وزبەكستان باسشىسى شاۆكات ميرزيەيەۆ رەسمي ساپارمەن اقش-تا ءجۇر. 

شاۆكات ميرزيەيەۆ پەن جۇبايى «ەندريۋس» اۋەجايىنداعى ۇشاقتان تۇسكەن بويدا گۇل شوقتارىن ۇستاعان امەريكالىق وقۋشىلار باسشىنى وزبەك تىلىندە قارسى الدى. شاۆكات ميرزيەيەۆتى قارسى الۋ ءۇشىن اقش ۇكىمەتى دە اۋەجايعا ارنايى بارعان.

ترامپ ءۇشىن مارتەبە

ال اقش باسشىسىمەن ميرزيەيەۆ كەلەسى كۇنى كەزدەستى. قوناقتارىن قارسى العان ترامپ «اقش ءۇشىن وزبەكستان قاشان دا ماڭىزدى ورىندا» دەپ اتاپ ءوتتى.

«سىزبەن اق ۇيدە كەزدەسۋ – ءبىز ءۇشىن مارتەبە»، - دەگەن ەدى ترامپ.

ءوز كەزەگىندە شاۆكات ميرزيەيەۆ ءوزىن جوعارى دەڭگەيدە قارسى العان ترامپقا العىسىن ءبىلدىرىپ، اقش-تىڭ وزبەكستاندى قولدايتىنىن ريزاشىلىقپەن قابىلداعان.

«وزبەكستان مەن اقش-تاعى پرەزيدەنت سايلاۋلارىنان كەيىن ەكى مەملەكەتتىڭ قارىم-قاتىناسى جاڭا دەڭگەيگە كوتەرىلدى. «وزبەكستان مەن اقش: ستراتەگيالىق سەرىكتەستىكتىڭ جاڭا ءداۋىرى» دەگەن اتاۋدان-اق ءبارىن ۇعىنۋعا بولادى. ەكى ەل جاڭا بەلەستەرگە كوز تىكتى»، - دەدى ميرزيەيەۆ.

بۇعان دەيىن قوس پرەزيدەنت ەر-رياد پەن نيۋ-يوركتە كەزدەسكەن. ال اق ۇيدە ءبىرىنشى رەت كەزدەستى.

اقش قولداۋى

امەريكا باسشىسى تاشكەنت ۇيىمداستىرعان ەكونوميكالىق جانە قوعامدىق-ساياسي رەفورمالاردى جوعارى باعالاپ، ونىڭ جۇزەگە اسۋى ءۇشىن قول ۇشىن سوزاتىنىن مالىمدەدى.

بۇعان قوسا تاراپتار وڭىرلىك قاۋىپسىزدىك جانە تەرروريزممەن كۇرەس  ماسەلەلەرىن تالقىعا سالدى.

ترامپ شاۆكات ميرزيەيەۆتىڭ ورتالىق ازيادا باستاعان ينتەگراسيالىق ءۇردىسىن قولداپ، «س5+1» فورماتىندا ەلدەرمەن ديالوگقا وتۋگە قاشان دا دايىن ەكەنىن جەتكىزدى.

سونىمەن قاتار اقش اۋعانستانداعى وزبەك تەمىرجولدارى مەن ينفرا قۇرىلىس سالاسىندا ساياسي جانە قوسىمشا كومەك كورسەتۋگە دايىن. ءوز كەزەگىندە شاۆكات ميرزيەيەۆ تە الداعى ۋاقىتتاردا كەز-كەلگەن كومەگىن ۇسىنۋعا دايىن ەكەنىن جەتكىزدى.

اقش پەن وزبەكستان قورعانىس سالاسىنداعى سەرىكتەستىكتى نىعايتىپ، العاشقى بەس جىلدىق اسكەري ارەكەتتەسۋ جوسپارىن جۇزەگە اسىرماق.

باسشىلار وزبەكستانداعى ادام قۇقىقتارى ماسەلەسىن دە شەتىن قالدىرعان جوق. ترامپ تاشكەنتتىڭ ازاماتتاردىڭ قۇقىعىن قورعاۋ ماسەلەسىندەگى ادىلەتتىلىك رەفورماسىن ماقۇلدادى.

وزبەكستان ەلدەگى امەريكالىق كومپانيالارداعى جۇمىسشىلاردىڭ جاعدايىن جاقسارتىپ، ءجىتى باقىلاۋدا ۇستايتىندىعىن ءمالىم ەتتى. باسشىلار اۋىل شارۋاشىلىعى، ەكونوميكا، ەنەرگەتيكا، حيميا، قارجى، تۋريزم، ماتا ءوندىرىسى، دەنساۋلىق ساقتاۋ جانە سيفرلىق تەحنولوگيا سالالارىندا سەرىكتەستىكتى ودان ءارى نىعايتۋ مۇمكىندىكتەرىن قايتا قاراۋعا كەلىستى.

ساپار بارىسىندا وزبەكستان مەن اقش كومپانيالارى 20 شاقتى ءىرى  كەلىسىمشارتقا قول قويدى.  ولاردىڭ جۇزەگە تولىق اسۋى 4،8 ملرد دوللارعا باعالاندى.

بۇعان قوسا ترامپ وزبەكستاننىڭ بۇكىلالەمدىك ساۋدا ۇيىمىنا كىرۋىنە سەپتەسەىنىن جەتكىزدى.