دەنەشىنىقتىرۋ ساباعىنىڭ ۋاقىتىندا سپورتشى وقۋشىلار باسقا ساباعىنا كوڭىل بولە الادى، دەپ جازادى Qamshy.kz اقپارات اگەنتتىگى Informburo.kz سايتىنا سىلتەمە جاساپ.

سپورتشى وقۋشىلار دەنەشىنىقتىرۋ ساباعىنان بوساتىلماق. ول ءۇشىن اتا-انالار راستايتىن قۇجاتتاردى جيناپ، مەكتەپ باسشىلىعىنا ءوتىنىش بەرۋى قاجەت. بۇل جايىندا ق ر ءبىلىم جانە عىلىم ءمينيسترى ەرلان ساعادييەۆ ورتالىق كوممۋنيكاسيالار قىزمەتىندە وتكەن بريفينگتە مالىمدەدى.

ونىڭ ايتۋىنشا، سپورتشى وقۋشىلاردى دەنەشىنىقتىرۋ ساباعىنان بوساتۋ تۋرالى ناقتى شەشىم مۇعالىمدەر كەڭەسىمەن قابىلدانادى.

«اپتاسىنا ءۇش ساعاتتان اسا كاسىبي سپورتپەن اينالىساتىن وقۋشىلاردى دەنەشىنىقتىرۋ ساباعىنان بوساتۋ تۋرالى ءبىرازدان بەرى ايتىلىپ ءجۇر. ءبىز كوپتەگەن اتا-انالاردىڭ ءوتىنىشى بويىنشا شەشىم قابىلداپ وتىرمىز. ەندى كاسىبي سپورتپەن اينالىساتىن وقۋشىلار مۇعالىمدەر كەڭەسىنىڭ شەشىمى بويىنشا مەكتەپتەگى دەنەشىنىقتىرۋ ساباعىنان بوساتىلاتىن بولادى»، - دەپ ايتتى مينيستر.

ەرلان ساعادييەۆ دەنەشىنىقتىرۋ ساباعىنان بوساتىلعان وقۋشىلار ول ۋاقىتتا باسقا ءپان بويىنشا ءبىلىمىن ارتتىراتىنىن باسا ايتىپ ءوتتى.

مينيستر، سونىمەن قاتار، مەكتەپ باعدارلاماسىنداعى دەنەشىنىقتىرۋ ءپانىنىڭ ءۇشىنشى ساعاتى الىنبايتىنىن حابارلادى.

«الەۋمەتتىك جەلىلەردە جاڭا وقۋ جىلىنان باستاپ دەنەشىنىقتىرۋ ءپانىنىڭ ءۇشىنشى ساعاتى قىسقارتىلاتىنى جايلى ايتىلىپ ءجۇر. الايدا بىزدە ونداي جوسپارلار بولعان جوق، ول تۋرالى زاڭدا جازىلماعان»، - دەدى ەرلان ساعادييەۆ.