنيەت، ونەر جانە ءبىلىم بەرۋ سالالارى وكىلدەرىنىڭ باسىن قوسىپ، جەرگىلىكتى جەردە قازاقستان رەسپۋبليكاسىنىڭ مادەنيەت، ونەر، كينوماتوگرافيا، تاريحي-مادەني مۇراسىن ساقتاۋ جانە دامىتۋ سالاسىنداعى مەملەكەتتىك ساياساتىن جۇزەگە اسىرۋ بويىنشا «نۇر وتان» پارتياسىنىڭ ايماقتىق فيليالدارى، مەملەكەتتىك ورگاندار مەن ازاماتتىق قوعامدىق يستيتۋتتارى قىزمەتتەرىنىڭ ءبىرىڭعاي ستراتەگياسىن ازىرلەۋ ماقساتىندا قۇرىلادى.

جولداس ورىسبايەۆ