سەمەي شاھارى ءارقاشاندا بالالاردىڭ جاڭاشىلدىعىنا ايرىقشا كوڭىل ءبولىپ، بۇگىنگى كۇننىڭ دارىندى جاستارىن ەلگە تانىتۋ ماقساتىندا ءتۇرلى بايقاۋلار ۇيىمداستىرىپ كەلەدى. اسىرەسە، بەينەلەۋ ونەرىنە قىزىعۋشىلىقتارى بار بالاقايلار ءۇشىن كوپتەگەن كونكۋرستار وتكىزىلەدى.

وسىعان وراي بۇگىن قالامىزداعى دوستىق ءۇيىنىڭ الدىندا انالار كەڭەسىنىڭ جانە دە تاتار ەتنومادەني بىرلەستىگىنىڭ تىكەلەي باستاماسىمەن ەلوردامىزدىڭ 20 جىلدىعىنا ورايلاستىرىلىپ، وڭىرىمىزدەگى مەكتەپ وقۋشىلارى اراسىندا «الەم بالالار كوزىمەن» اتتى سۋرەت بايقاۋى ءوتتى.

بايقاۋعا قاتىسقان 100-گە جۋىق جاس سۋرەتشىلەر ءتۇرلى-تۇستى بورلارمەن اسفالتقا وزدەرى قالاعان كورىنىستى ادەمىلەپ سۋرەتتەپ، ەكى ساعاتتىڭ ىشىندە عيمارات اۋلاسىن ەستە قالارلىقتاي قىزىقتى سۋرەتتەرمەن تولتىردى. شاراعا قاتىسقان بارلىق كىشكەنتاي بۇلدىرشىندەرىمىزگە تاتتىلەر ۇلەستىرىلىپ، ءتۇرلى ويىنشىقتار سىيعا تارتىلدى.
ۇيىمداستىرۋشىلاردىڭ ايتۋىنشا، جاس جەتكىنشەكتەردىڭ وتانىن سۇيۋگە، تۋعان جەرگە، تاريحي مۇرالارعا قۇرمەتپەن قاراۋعا تاربيەلەۋدى ماقسات ەتكەن وسىنداي قىزىققا تولى سايىستار الداعى ۋاقىتتا دا جالعاسىن تاباتىن بولادى.