وڭتۇستىك قازاقستاندا «مەرەيلى وتباسى-2018» ۇلتتىق بايقاۋىنىڭ وبلىستىق كەزەڭىنىڭ جەڭىمپازدارى انىقتالدى. مەرەيلى وتباسى اتانعان جەڭىمپازداردى ءشامشى قالداياقوۆ اتىنداعى وبلىستىق فيلارمونيادا وبلىس اكىمىنىڭ ورىنباسارى ەربول سادىر سالتاناتتى تۇردە ماراپاتتاپ، وبلىس اكىمىنىڭ ديپلومى مەن قارجىلاي سىيلىعىن تابىس ەتتى. 

سونىمەن ءۇش كەزەڭنەن تۇراتىن (اۋداندىق، وبلىستىق، رەسپۋبليكالىق) بايقاۋدىڭ وبلىستىق كەزەڭىنەن اۋدان، قالادان 38 جانۇيا ۇسىنىلىپ، ونىڭ ىشىندە 30 وتباسى ۇزدىك دەپ تانىلدى. ال وسىلاردىڭ اراسىنان قازىعۇرت اۋدانىنان كەلگەن مۇحتار مومىنوۆ پەن ماقتاارالدىق ساپارالى سەرىكبايەۆتار جانۇيالارى مەرەيلى وتباسى اتانىپ، 1 000 000 تەڭگەدەن قارجىلاي سىيلىققا يە بولدى. وسىلايشا، وڭتۇستىكقازاقستاندىق ەكى وتباسى قىركۇيەك ايىندا استانا قالاسىندا وتەتىن رەسپۋبليكالىق بايقاۋعا جولداما الدى.

بۇدان بولەك، «مەرەيلى وتباسى» ۇلتتىق بايقاۋىنىڭ وبلىستىق قورىتىندى كەزەڭىنە قاتىسقان بارلىق 28 وتباسىعا وبلىس اكىمى ج.تۇيمەبايەۆتىڭ العىس حاتى مەن 200 000 تەڭگە قارجىلاي سىيلىق تابىستالدى.

ەلباسى جارلىعىمەن باستاۋ العان «مەرەيلى وتباسى» ۇلتتىق كونكۋرسىنىڭ ماقساتى ءبىر شاڭىراق استىندا بەرەكەلى ءومىر ءسۇرۋدىڭ ماڭىزدىلىعىن ارتتىرۋ، وتباسىلىق ءومىر سالتى، اتا-انالىق پارىز، جاۋاپكەرشىلىك سەكىلدى ۇعىمداردى ەل ساناسىنا ءسىڭىرۋ، اسىرەسە جاستارعا جەتكىزۋ، جاراسىمدى جانۇيا قۇندىلىعىن كەڭىنەن ناسيحاتتاۋ بولىپ تابىلادى.