«ازىرەت سۇلتان» مەملەكەتتىك تاريحي-مادەني قورىق مۋزەيىندە 18 مامىر حالىقارالىق مۋزەيلەر كۇنىنە وراي  «مۋزەيگە سىي» اكسياسى ءوتتى.

اتالعان شارا بارىسىندا«ازىرەت سۇلتان» قورىق-مۋزەيى قورىندا «باكىرجاننىڭ وجاۋى» اتاۋىمەن ساقتاۋلى جادىگەرىمىزدىڭ  اۆتورى - پەداگوگيكا عىلىمدارىنىڭ كانديداتى، اعاشتان ءتۇيىن تۇيگەن قولونەر شەبەرى باكىرجان ءاشىرالى ۇلى ايداربەكوۆ تاعى دا ەرەكشە جادىگەردى ۇسىندى. تۇركىستان قالاسىنا ارنايى ات باسىن بۇرعان باكىرجان ءاشىرالى ۇلى جاساعان وجاۋىنا ارنايىلاپ ۆيترينا جاساپ اكەلىپ وتىر. 

قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ: «بولاشاققا باعدار:رۋحاني جاڭعىرۋ» تاريحي ماقالاسىندا «ەگەمەن ەلىمىزدىڭ مادەني ومىرىندە مۋزەيلەردىڭ ورنى ايرىقشا. تاريحىمىزدى تەرەڭ زەرتتەپ، ونىڭ تاجىريبەسىنەن تاعىلىم الۋ – قازاقستاندا ءپاتريوتيزمدى قالىپتاستىرۋدىڭ، وتاننىڭ لايىقتى ازاماتتارىن تاربيەلەۋدىڭ باستى شارتتارىنىڭ ءبىرى...» –دەپ اتاپ وتكەنى بەلگىلى.
ءىس-شارا بارىسىندا «ازىرەت سۇلتان» قورىق-مۋزەيى ديرەكتورىنىڭ ورىنباسارى س.ۇركىمبايەۆ «وسىنداي مۋزەي ىسىنە جاناشىرلىقپەن قارايتىن كوزى اشىق، كوكىرەگى وياۋ ازاماتارىمىزعا العىستان باسقا ايتارىمىز جوق. قۇرمەتتى باكىرجان ءاشىرالى ۇلى، ىسىڭىزگە تولاعاي تابىستار تىلەي وتىرىپ، ءبىزدىڭ مۋزەيدىڭ اتىنان، تۇركىستاندىقتار اتىنان از عانا ساۋعامىزدى قابىل الۋىڭىزدى سۇرايمىن» - دەپ، ىزگى نيەتىن ءبىلدىردى.

باكىرجان ايداربەكوۆ ءوز كەزەگىندە وجاۋدىڭ جاسالۋ تاريحىنا توقتالىپ، كوزىنىڭ قاراشىعىنداي ساقتاپ وتىرعان قورىق-مۋزەي ۇجىمىنا شەكسىز العىسىن ءبىلدىردى. 

الداعى ۋاقىتتاردا دا اكسيا ءوز جالعاسىن تاباتىن بولادى. 

اكسيانىڭ ماقساتى - اتا-بابادان قالعان قۇندى مۇرالاردى مۋزەيگە اكەلىپ، جاس ۇرپاققا ناسيحاتتاۋ.