بۇگىن 31 مامىر ساياسي قۋعىن-سۇرگىن قۇرباندارىن ەسكە الۋ كۇنىنە وراي، سەمەيدە ءبىرقاتار ءىرى شارالار لەگى ۇيىمداستىرىلدى. وبلىس اكىمىنىڭ ورىنباسارى اسەم ءنۇسۇپوۆا ارنايى كەلىپ، ءاليحان بوكەيحان باستاعان الاش قايراتكەرلەرىنىڭ رۋحىنا تاعزىم ەتتى.

-بۇل كۇن ءبىز ءۇشىن اسا اۋىر دا قايعىلى كۇن، ميلليونداعان قۇربانداردىڭ كوز جاسى مەن ولاردىڭ تاۋەلسىزدىك جولىنداعى كۇرەسى ەشقاشان ۇمىتىلماق ەمەس، 1921-1954 جىلدارى بۇرىنعى كسرو كولەمىندە سوتتالعانداردىڭ سانى 3 ملن 777 مىڭعا جەتكەن ەكەن. ونىڭ ىشىندە ءاليحان بوكەيحان، احمەت بايتۇرسىن ۇلى، جۇسىپبەك ايماۋىتوۆ سياقتى الاش قايراتكەرلەرى ەڭ قاتال جازاعا كەسىلدى. بۇنداي قاتاڭ اتۋ جازاسى ۇكىمىنە ىلىككەندەردىڭ سانى 640 مىڭ ادام بولدى. ازاپ لاگەرلەرىندە قازاق ينتەلليگەنسياسى كىناسىز بولسا دا،  زارداپ تارتىپ جاتتى. ءتۇرلى ۇلتتار جازىقسىز بولسا دا، قازاق ەلىنە كۇشتەپ جەر اۋدارىلدى. قازاق حالقى سول زاماندا باسىنداعى قايعىسىنا قاراماستان سىرتتان كەلگەن جۇرتتى باۋىرىنا تارتتى. سوعىستا دا، بەيبىت ومىردە دە ءتۇرلى ۇلتتاردىڭ باۋىرمالدىعى قالعان ەمەس. بۇگىن، وسىنداي ايتۋلى كۇندە سەمەي قالاسىنداعى لەنين كوشەسى «ماڭگىلىك ەل» بولىپ اۋىسقانىن سىزدەرگە قۇرمەتپەن حابارلاعىم كەلەدى،-دەدى وبلىس اكىمىنىڭ ورىنباسارى اسەم ءنۇسۇپوۆا.

وسىدان ءبىراز جىل بۇرىن وسى لەنين كوشەسىن اۋىستىرۋ ماسەلەسى كوپشىلىكتىڭ تالقىسىنا تۇسكەن ەدى. لەنين كوشەسىنىڭ بويىندا ءاليحان بوكەيحان باستاعان الاش قايراتكەرلەرى كەلەتىن بوستاندىق ءۇيى ورنالاسقان. بوستاندىق ۇيىندە ءقازىر سەمەيدەگى وبلىستىق تاريحي ولكەتانۋ مۋزەيى اشىلعان.

ء-بىزدىڭ كوشەمىز ماڭگىلىك ەل دەپ اتالعانىنا حالقىم ءۇشىن قۋانىپ تۇرمىن،-دەدى مۋزەي ديرەكتورى ءلاززات ءالجان،-بۇل جەر الاش قايراتكەرلەرىنىڭ ءىزى قالعان قاسيەتتى جەر. جۇرەگى قازاقپىن دەپ سوققان كىمگە دە بولسىن ىستىق. بارشاڭىزدى وسى جاقسى جاڭالىقپەن قۇتتىقتايمىن! ەل بىرلىگى ارتا بەرسىن.