الماتىداعى ەكى مىڭنان اسا تۇرعىن ءۇيدىڭ تۇرعىندارى ەسەپتەۋ قۇرالىنىڭ جوقتىعىنان ارتىق تولەم جاساپ كەلەدى. ءقازىر قالا بويىنشا مۇنداي قۇرىلعى جەتى مىڭ ۇيگە ورناتىلىپتى. بۇل ارقىلى ءاربىر تۇتىنۋشى قانشا ەنەرگيانى پايدالانعانىن ءبىلىپ وتىرادى.
ءار پاتەرگە قانشا جىلۋ بەرىلدى، ىستىق سۋدىڭ كولەمى قانشا؟ ەسەپكە الۋ قۇرىلعىسى مالىمەتتى ساعات سايىن وڭدەپ وتىرادى. تەمپەراتۋرا مەن سۋدىڭ دەڭگەيىن ولشەيتىن بۇل اپپارات ارقىلى ءار تۇرعىن كەتكەن شىعىندى بىلە الادى. دەرەكتەر قورىن پاتەر يەلەرى كووپەراتيۆى تەكسەرىپ وتىرۋلارى ءتيىس. ەگەر جۇيەدە اقاۋ تابىلسا، بەلگى بەرىلەدى.
«بۇل جۇيە پايدالى. نەلىكتەن؟ ويتكەنى ءبىر ۇيگە قانشا تەمپەراتۋرا جىلۋ كەلگەنىن بىلۋگە كومەكتەسەدى. تۇتىنۋشىلار دا سايكەسىنشە، پايدالانعان جىلۋعا تولەيدى. ىستىق سۋدىڭ باعاسى دا جىلۋعا تىكەلەي بايلانىستى. مىسالى، ۇيدە قانشا ادام تىركەلسە، ەسەپتەۋ قۇرالدارى ۇيدەگى ءار ادامعا تەكشە مەتردى ەسەپتەپ بەرەدى»، -دەدى «وربيتا-1» پيك ءتورايىمى گالينا پوتەشكينا.
دەرەكتەردى ەشكىم وزگەرتە المايدى. قىزمەتكەرلەردىڭ وزدەرى مالىمەتتى تەك كوشىرىپ قانا الۋعا مۇمكىندىگى بار. ءقازىر مۇنداي قۇرىلعىلار قالاداعى جەتى مىڭنان اسا ۇيگە ورناتىلعان. ال ەكى مىڭنان اسا تۇرعىن جىلۋ مەن ىستىق سۋعا بۇرىنعى جۇيە بويىنشا تولەم جاسايدى. ياعني، جالپى سوما تۇرعىندارعا تەڭدەي بولىنەدى.
«ءار ەسەپتەۋ قۇرالى قىزمەت كورسەتۋدى تالاپ ەتەدى. ەگەر قاراۋسىز قالسا، شىعىندى ەسەپتەۋ، كورسەتكىشتەردى بەلگىلەۋ قيىنعا سوعادى. كۇن سايىن قاداعالاپ وتىرۋ بۇگىندە GSM مودەمنىڭ كومەگىمەن جۇزەگە اسادى. ول ءۇشىن الماتى جىلۋ جۇيەلەرىنىڭ سايتىنا كىرىپ، كورسەتكىشتى قاراپ وتىرۋعا مۇمكىندىك بار»، - دەدى «الماتى جىلۋ جۇيەلەرى» ج ش س ءبولىم باسشىسى دميتريي فەديۋكوۆ.
بۇدان بولەك، ەندى شىعىن كورسەتكىشتەرىن، ءۇيدى كۇتىپ-ۇستاۋعا قاجەتتى قاراجاتتى «ەلەكتروندى پيك» قوسىمشاسى ارقىلى ءبىلىپ، كووپەراتيۆ جەتەكشىلەرىمەن ۇيدەن شىقپاي-اق بايلانىسۋعا بولادى. جوبانى جۇزەگە اسىرۋ كەلەسى جىلعا جوسپارلانعان، ال ازىرگە جۇيە ناقتىلانىپ جاتىر.
«ءبىز مەملەكەتتىك-جەكەمەنشىك سەرىكتەستىك اياسىندا پاتەر يەلەرى كووپەراتيۆى ارقىلى ەلەكتروندىق قىزمەت كورسەتۋ جۇيەسىن ەنەگىزبەكشىمىز. ياعني، ءار تۇرعىن ەلەكتروندى تۇردە ءوتىنىش بەرىپ، ەلەكتروندى تۇردە داۋىس بەرىپ، ءتىپتى، پيك ەسەبىمەن دە تانىسا الادى. بۇل تۇرعىن ۇيلەرگە قىزمەت كورسەتۋدىڭ اشىقتىعىن قامتاماسىز ەتەدى»، - دەدى الماتى قالاسى تۇرعىن ءۇي جانە تۇرعىن ءۇي ينسپەكسياسى باسقارماسىنىڭ باسشىسى ءانۋار وسكەنبايەۆ.
ايتا كەتەيىك، بۇل قوسىمشا ارقىلى ءار پاتەر يەلەرى كووپەراتيۆىنىڭ قىزمەتى ءجىتى باقىلانادى. وتكەن جىلى تەكسەرىلگەن 260 كووپەراتيۆتىڭ 104-نەن ولقىلىق تابىلعان.
